Un sogno (Giovanni Pozzobon)

Cara Catina mia, son insognà
Una cossa che a dirla me vergogno,
Son insognà (ma al fin l'è sta po un sogno)
Che mi con vu me gera maridà.

Ma l'uno e l'altro gera desparà
Per aver fato sto grosso codogno.
Da una banda gavevimo el bisogno,
E da quel'altra la necessità.

Scontenti, malinconici, afamai,
Ogni dì sempre più l'andava mal;
Mocolavimo come renegai.

E senza bezzi e senza capital,
Pieni de cuche, de miserie e guai
Alfin semo redoti a l'ospeal.

Se sto sogno bestial

El se verificasse, che nol so,
Starassimo pur freschi tuti do!