Важ йӧзлӧн видз-му уджавтӧг олӧм

←

Важ йӧзлӧн видз-му уджавтӧг олӧм (1930)
Аноним

→

Гижан кад: 1930, Йӧзӧдан во: 1930. Ӧшмӧс: Шахов М., Чисталёв В. Ас муын : 3-ӧд во велӧдчысьяслы лыддьысян нига. Мӧскуа: ССРС-са йӧзъяслӧн Шӧрса нига лэдзанін, 1930. Лб. 24-25.

447442Важ йӧзлӧн видз-му уджавтӧг олӧм1930Аноним

Водз асывсянь вӧрын шӧйтӧны йӧз: пӧль, кык нывбаба да гоз-мӧд челядь ар витаӧсь-квайтаӧсь. Пӧльлӧн да нывбабаяслӧн сӧмын водзладораныс коръяс ӧшӧдӧма, челядь дзик пасьтӧмӧсь. Ставныс мудзӧмаӧсь, тшыгӧсь. Нывбабаяслӧн мужикъясныс тӧрыт нин мунісны кыйсьыны. Кынӧмъяс сюмалӧ-а, кыйсьысьяс оз локны. Пӧрысь пӧль да кык нывбаба челядькӧд корсьӧны нуртор: вужъяс да тусьяс. Унаысь налы лолӧ сэтшӧм сёян кежысь овлыны. Вӧрса пемӧсъясӧс кыйны-вины морттуй налӧн абу. Верстьӧ мужикъяс олӧны кыйӧм-виӧм вылын. Оз на и налы быд ветлӧм сюр яйыд.

Петісны найӧ вӧр дорӧ. Ӧти нывбабаыс гӧгӧр сюся видзӧдӧ. Тӧдса сылы иныс, гоз-мӧдысь нин сійӧ татчӧ воліс челядьыскӧд: тӧндзи татысь сюрлі зэв кузь идз йылын шепъяс. Шепъясас чӧскыд тусьяс.

Медбӧръя волігас сылы сюрлі ӧтилаысь зэв уна сэтшӧм быдманторйыс. Сэки сійӧ кок увсьыс став ёг турунсӧ нетшкыліс, мед челядьыс ӧктасны гылалӧм тусьяссӧ мусьыс. Найӧ сэки пӧттӧдз сёйисны.

— Оз-ӧ ӧні на сюр? — мӧвпалӧ нывбаба.

Регыд нывбаба аддзис тӧдсаинтӧ. Видзӧдӧ да, гӧгӧр петӧма ёг турун, сӧмын ӧтилаын бара быдмӧны сука кузь идз йылын шепъяс. Сійӧ вӧлі кӧдзтӧг быдмӧ вӧр шобді. Пӧттӧдз сійӧс сёйисны ставныс. Сёйиганыс тусьяс гылаліны му вылӧ. Нывбаба гӧгӧрвоис мунтӧдзыс нетшкыны став ёг турунсӧ.

Со кыдзи медводдза йӧз уджалісны му вылын.

Мый вӧлі быдтас сетас муыс, сійӧ и шань.

Сэсся йӧзыд кутісны гӧгӧрвоны ёгтӧ весавны, отсавны быдманторлы быдмыны. Сэсся казялісны быдманторъяслысь ӧти кадӧ воын быдмӧм, гӧгӧрвоисны — оз вӧлӧм пыр дугдывтӧг быдмыны. Найӧ кутісны весавны ёгъяссӧ тӧдсаинъясысь, асьныс быдмигкостіыс кӧнсюрӧ ветлӧдлісны. Тайӧ уджсӧ вӧчисны сӧмын нывбабаяс. Мужикъяс пырджык кыйсисны. Сӧмын оз кӧ вӧлі сюр немтор, вӧлись босьтчыласны шепъяс да вужъяс корсявны. Кутісны тӧдны, кутшӧм кадӧ локны весалӧминъясысь шепъяс нетшкыны. Эз кутны кыссюрӧ тӧдтӧминъясысь корсьысьны.

This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:

it was anonymously published before January 1, 1956 (more than 70 years ago).

This work is in the public domain in the United States because it was published before January 1, 1931 (more than 95 years ago).

This anonymous or pseudonymous work is also in the public domain in other countries and areas where the copyright term of anonymous or pseudonymous works is 95 years or less since publication.