Гуртын тӧл уй вакыт (Ильин)

Гуртын тӧл уй вакыт Автор: Михаил Ильич Ильин

Кылдытон дыр: 1917. Источник: Ильин М. И. Стихотворенияёсыз. — Елабуга: Типография совета народного хозяйства, 1920. — 16—17-тӥ бамъёс.

Гуртын тӧл уй вакыт

Котрес бамо люгыт толэзь
Шулдыр пиштэ гурт йылын,
Солы луса тӧдьы лымы
Чиль-чиль чиля лыз тылын.

Гуртлэн шораз сылӥсь черык
Люг-люг чебер адӟиське,
Солэн йылаз киросъёсыз
Син мальдымон кисьтаське.

Ненокин но уг адӟиськы
Огназ кылем изем гурт.
Буран тӧлъёс юртъеръёсыз
Лымыосын ӵокталлям.

Номыр куара уг кылӥськы,
Аулак паськыт урамъёс.
Сюлэм шуго пуныос но
Нокытын но уг уто.

Вань калыкъёс вӧсяськыса
Туж зол умме усиллям,
Ужъёссэс но, кайгузэс но
Ӵуказелы кельтӥллям.

1917 ар. 4 ноябрын.

---