Поладкстомо (2016)/Ава-ай, косат?!

From Wikisource
(Redirected from Ава-ай, косат?!)
Jump to navigation Jump to search
Ава-ай, косат?!  (2016) 
by Нуянь Видяз, edited by Ломшина Л. А., Маризь Кемаль, Малахова Е. П.
Нуянь Видяз. Поладкстомо. Без продолжения. — Саранск, 2016. — с. 162—176

[162]

АВА-АЙ, КОСАТ?!

Серёжа несь он.

...Кодамо-бути чопода тюсонь, тувонь нерь марто пачат апак учо лиссть кенкш тарчксонть алдо ды ламонест сыргасть Серёжань коникензэ ёнов. Рокнозь, эчке лапужа пулосост кияксонтень чавозь, пейсэст чикордозь, эцесть малав ды малав.

«Ава-ай!» — пиже-ожо вайгельсэ, ёжонь апак маря серьгедсь Серёжа ды тандадомадонть лепштявсь, кирьмицявсь вельтявксонть ало. Тувонь нерь, раужо покш крыса ёнов молиця нулгодькс эрикайтне кивчк шкас ёмасть. Прок арасельтькак. Сынст таркас икелензэ стясь покшолгавтозь, прок кинонь экрансо, аванзо чамазо: раужо сизезь сельмензэ, вачочиденть ды ризнэматнеде празь чамаумарензэ, вановтсонзо — певтеме мелявкс. Чумонь марязь вансь сон цёрынензэ лангс, чамаванзо мельга-мельцек кирякстсть, начко киксэнь кадозь, ванькс, теке хрусталень, сельведень зярыя эрьгть. Серёжа снартыксэль кукшкадомс эйзэнзэ, кутмордамс кирьганзо, паламс ды ёвтамс оймавтыця зярыя важов валт, ансяк кендесь эзь нолда, усксь эстензэ анеявикс вийсэ... Келезэ алонзо кундатотсь, кедензэ матратотсть...

Меельцеде неизе аванзо аволь умок.

Ульнесь валске. Ашолгадома ланго. Ниле пильге лангсо кшнинь каштомнесь, аванзо валсо, буржуйкась, умок кельмель ды аштесь киненьгак аэрявиксэкс. Копачазь [163] вальматнеде комнатасонть чоподаль; ужотнестэ сияждозь тандавтнесь лекш; стенатнестэ мольсь тарькс якшамо. Тесэ сынь аванзо марто ютавтнесть кувака ветнень.

Исяк чокшне прядовсть таштазь «пенгест»: апештявиця буржуйкась нилинзе сёрмадома столень меельце кавто пилытнень ды цитниця кундамо марто ящикенть. Весемесь, мезесь палсь, уштовсь. Чайниксэ ведесь вензэ перть кельмесь эекс.

Авазо се валскестэнть пурнась-тейсь, палызе Серёжань ды, аламнеде потазь, нусманя вановтсо кувать вансь цёрынензэ лангс. «Куш кшипечтьке, вишкине-вишкине кшипечтьке...» — мерсь лисемадонзо икеле ды кармавтсь ковгак а тукшномс, аштемс кудосо ды учомс.

Серёжа учось чоп.

Зярыяксть, нильтякадомадонть, лиснесь ватань эчке вельксэнть, ланганзо каязь нулатнень-валатнень алдо. Ансяк якшамось, потамодо эзь арсеяк, ды нурьгамозь пекесь пансть эйсэнзэ мекев. Аштесь вельксэнть ало оршнезь, прок кирдсь мельсэнзэ ношкстамс ушов: пилысэнзэ понань цюлкат, пальтосо, прясонзо шапка.

Серёжа учось. Учось, лиясто эзь маряво якшамоськак, учось, шканзо стувтозь... Стувтневи. натой аванзо марто улкоть сэвезь кшипечтъкеськак. Матедевкшнесь, сырголесь ды одс сутямкшнось. Учось аванзо. Учось вензэ самс. Матедевсь.

...Сась ёжос сэрей ашо потолок марто комнатасо. Ансяк вальматнесэ валдонь кекшниця Шаршавтне ледстневтсть сынст вишкине чаво квартирадост. Ёжос самсто Серёжань кецявтызе лембесь. Марявсь тензэ: кирьга видьга аштесь лембе ведь марто ваннасо. Абунгавтызе, мекс ульнесь кайсезь: шапкавтомо, пальтыневтеме ды мик цюлкавтомо. «Кода истя? Те косан? Косо буржуйкась? Косот ловдонть цивтёрдыця ужотне?»

Эрьва кодамо тюсонь велькссэ вельтязь кониккетнень юткова, тевень содазь, тей-тов якась асодавикс аваломань. «Теке авам, — арсезевсь цёрынесь. — Черензэ, кода сонзэяк, раужот, сельмтнеяк истят, вачочиденть ды ламо-ламо мелявкстнэде ваязь потс...»

[164] Варштась тей-тов, аламнеде тонадсь ды пелезь ладсо, лавшо вайгельнесэ кевкстсь:

— Косо авам?

Каршонзо кияк мезеяк эзь мере. Раужо черь, коськана, аволь сэрей авась лиссь. Серёжань перька кониктнева эйкакштнэ удость.

Цёрыненть нурькине, ансяк ушодовиця эрямосонзо те ульнесь эйдень кудосо васенце валскезэ; валскезэ од, покш кудонь раськесэ, косо арасель, кода лиятненьгак, весемеде малавиксэзэ — авазо.

Таго мелезэнзэ ледсь эсь кудосост неезь онось.

...Аванзо чамазо, талныця вановтозо ёмасть. Тень таркас тиринезэ сась эсензэ вечкевикс ашо, прок лов, палясонзо; аштесь коникензэ каршо ды пейдсь, пейдсь элякалемань, уцяскадо пешксе пейдемасо. Истят ёжот яла сакшныльть тензэ эйдень кужосто кедте кедьс кундазь самстост, квартиразост совамсто. Эскельдильть тарчксонть трокс, саилизе «чипайнензэ» кавалалдо ды, паро ёжодонзо кецнезь, прок превстэ лисиця, зярыяксть кепедилизе потолок малав. Мельс кадовсь ве самост.

— Неят, мезе кедьсэнь? Неят, сяткинем? — ды авазо, марямга пейдезь, прясонзо тей-тов кайсезь, невтизе кутьмерензэ удалдо панжадо кедькоморонзо: куншкасонзо ашолдсь ванильсэ почодозь, Якстерть мериця... пряник. — На, кирдть, те тонеть! Вийть, цёрынем-левкскем, пурнак!

Серёжа, мельспародонть мизолдозь, саизе аванзо венчкекс пурназь коморсто казненть.

— Удок, удок, монь баягинем. Удомат яви, стят ды сэвсак, — мерсь тиринезэ.

Ярсамо Серёжа, аванзо кунсолозь, эзь карма. Ве ушосонть, каня ярснить веть? Кие истя тейни? Нолштызе казненть ды нерьгстызе аванзо кедьсэ аламнеде качадыця Ламбаськенть тодовонзо алов. «Ванды, ванды валске сэвса», — прась ве мельс шкинензэ марто. «Эно валскес», — каятотсь нусманя вайгель, ды ашо палясонзо авазо кивчк ёмась. Сонзэ таркас, поксарязь, тарчксонть алдо таго кармасть вейке-вейке мельга лисеме крыса ёнов молиця, [165] ношка нерь пачатне. Сынь чавсть кияксонтень нурькине-эчке пулосост ды эцесть, вейкест-вейкест лангс кайсевезь, цёрыненть коникензэ ёнов...

Серёжа тандадомадонть пижакадсь.

Та-косо аволь васоло сеедьстэ, теке пельсть — а ледневить, чавсть зениткат. Бах-бах! Бах-бах-бах! Мартост дзинькаезь пелькстасть валдонь анолдыця шаршавсо пекстнезь вальмань суликатне. Вешксь сиренась, тердсь кекшнеме кайсевиця бомбатнеде. Коридорстонть марявсть чиицянь эскелькст, кенкшень панжтнемань-пекстнемань зэрть, авань вайгельть. «Сэнь толсо палост, алома-нень понат!» — явовсь лия валтнэнь ютксто пижакадома.

Стакшнозь эчке велькссэ вельтязь, аштесь Серёжа кониккесэнть кунст ды, потолокс ванозь, кунсолось гайттнень, шалтонть.

Окойники пушкатне теизь эсь тевест, потомсть. Аламонь-аламонь мурдась валскенть каштмолемазо. Цёрыненть мельс ледсь аванзо марто вастовомадо тандавтыця ды теке марто седеень витиця онось, ледсь мелезэнзэ истямо ламбамо, парсте-тантейстэ качадыця казнезэ. Шкань апак ёмавтне сон велявтсь бока лангс, таргизе вельксэнть потсто вить кедензэ ды нерьгстызе тодовонть алов — пряникесь тосо арасель...

«Косо сон? Косо? Ков тусь? Ава-ай! Косат?!» — цяк эзь лисе покордавомадонть кургстонзо. А кемемадо варштась прялксонть алов одс, мезеяк эзь муе. Ёжонь каладомадонть рипакадсь, вийтеме путынзе кедензэ вельксэнть ланга рунгонзо кувалт; аванзо кондят раужо сельмепонанзо начксть сельведтнеде.

Серёжа кодаяк эзь явово ондонть, кемсь: сакшнось аволь аванзо ликезэ, сультезэ — сонсь чевте седей ды паронь арсиця авазо; сась, палызе ды венстясь тензэ, илязо пеле раужо назой пачатнеде, пряник.

Цёрынесь велявтсь лия ёнксонзо лангс, ускизе, илязо неявояк, вельксэнть; носксь судосонзо ды ваднесь чамаванзо сельведтнень. Эзизе маряяк панжовиця кенкшенть псакакс мавкстамонзо, эзизе нее ваксозонзо сыця (истя [166] аванзо ёнов молиця, ансяк седе алкине) трицянть-ваныцянть, кона сэтьме, теке марто баягинекс гайгиця вайгельсэ ледстизе: шказо стямс.

— Стядо, стядо, саты тенк лужалемс! Шказо стямс, — кортась совицясь, кониккетнень юткова яказь. — Даша патянк, нармуннеть, учозь учи. Стядо, стядо, панжтнинк сельминенк.

Ацавкстнэ тесэ-тосо лыказевсть; каятотсть кургонь автемань кувакасто таргавозь «а-а-айть».

Кедень пандтнезь котынесэнзэ Поля эль марявиксстэ ютась кенкшенть маласо кониккентень. Серёжа яла аштесь вельксэнть потсо ды марясь прянзо киненьгак аэрявикс, кадозь, пайстомо эйкакшокс. Сон учось, вана кияк сы ды вадяшасы, лелювасы, сайсы элезэнзэ ды лепштясы мештезэнзэ. Пельсь: сонзэ допрок стувтызь, ды ваксозонзо сыця а ули.

Поля «патянтень» таргодо икеле топодсть кемгавксово; «патяй» пшкадема валонтень кодаяк эзь тонадо. Тейтересь пеедькшнезь кепедизе велькс пенть:

— Те мезе истя, а? Аволь прят сэреди? Мезе мартот лиссь? Оймак, сырнень покольнем! Юты, юты тошначить. Адяка ярсамо... Ярстано, ды ёжот вадрялгады. Адя, адя, превейнем...

— Пряникем косо? — боканзо лангсо аштезь, ниреждезь, сельведень пачк мерсь цёрынесь.

Велькссэнзэ аштиця «патясь» апторгадсь, сеске эзь муеве тензэ, мезе меремс.

— Кодамо пряник, нармуннем? Каня, онстот неить? Монь арась. Седе паро ули Даша патятень молемс. Мейсэ а мейсэ — кошксинесэ яла каванятанзат. Содат кодат тантейть! Те седе виде ули, муить мезде ледстнемс...

— Пряникем косо? — марикскак эзь тее удало ёндо аштицясь. Сон содась эсензэ — «косо пряникем?» — ды вансь ве таркас, тодовонтень путозь мокшнынензэ лангс.

«Мезе теемс? Кода оймавтомс пакшиненть?» — чарасть-велясть тейтеренть прясо арсематне. Вешнесь валт ды сонськак аноколь аварьгадомс мартонзо вейсэ.

[167] — Оймак, нармуннем, оймак. Вана паньсызь минектне немчуранть, неть идемевсень понатнень, сестэ уш, сестэ уш... Зярс кирдть. — Содась Поля, аволь неть валтнэнь ёвтни; содась, вете иесэ кажос понгицянтень немчурадонть валонзо а чарькодевить, лиятат вана эзть муеве.

— Кие саизе монь пря-пряникем? — Серёжань кунсоломскак арасель мелезэ.

«Верепаз, ды те истя мезе мартонзо? — арсесь Поля цёрыненть коняс кедензэ путомсто. — Аволь ормалгадсь? Мезде истямо ордалемась? Макст тензэ пряник — ды весе! Косто сонзэ сайсак?! Мезень кис, кодамо пежетень кис лондадсть лангозонок неть майсематне?»

«Кошкседе» мейле эйкакштнэ пурнавсть Рубцов Колянь кониккензэ ваксс. Сон куросонть — «ушмодей». Сонензэ сёксня молемаль уш омбоце классос. Ансяк вана гуень пря немчурась Колянь тевензэ-арсеманзо керинзе эсензэкс. Цёрынесь таргизе тодовонзо алдо ташто, мерькавозь, журналонь покшолмасо книганзо, ды эйкакштнэ, уш зяроцеде, кармасть ванномо лопань келес мазый артовкстнэнь. Коля марямга ловнось алгаст сёрмадовкстнэнь. Перьканзо пуромозтне эзть элякале, мерят, токинзе валскень кельме.

Поля лиссь. Зярыя шкань ютазь совась мекев. Кедьсэнзэ нардамо ды алюминиень кечине. Ютась Серёжань ваксс. Озась каршонзо кониккенть чирес. Ламоксть пандтнезь ды седеяк ламоксть муськенезь халатонь зепстэнзэ таргась кавто кошксеть ды навинзе кечинесэ пси ведентень. Вейкенть венстизе цёрынентень. Тона, кенерепакарензэ лангс нежедезь, озась. Сэвизе кошксенть пелензэ. Омбоце пельксэнть велявтызе.

— Косо пряникем? — текень ледстизе пакшась ды таго мадсь.

«Мезе мартонзо? Те, нать, ярсамо? Эйкакшонь ордалемат? Орма? Конязо аволь пси. Эряви меремс докторонтень. Пряник... Муемс тензэ пряник? Те ней — валмеревксэнть коряс: чить тол марто а муят. Ужо, ужо, Серёжа, лырномо шкадо икеле а карматано, [168] прянок нолдтнемс а мезть. Кеман, косояк ды кадовсь вейкешка. Муема... Сонстемензэ, ванан...»

...Ошонь ульцятне, чипаень валдонь чадыведенть ды аволь музгордиця якшамонть лангс апак вано, чавольть. Пирявкстнэнь ды кудонь стенатнень ёжова оймсесть шушмот, качадсь идем чинесэ. Марявсь: эрицятне уш зярдояк а велявтыть эрямонь пизэзэст, зярдояк а чачи одс неть пандонь сэрьсэ кевень кудотнень ютксо эрямо. Чуросто ютыцятне, теке сулейть, аволь кеме молевкссэ эскелясть теине, келязь-шешкезь яннэтнева.

Поля чинек-венек эзь лисне эйдень кудостонть. Сон ансяк ней фатясь перьканзо чавочинтень, ломантеме ульцятненень, ды тапардызе сюмора ёжо. Овсе аволь умок вальмалгаст ардтнесть машинат, стякочистэяк ды седеяк пек покшчистэ шалность тей-тов молицятнень вайгелест. «Каня сти ошонок зярдояк пильге лангс? — кавтолдозевсь тейтересь ды визделгадсь те лавшочинь мельденть. — Сти! Сы шка, ды неть ней апак уряда кудоюткотнень пештьсынзе ломанень, тундокс лажныця, лей. Куловстояк вельмекшнить ошт, минекесь — тюри, лисни, эри ды Куловдо вельть васоло», — арсесь сон.

Поля кирдсь ки Кирчик Ленанень, кона марто вейсэ прядызь «педэнь» васенце курсонть. Истя сынь мерильть педагогикань институттонть, косо кавто-колмо ковдо эзть кенере ютамо омбоце курсонь тонавтницякс. Учови-арась се шкась, зярдо сынь таго совить келей кенкштнева содамочинь храмозост ды поладсызь тонавтнемаст седе тов?

Лена Кирчик, тонавтнема шкань комсомолонь секретарест, важодсь кодамо-бути анокстамонь-явшемань организациясо. Сынь та-кода апак учо вастовкшность ушосо. Ней ледсь мелезэнзэ, секс кирдсь ки сонзэ ёнов. «Паряк, араськак тосо? Шкатне оно кодат. Тосо-аволь, варчама-чиема, муема ёвтазь адресэнть».

Вана эрявикс кудось. Кавто этажсо, колонна марто. Сельмс каятотсь кенкшенть ваксс чавозь «лазось». Зярыя валтнэстэ редизе вейкенть — продовольствие. Неизе ды арсезевсь икелень лавкатнень ярсамопельде тыц пешксе [169] лавсятнеде. Зярыя сортонь кши, сюкорот, печеният, пештть, пряникть! Сайть куш мезе ды куш зяро.

Кудонтень нолдызь апак кирде, апак кевкстне.

Ве курсонь ялгазо вастызе коськстэ. Ансяк шаштынзе конёвонзо, лисемс стуворонзо экшстэ эзь лисе. Натой эзь стяяк. Мерсь озамс каршонзо, кода прявттнэ озавтнить сакшныцятнень-энялдыцятнень.

— Лисни, кортамось моли... вейке пряникте? Истя? — ледстизе сыцянть энялдоманзо, лиядо мездеяк апак корта, кельме, ят вайгельсэ.

— Истя. Ансяк вейкеде, — сэтьместэ пандызе Поля, ялганзо сурсо бриллиант марто сурксонть лангс ванозь.

— Килограммат теть а алтан, а вана кавтосядошка граммат, паряк, мутано, — мерсь Лена ды аламос чатьмонезевсь. — Ансяк...

— Мезе «ансяк»? — прок мельде-валдо, тевс апак эцне, кевкстизе Поля.

— Тон арсят, сынь усксевить стувор ящиксэнь? Кеман, эзик стувто валмеревксэнть: апак вадне чаротне чикордыть. Вана «ансяк оеськак».

— Стувтомс неть валтнэнь эзинь стувто. Ялатеке а чарькодян, ков шаштат, — чаравтызе прянзо; эськанзо тешкстызе — стяко ютавтнян шка.

— А пачкоди? Кодамат тон, Полине, чарьксчивтемат. Чавонь кедть ков, кинень молят? Пачкодсь? Ули вейке вадря содавиксэм. Цёраломань...

— Мейле мезе? Ков молема? Кандомс тензэ урозонь паёк? эзь кирдеве, теке укска пупизе, стясь таркастонзо тейтересь.

— Озак, озак. Иля бизнэ. Матрык толот. Мон кандомадо валгак эзинь ёвта. Теть ёвтнян, кода тевесь ашти, тон гувк кирвазить. Пайкатнеде содак: кияк педсеме мартост а карми. Течи те онкстневи лиякс. Улиндеряй мелеть идемс цёрыненть, мук, косто мелеть, рисьмине, кулон, пенчкеть — чарькодеви, аволь чувтонь...

— А бути арасть? Сестэ мезе... куш тонсь мадть? — сезинзе тонавтоманзо Поля.

— Те уш кода мелеть...

[170] — Прянь микшницят, салыгайть, педлейть! — пизямсь Поля, стясь таркастонзо ды ношкстась ушов.

«Вана теть ве курсонь ялга! Лездась лемезэ. Тонавтнемстэ, марявсь, лияталь: тевень содыцяль-теицяль, а манчицяль. Пря эзь невтне. Лисни, — алкуксонь обер-аферистка. Эзинь арсекшне, истямо «умарне» комсоргонок».

Эзь кемеве: эль лексиця-кувсиця, эрьва чистэ ламонь-ламонь кулыця марто ошсонть тейневсть истят безарькс, истят нулгодькс тевть. Полянь прок сельгенизь эрьва ёндо. Седеяк ацирьгавтызе Ленань кедьсэ толокс цитниця сурксось. «Те каня а нарьгамо лиятнень лангсо? Куш аволизе тонгоне, аволизе невтне, превтеме реве. Ломанть вачодо кулыть, сон...» — музгордсь яла эсензэ пачка.

Молемстэ ледсь мелезэнзэ Фана, икелень шабраст. «Те Ленась... Сестэ мезть учомс тонань пельде?»

А кувать арсемадо мейле ялатеке сась мельс: ютамс икелень квартираст пелев. Мезе ули, се ули!

«Войнадо икеле» чуросто ёвтневиця валтнэ апак редя теевсть сеедьстэ вастневицякс. «Войнадо икеле»... Фана, Афанасий Крючков, ды Поля эрясть ве кудосо ды мик ве подъездсэ: Поля — нилеце этажсо, сон, инвалидэсь, — васенцесэ. Эйкакшпингстэ Фана марто лиссь покш зыян: налксемстэ понгсь трамвай алов ды лиядсь пильгевтеме. Тень, эли, паряк, лия тувталонь кувалма, кадовсь ськамонзо, апак урьваксто цёракс. Иензэ лангс апак вано — сынь эль пачкодильть ниленьгеменьс, — ниде-вастадо, кудораськень нолдамодо эзь арсе. «Монень истякояк саты те парочись», — ахолясь теде кевкстицятненень; покш чамазо седеяк келейгадыль аптюконь мизолкстонзо.

Базань кенкштнень икеле, косо ламо иеть бухгалтерэкс важодсь Полянь шабразо, аштесь ружия марто ванстыця. Те эзизе абунгавто тейтеренть. Ялатеке эскельксэнзэ киртявсть. «Тевесь алкукскак керосин чинесэ качады, — кавтолдозевсь сон. — А стяко азгондить валтнэ: кажось ськамонзо а яки. Вант, вант, тейтерь. Арсек. Паряк, ажиятнень кудо ёнов аравтомс? А мезть сюконякшномс Фананень?»

[171] Неть мельтнеде нуваргадсь. Зуйк мерсь седеезэ. «Кода сестэ Серёжа, мезе сонзэ марто теемс?»

Ванстовиця ортатнес комсешка эскельксэнь апак пачкоде, Поля апторгадозь лоткась: эзь сода, мезе теемс, кода улемс, кода а теемс ильведькс. Кавтолдомань арсематнень айгизь ловонь чикордомадонть кинь-бути пек марявикс эскелькстнэ. Варштась удалов, ды вановтозо эртевсь Фанас; цёранть кивчкаиця теине сельмензэ мик покшолгадсть. «Тьфу тон, вардонь вий! — арсезевсь тейтересь сюдозекс. — Ков а варштат — вачодо таргозить, сон прок куяв туво, чамакиськезэ цитнезь цитни, удалксонзо кавто».

Фана лангсо якстере-тюжа, цигейкань сиве шуба. Прясонзо раужо каракулень папаха. Варштась икелензэ тандадозь аштиця тейтеренть лангс, ды турванзо келейгадсть мизолкстонть. «Ну мезе, гулькинем, ливтить, мерят? Ну-ну, кемть, монь пистеньстэ а менят», — кортасть визьксэнь а содыця теине сельмензэ.

— А-а, Полька-долька! Сколько лет, сколько зим! Откуда, из каких краёв? Кодамояк кажо? Совак адя, шабрынем... Сон монь марто, — мерсь ванстыцянтень ды, мандосонзо калдордозь, васенцекс сыргась теине ютамо таркаванть.

Фанань кедьстэ Поля сась чавонь кедть. Кайксэзэ седеяк каладсь. Тенень «лездась» Даша патяськак: цёрынесь, келя, сельме икеле солы, «дохтурост» нолдась тензэ глюкозань зярыя дозат. «Мезе теемс? Мезе теемс? — сардокс пезнась превезэнзэ, зярс налксесь-котьмась эйкакштнэнь марто. — Ковгак а туят, сави молемс те боровонтень квартирас, лиякс, маряви, карми седеяк берянь. Мезде уш пек истя пелемс? Чей а сэвсамам? Мейле мезе, юбка мельга лытыця?»

...Фанань важодемстэ само шказонзо Поля пачкодсь чачома кудонзо малас. Кемгавксово эрязь иетнень перть ламо мезе сюлмавозь сонзэ марто: тесэ чачсь-кассь, чийнесь-налксесь неть Вальмалкстнэва, якась школав... Эйзэнзэ, те умок-умок путозь кудонтень, сёксня понгсь бомба. Пелезэ каладсь. Омбоце пелькссэнть типельдсь [172] войнасонть маярдозь эрямось; кудонтень-инвалидэнтень ветясь нардевстэ шешкезь келей ян.

Поля пелезь вачкодсь раужо дерматинсэ чавозь кенкшентень. Седеезэ талнозевсь, чавсь, прок кундазь нармунень; марявсь, учомадонть лоткась шкась. А стяко редязь: учомадо ды сасамодо берянь мезеяк арась. «Паряк, зярс важодемстэ эзь пачкоде, кирдевсь мекскак?» — арсезевсь ды вачкодсь омбоцеде, седе виевстэ. Таго мезеяк. «Эзь са, улема...». Окойники марявсь кашторкс, костылень тукаема ды циндерень калдоркс; кенкшесь панжовсь. Сундерькс валдосонть, теине ютамо таркасонть, теке кандолазсо, неявсь мандо лангс нежедезь Фанань рунгозо. Аштесь инженть икеле ды мизолдозь вансь чамазонзо. Лехань-лехань артозь сэнь пижамасонть куядонть терниця рунгозо неявсь седеяк эчкекс.

Урьвакстомань а вечкицянть комнатазо покш. Куншкасонзо кирькс ланго стувор. Перьканзо ниле стулт. Мазылгавтнесть сонзэ лапшавасо керсезь кши, омбоце Лапшавась сывелень консерва мартоль. Вишка цяплынесэ ашолдсть сахаронь покольнеть, вакссонзо — штипецть. Сундерькс валдосонть кувтолдсь винань сэрей кирьга бутылка, маласонзо — копком пешксе... пряник вакан. «Учось, вардонь сельме. Сан а сан — эзь кавтолдо. Кемсь: лиси сонзэкс. Тень, Фана, вансынек, вельть ламо лангозот иля сае, — велясть Полянь прясо арсематне ярсамопельде пешксе стуворонть ванномсто.

«Паряк, киньгак лиянь учось. Содык азё...»

— Эно мекс цюркставинь? Прок аволь шабраяк... Кудосом лембе, аволь кода... — Мериксэль, кода лиятнень. Чарькодизе: истят валт ёвтнемс — нарьгамс ды пеедькшнемс, секскак нилинзе сынст. — Эрь, кайсек, мекс а кайсят?

— Тонь лембе, лиятнень вана... — эзь апторгадо, ёвтызе мелензэ Поля.

Кайсемадо тейтересь эзь арсеяк. Ансяк валгстызе човонь удалов понань лембе пацянзо. Фанань нильтяня яксеманзо питне эзть муе. «Кода истя ломанентень а чарькодеви: аволь весемесь микшневи? Косто те [173] набойчись?» — арсезевсь ды, меремань апак учо, тоцк озась сюпав стуворонть экшс.

Теевсь аволь куватень каштмолема.

— Сыть. Те пек паро. Куш ве вес оргодят налкставикс эйдень кудодот. Ярсат ломанькс, — кортазевсь Фана.

— Хамокс иля тейне, марят? Лиякс стян ды туян! — сертизе «вень» алтницянть, лангозонзо кежейстэ варштазь.

— Вай, тандавтымик! Ков туят, ков тееват, Полька-долька! — эсензэ лангс потмаксос кемезь, нарьгазь-пейдезь мерсь кудазорось.

— Мон тонеть сынь аволь чачома чинь тешкстамо. Пачкоди теть, арась? Макст тень кавто-колмо пряникть, ды ношкстан кудов.

— Вай, кодамат верканят! Апак кортне, апак арсе, сеске-пряникть. Кода а кода — шабратано. Васня минь мартот турванок начтсынек, сусктано, чайнеде симтяно... Тосо уш, кода кортыть, валскесь чокшнеденть превей.

Фана пеелень ношка ёнкссо поркснизе потомксонь сургучонть, панжизе бутылканть ды пештинзе рюмкатнень чопода-якстере, усковиця, теке медь, винасо.

— Ёвтык, мезе лисевель, кармавольтькак содамо истят каванямкатнеде прявттнэ? — нокась Поля озавтомс тарказонзо каваницянть.

— Мезеяк, — сэтьместэ, талномань апак сода мерсь каршонзо цёрась. — Улевель лия: тонеть аволь ансяк пряник, кренделень варинеськак а понговоль. Истя, Полька-долька? Покштнэ тондеть ламо содыть.

«Мезе виде — се виде. Калгодо пештесь. Мушкорсояк а порксасак. Штапо кедьсэ а сайсак, — кемезевсь Поля, — эряви мезеяк лия арсемс». Арсесь, яжась превензэ, ансяк те «лиясь» кодаяк эзь кильдеве, эйстэнзэ орголесь.

— Ну, Полька-долька, вастоманок кисэ! — каятотсь Фанань эчке вайгелезэ пешксе цярканть кепедемстэ. — Лездазо пазось вастневемс седе сеедьстэ!

— Ужо, ужо, шабра, мон чийнян, варштан васня икелень квартиранок лангс, куш кенкшенть икеле аштезь оймем витьса. Мон нейке, нилеце этажс ды мекев, — [174] жойневтинзе Поля валтнэнь таркастонзо стямсто ды, азоронть апак кунсоло, ютась кенкшенть ёнов. Снартызе панжомс. Эзь лисе. Эзь муеве эрявикс панжомась. — Лездак сак, марят-арась? Теке тюрьмасо эрят. Сядо панжомат! Пелят, салатадызь?

Фана арсезевсь лиядо, кенкшенть ялатеке панжизе. Инжесь ювк лиссь.

— Иляк пекста кенкшенть, мон куроксто! — серьгедсь наян вайгельсэ Поля.

Алтазенть топавтызе. Аламо шкань ютазь велявтсь мекев ды апак кортавто, апак энялдо озась тарказонзо.

— Вития седеем. Аштинь певтеме-чиревтеме малавикс кенкшенть каршо. Ней эно... вастоманок кисэ! — элякалезь ёвтызе мелензэ совицясь ды апак кокаде симизе икелензэ аштиця цярканть потмаксос. Цяк эзь лепия.

— Ну, мезе ванат? Тетькить сельметь... — пшкадсь козозь. — Макст седе курок симемс мезеяк. Ведне, ведне!

— Мезе-мезе, те ули, — Фана неждясь стулонзо ваксс путозь мандонтень, стясь ды ёкол-ёкол ютась кухняв. Мельспаросоль: Полька-долька аламнеде матрызе каштанчинзэ, теевсь седе кунсолыцякс. Мамштызе цярканть — вал эзь правто! Чокшнесь моли арсезенть коряс.

...Поля табордась, зяро саевить, пряникть, юрк токадинзе пальто зепезэнзэ ды салава, псакань эскелькссэ, теке марто капшазь, ютась лисема ёнов. Снартызе панжомс кенкшенть... А панжови. «Верепаз, ды те мезе истя? Теян, кода редия, мекс эно...» — тармазкадсь оргодицясь. Окойники чарькодизе, кепедизе-шаштызе алце циндеренть ды тостядизе кенкшенть.

Мельганзо каятотсь мандонь шалтаема, кежей вайгель, прыця кедьгень порксавома. «Ирнэк-иля, путытинь, Фана, тарказот. Нармуннесь эзь кирдеве. Шназь пистенеть аволь уш истямо нардев. Аволь весе, аволь петнявксонь пес, Фана, микшневи Моданть лангсо, содак».

...Поля тюкскадозь зобня ды дер ломантнень икеле седеень пидиця энялдоматнеде-сюконякшноматнеде кодаяк эзь саво ёжос. «Вана истя тонь марто, кендял! [175] Манявсь. Ойместэ лисиця паро валтнэ, Ленат-Фанат, тынк кондятнэнь пилес а пачколить. Ошось вачодо кулы, тынь суркст-бриллиантт таштатадо, куя пурнатадо...»

Чополгадсь. Поля ютась зяро-бути, ды потсонзо кирвазсь лия, кецнемань ёжо. Натой марямга пейдезевсь: «Теке вишка тейтерне — цоп ды ушов! Куш пейдть, куш авардть. Эйкакшокс тейнема? Паряк. Лиякс тевесь аволь лисе. Валынь ведь пулонзо алга, мезть кортамс... Оно мезе тензэ эрявсь — удомо кадовомс. Учок, идемевсень пона, лында!»

Молема юткось аволь кувакаль. Икелень шкасто ютаволь паро мельсэ, а редявольгак. Те икеле... Ней вачочиденть сон марявсь тейтерентень певтемекс. Виень аразденть кись тензэ видьстэ эзь кирдеве; мольсь, рунгозо жо тердсь куш ве минутас новолемс ловонть лангс эли нежедемс шушмонтень. Пря истямо мелентень эзь максо, содась, мейсэ те прядови. Иердезь, шкань-шкань пилытнень мельганзо ускозь, мольсь содавикс яннэванть, мольсь тов, косо эйсэнзэ учость.

...Эйкакштнэнь кенерсть андомост. Мадемадо икеле веенст налксесть, лиятне уш кузсть-эцесть таркас.

Апак кайсеяк, Поля совась Серёжань варштамо. Сон икелекс аштесь таркасо мадезь. «Вете иесэ пакшине... ды зяроце чи уш апак ярса, апак чийне. Те каня тев?»

— Ярсыть, Серёжине? — эйкакшонть вельксс комазь ды ловтаня чамазонзо ванозь, пшкадсь Поля.

Цёрынесь панжинзе сельмензэ, варштась комицянть мазый, теке аванзо, чамас.

— Угу, — эль марямга ёвтызе валонть.

— Мезде?

Серёжа мезеяк эзь ёвта, конинзе сельмензэ.

«Тевтне, ванан, аволь кецнемань. Молян, зярс эзь туе, Даша патянень», — мерсь эськанзо тейтересь ды ютась ярсамкудос. Даша патясь эзизе оймавто: цёрыненть ёжозо пек эзь полавтово, сэвсь колмо-ниле пенчкеть суронь кашине. Докторось мерсь: юты. Шка, келя, ансяк эряви.

Неть кулятнень марязь, Поля капшазь каизе пальтынензэ, оршась ташто ашо халатке, путсь зепезэнзэ кавто пряникть ды совась цёрынентень.

[176] — Сергей, Сергейне, Поля патят сась, паро кулят кандсь, — ёланя вайгельсэ, мизолдозь пшкадсь таркасо кунст аштицянтень.

Цёрынесь панжинзе сельмензэ ды варштась важовсто кортыцянть лангс.

Поля комась вельксэзэнзэ, таргизе пряникенть ды венстемстэнзэ кецневтизе валсо:

— Неят, мезе теть кандынь?

Неезденть цёрыненть чамазо валдомсь, сельмесэнзэ цитнезевсть кенярксонь сяткинеть. Саизе казненть ды путыксэлизе, икелеке, прялкс алов.

— Тозонь иляк путо. Сэвик. Те тонеть. Сон тантей-тантей. Озак. Седе ён теть ули.

Серёжа видемтизе рунгонзо ды састо, апак капша сэвизе чевте пряникенть.

— Тантей? Тусь мелезэть?

— Тантей. Те аволь авам кучизе?

Поля таймазкадсь. Кода улемс? Видькстамс: аволь аванзо пельде, — ёжонзо нуваргавтсак, коласак; меремс: аванзо казнесь, кенгелемс, — теяк а маштови, ялатеке сы шка, чарькодьсы — сон, тиринезэ, зярдояк а велявты. Секскак тейтересь сась мельс ёвтамс апак манче.

— Те пряникенть, Серёжине, мон кандыя, мон каванян эйсэть. Сон тантей. Тантей, а?

— Тон ва-алске сат монень? — кенярдовтызе цёрынесь кевкстемасонзо.

— Кода эно? Содазь, сан. Ды аволь чавонь кедть. Таго пряник туян.

Шабра кониккенть вакссто Серёжань пряпес сась цёрыне. Кармась мезде-бути ёвтнеме. Поля таргизе омбоце пряникенть, синдизе кавтов ды максынзе тенст пелькстнэнь. Тонат покш мельсэ поризь.

— Валскес, Серёжа, паро ве теть, — мерсь туемстэ Поля ды лиссь нупальстэнть.