Ène bone crasse pinte

From Wikisource
Jump to navigation Jump to search
Ôtès modêyes : Rifondou walon
Ène bone crasse pinte (diviè 1935) 
by Marcel Heck, edited by El Mouchon d'Aunia 1974, replaidî sol Wikipedia walon li 31 di djanvî 2019 pa èn uzeu nén cnoxhou (Winch357) et rmetou droci pa Lucien Mahin (2020)


Èno qu' c'est bon, ène bone crasse pinte
Qu'on bwat in plin mitan d' l'esté
In riyant, in stant dvins n' bèle binde
In rwétant l' fiye du cabarèt

Éne pinte dè bière, èno qu' c'est bon
Wétèz l'eskeume, lûjante, bîn clère
Blanche come néje, lidjére come l'amoûr
C'est tout-ène fièsse dins vo ptit vére
Ça crape au long, ça brotche au boûrd
Éne pinte dè biére, èno qu' c'est bon

Ça sint l' solêy, ça sint l' lumiére
Ça sint mêyeûs qu'in frêche bouquèt
Ça sint les tcamps, ça sint l'èsté
Bwâre ène pinte, c'est dire ène priyére

Mais n' buvèz nîn ça come dè l'yau
N' clitchèz nîn ça come dins n-in trô
Mtèz-i dè l'syince, mtèz-i d' l'aprèsse
Ça vos rmûra come ène carèsse
Trimpez vos léves tout doûcètemint
Yun pa yun, rmouyèz tous vos dints
Stindèz bîn l' biére ttavou vo bouche
Fètes-lè glichî pa finès couches
Chuchez-llè ! N' vos dèspéchèz nîn !
Bwâre trop râde, l'amiss, ça n' vaut rîn

Vos sintirèz n' viye sans parêye
Couri d' vo front djusqu'à vos kvêyes !
Mais surtout, n' buvèz nîn tout seû :
Pou bîn bwâre, i faut yesse à deûs

Èno qu' c'est bon, après s' djournéye
D' bwâre à ptits coups, in fzant n' tatléye
N' riyès nîn ! Ça sroût sans réson !
Éne bone crasse pinte, èno qu' c'est bon !