Śa che ancuoi sto nosc benedeto Piovan e Calonego Don Śuani Batista Rudiferia

From Wikisource
Jump to navigation Jump to search
Śa che ancuoi sto nosc benedeto Piovan e Calonego Don Śuani Batista Rudiferia  (1852)  by Bortolo Zardini Zéšta
ladin ampezan
grafia moderna

Śà che ancuoi sto nosc benedeto pioan e calonego Don Śuane Batista Rudiferia 'l à ra bela sorte de ciantà ra so seconda Messa Novela voron anche nos, se no outro, almanco fei vede el nosc bon cuore co i ciantà a ra anpezana sta canzon.

Ma ancuoi sci che i sćiopetea!
Ah! non élo gnanche bel?
Duto cuanto cijirea
Da Tofana a Crepedel!

Sci, par Crista! che deboto,
Co se trata del pioan,
Ben, o mal, na fre de moto
Fejo anch' ió par anpezan.

Varda là, ce onor, ce smaia,
Che li à fato a Parsenon!
Varda là, ce na medaia
Che 'l à bù dal nosc Paron!

Cuore donca da Zacheo!
No voron restà inaos!
Parché ancuoi 'l é 'l Giubileo
E par El, e anche par nos.

Su! godòssera de gusto
Duto cuanto el santo dì!
Su, cianton, che 'l é de iusto:
Rudiferia e po no pì!

Saon ben, che a duto Anpezo
Se 'l pioan no fosse stà,
Ra i śirae mal da un pezo,
Beśen dì ra verità.

Viva! viva el nosc bon vecio!
Chel ch' El disc, el voron fei!
Voron tuoiselo par specio
Dute cuante, e pize e grei.

Ah! śon pu daos ra zapores
Del nosc vecio santo, e 'l diou,
Lascia pu ch' el tende trapores
Ch' el no vien mai pì da un ciou.

Ah! mangare fosson boi
De fei senpre chel ch' El disc!
Scilafé! ve l digo, fioi,
Śisson dute in Paradis.

Digo anch' ió, che 'l à da sbate
(Pardonamera Signor!)
'L à da fei con savie e mate,
Se 'l vó fei da bon Pastor.

No vedeo ce grun de śente
Che 'l é bon de confessà?
Pì 'l laora, e manco 'l sente;
'L é de fer, e po zalà.

Ma ra voi fenì: da resto
Dijé pu ce, che voré;
Un pioan conpain de chesto,
No pardia! che no ghin é.

Aló! animo, da brae!
Tolé dute el goto in man,
D' Agabona infin a Ciave
Craion: Viva el nosc pioan!

Preon dute ancuoi san Śuane,
Che 'l é 'l Santo del so gnon:
Ah! lasciamelo zento ane!
E po outro no voron.