Ózim ekken almaǵa (Qayıpnazarov)
Shiyrin jemis beriw ushın elime,
Alma nálin ektim móldek jerime.
Shaqası jayılǵan narwan boldı da,
Ósti, men ırzaman tókken terime.
Alma kórki kózge ottay basılǵan,
Qaptalınan júzim ósip asılǵan.
Ekewi de miynetimniń jemisi,
Tola túser dásturqanǵa ashılǵan.
Alma meniń jel jaǵıma panamsań,
Kúnge kúyip kelsem salqın sayamsań.
Qartayǵanda koltıǵımnan demewshi,
Súrnikkende súyewimseń tayansam.
Miywaların ayamaǵan almaday,
Ármanlarım shınlıq boldı aldamay.
Qosıq bolıp túnlerdegi oylarım,
Aq qaǵazǵa arıladı arnaday.
Alma seni alma dese, al deymen,
Alıw ushın jılda miywa sal deymen.
Mennen sońda meniń náwshe gúlime,
Pana bolıp, saya bolıp qal deymen.