Ósken jerge (Qayıpnazarov)
Men bunnan ketkenmen payıw-piyada,
Kelgende de jayaw júrip kelemen.
Ósken jerim ózge jerden ziyada,
Qádem qoyǵan sayın bilip kelemen.
Kelsem, piyadalap júrsem ser salıp,
Anamnıń óshpegen izin kóremen.
Haw báhárden qolǵa nıshlı bel alıp,
Atamnıń ter tókken jerin kóremen.
Mine kiyatırman adımdı urıp,
Kıysıq qıytaqlarǵa bólingen jerde.
Qarasam qıslawdıń aldında turıp,
Kózlerime ısıq kóringen jerde.
Yadıma túsedi júweri qorıp,
Shımshıqlarǵa saqpan atıp júrgenim,
Keshte bir eki baw jońıshqa orıp,
Ala sıyır ushın alıp kelgenim.
Kósilip jatqanday jalań ayaqlı,
Apıl-tapıl júrgendegi izlerim.
Imma dewge zordan kelgen sıyaqlı,
Jańǵırıp turǵanday shala sózlerim.
Bunda kelsem balalıǵım tutadı,
Jaslıq kúnlerimdi oylay beremen.
Jeńgelerim ilip sózden utadı,
Men de házillesip oynay beremen.
Hámde qorshap alar qatar-qurbılar,
Oyın-kúlki tamashaǵa ǵarq etip.
Eń qızıqlı kúnler, shiyrin tuyǵılar,
Shıǵa keler jaslıq dáwran jarq etip.
Qollarıma gúldástesin usınar,
Íqlas penen alıp ushar kókirek,
Saǵınıshqa sebep bolıp usılar,
Men awılǵa kelgishleymen kóbirek.
Jollar júrektegi sırday ashılar,
Júrip kórsem tolıp tasar kewilim.
Jańarǵan jer kózge ottay basılar,
Tileymen jáne de jaynay beriwin.
Meni shayır etken ana topıraq,
Sózlerimdi tıńlap xosh kóresen sen.
Jaga máni izlep, ishten ıńıldap,
Kosıq jazar bolsam yosh bereseń sen.
Sonda men ózińnen úyrengen sózdi,
Uyqastırıp aytıp beremen xalıqqa.
Altın ayasında ósirgen bizdi,
Bas iyip ótemen usı topıraqqa.