Ústirt hám adam (Qayıpnazarov)
Ústirt ústi kóz jetkisiz keń jazıq,
Keń jazıq ta jıra-jıra sel qazıp,
Barlawshılar sırın ashıp sahranıń,
Gaz bar jerdi tapsa, dárhal júr jazıp.
Túnde serlep sholıp kórseń ján-jaqta,
Geologlar otı jılt-jılt janbaqta,
Tańda qarap tursań shańdı shubaltıp,
Mashinalar alǵa júrip barmaqta.
Motor gúrildisi, adam kúlkisi,
Batırlıǵı, ájayıp is úlgisi.
Qımtap kelgen shel qushaǵın jazdırıp,
Xasıl ǵaziynesin alar bul kisi.
Biyik tóbe, bálent qırlar, adırlar,
Tegislikte buldırasa saǵımlar,
Al tereńde jer qatlamın kóterip,
Sırtqa karay atlıǵar kók jalınlar.