Поладкстомо (2016)/Горниповне
| ←Чумовтомо чумо | Горниповне (2016) by , edited by Ломшина Л. А., Маризь Кемаль, Малахова Е. П. |
Колмонень морот→ |
| Нуянь Видяз. Поладкстомо. Без продолжения. — Саранск, 2016. — с. 243—247 |
[243]
| ГОРНИПОВНЕ |
Сырькаесь Алява ды Аржай атя кочкить чукшторовт. Вейкесь эйстэст куракшкенть ве ёно, омбоцесь — тона пеле. Эрьвань ало эземне. Вакссост ведра. Коморонь-коморонь кайсить эйзэнзэ раужо эрьге марнетнень. Кочкить уш талайде. Котьмить чатьмонезь.
Ушосонть маней, аволь пек пси чи.
— Ванан, тедеде куяртомо кадовтано, — васенцекс колызе каштмолеманть, кортазевсь Алява — наголь чаво панжовкскеть эйсэст. Нетьксэсткак теке суринеть. Шабратнень оно кодат — сельмть сявадстыть. Мезе мартост?
Кортась марямга ды редявикстэ пеняцязь.
— Мезе-мезе?! — каятотсь тонань пшти, теке пеель, вайгелезэ.
— Таргсевлиньгак, мерян, мон сестэ тия-тува, овсе лият улевельть. Жальть теть марявсть...
— Саты, саты кельсэть човсемс! Лавгат, сыре нонай, тонськак а содат мезде... Валгак мон сестэ теть эзинь ёвта. Тон тонсь сестэ бизмолгадыть, — керчизе атянзо, сельгеме а кенерят, — теизе сонзэ чумокс Алява.
Аволь весть макснесь эстензэ вал атясь — эрямо пельксэнзэ марто а педсевемс. Чатьмонемс седе сеедьстэ. Ансяк тень эйстэ мезеяк эзь лисне. Сонензэ эзь чарькодеве ды эзь кирдеве мельсэнзэяк: те кода истя, пинге эрямс вейсэ ды вейке-вейке марто а кортамс?
— Вант ней вана, кецнек, мезес ветинзеть жалямось. Мон умо-о-ок чарькодия — кадовтано куяртомо. Неть кодат куярт... Куш сайть, шкань апак ёмсевте, пелюма ды...
— Мезе-мезе? Пелюма? Чавола пря! Чавола пря! Тон косолить сестэ, каштыркс опенка? Мекс Кунсолымек? Мекс валгак каршом эзить нерьгста?
— Ва-а-ал тонь каршо?!
— Мезе монь, мезе монь... Эли сусковлитень. Чуролгавтовлить — ды весе. А мезть ней лырнэмс!
Алява сырькаень чамакиськезэ — тюжала. Ней якстерьгадсь. Палозь палы. Секень вант, икелензэ куракшкесь гувк кирвази. Свал сонзэ истя. Ансяк сыргить тортанзо — кирвази. Полавтови вановтозояк: раужо сельмензэ полгарьгадыть ды сеске пешкедить кежей толдо. Ашолк-ашолк кивчкаить эйсэст ацирьгалематне.
«Токавсь ёзнэ пизэсь.., — янксезевсь, мекс правтызе толверьгиманзо коське пенгтнес, сыре Аржай, — весе, сыргасть органзо, ней куроксто а рожодоми...»
Лиссь, мезе эзь учне Аржай. Низэ општ мерсь. Сень кис седеяк марявиксстэ каштордозевсть чукшторов лопатне.
[245] Пиретнень пева пижелды-нувси вирь. Сась, неяви, удомазо. Чиресэнзэ, овсе Чиньгаень пиринест каршо, — пельскоське тумо. Сонзэ прясто апак учо каятотсь сезьганонь чикоркс.
— Чэ-чэ-чэ.., — прок кияк панжсь апак вадне ортат.
Нармуненть рангомадо Алявань сювордавсь седеезэ.
— Вай, Вере паз, те мезде истя сон лакшторды? — энялдома валсо кортазевсь сырькаесь — Мезде чикорды те уро пулось, идемевсь калгавлизе!.. Шумбра? Зыян кодамояк эзь тееве Горниповне марто? Куш валнэ пельдензэ марямс, куш пель валнэ, тирякай. Колмоце ие тусь — пельдензэ а куш а каш. Прок, видеяк, ведьс ваясь. Мезе, кодамо апаро лиссь мартонзо? Колмоце ие чатьмони Горниповнем, колмоце ие, сяткинем.
Горниповнесь — Чиньгаень атятнень-сырькайтнень нуцькаст. Алкуксонь лемезэ сонзэ — Лияна. «Горниповнекс» сонзэ тризе-кастызе сырькаезэ. Тейтерькась вишка пингстэнзэ саезь текеде маряськак: «Тонеть мезе, Горниповне? Тон ков молевлить? Мезе теть пидемс?» Эрьва ёндо ды эрьва кода кольневтсть эйкакшонть эйсэ. Нильтякалесть мартонзо кода маштсть. Истя вана, теке педлей тикше, педяськак те лемесь.
Горниповнень, те раужо сельме, сурксокс менчевикс черь покольненть, ускокшнызе тетянзо-аванзо туртов вейкине тейтерест. Ускокшнызе та-косто чикуншка ёндо. Понгавтызе сон сестэ пиже тякинензэ аванзо сивес — ды азё вешник. Тусь тов, косто сакшнось. Иешкань ютазь Чиньгаень кудос пачкодсь чопода куля: тейтерест — эйдиненть авазо — понгсь кодамо-бути амазый тевс ды седе мейле прок ведьс ваясь. Ёмась од-паро прясонзо. Секскак Алява ульнесь анок путомс оймензэ те панжакай нилькскенгь кис. Пельсь лексемскак лангозонзо. Топавтнесь эрьва мелензэ.
Истя ютасть неть. Эйдинесь пургондась тейтернекс ды та-кода шкань апак редя велявтсь мазый, ёлганя рунго тейтерекс.
Кулянь кандтницясь чатьмонсь. Оймась паро кулянь учицяськак.
[246] Ведранть пештемс кадовсь аволь ламо.
Чатьмонсть кочкицятне аволь кувать. Аржай атя эзь кирдеве:
— Лиятат учомскак ульнесь а мезть. Дуцяк ней азё, шкадо мейле, эев прят. Мезе тень эйстэ полавтови? Кольневтемс теть, мерян, аволь эряво. Чипаесь менеленть тёкшкесэ, Горниповне — таркасо. Сэставтни рунгонзо, а стяви кодаяк. Лисема скалонь потявтомо — сонзэ таго иляк токше. Валот вейкель: иля эцне, аволь тонь тевесь...
— Лоткак болдордомадо! Тонськак а содат мезть човорят. Тонськак истямат. Карязт пек эзить яжа. Те тон, те тон весе чумось. Весе эрямонь лувом калавтык, идемевсь нилевлинзеть... — эль эзь лепия кежтнеде сырькаесь. Натой сорнозевсь. Теке орма педясь эйзэнзэ.
Аржай валгак эзь кая каршо. Стясь, саизе эземнензэ ды сыргась пирень тона пев. Тосояк чукшторовтне апак токше.
«Ней уш алкуксокс «пизямсь», кочксеме а карми, кинь эйс автордамс...» — арсезевсь атясь куракштнэнь, пандятнень вакска ютамсто.
Чинь псинть илыкезэ маштсь.
Прок якстере артовксс навсезь сувтеме, чипаесь новольсь пиретнень пева пижелдыця чувттнэнь вельксэс. Сон, марявсь, арсесь: чопавтомс эли, паряк, сыргамс мекев верев?
Виренть ёндо нурьгезевсь вень экшине.
«Вармас. Пиземе иля учо, куроксто а ули...» — тешкстызе эсь пачканзо Аржай атя, зярдо варштась толсо палыця чивалгоманть ёнов.
— Чэк-чэк-чэк.., — таго, ды истя а шкастонзо, каятотсь вирь чиресэ секе чувтонть прясто.
«Те истя, алкукскак, мезес тон, кулянь кандтний? Лиятне умок кекшнесть, тон яла эстеть кодаяк эзем-тарка а муят. Паряк, видеяк, учи эйсэнек кулине Лиянань пельде?» — арсезевсь атясь ды кармась пурнамо-сэрнямо кудов.
Сезьганось валгонесь Чиньгаень пире пес а стяко.
Зярдо атят-сырькайть уш сундерьгадозь пачкодсть кудов, вастынзе сынст паро куля. Ве ёндо редизь: [247] вальмалост эземне лангсо озадо аштесь ашосо оршазь ава. Учицяст ульнесь Горниповне. Кецнемантень арасель пе. Горниповнень элесэ удось кавтошка иень цёрыне. Сон вельть мольсь аванзо ёнов: сельмензэ раужот, кургинезэ вишкине, турванзо теке пеште лукшт.
«Мекс истят раужот чикуншка ёнксонь ломантне?» — арсемань пачк седейс пупизе мелесь Аржаень.
Чинь ютазь вишка Жора ёвтызе мелензэ кадовомс васол-покштянзо-сырькаензэ кедьс. Алява пейдезевсь ды мерсь:
— Кадовт, левкскем, кадовт! Коштось минек тесэ — медь. Ловсовтомояк шабратне а кадсамизь.
Аржай атя се вестэнть полавтнесь ёнксонзо ашолгадомс.