Tuti va in colera

Tuti va in colera
Che sè crudeli,
El mondo mormora
Che sè infedeli,
Ognun ve biasima,
Ve acusa ognun

Chi de volubili,
Chi de superbe,
Chi ve mortifica
Da dure e acerbe,
E senza radeghi
No gh'è nissun.

Se sè dificili
Ne fè dispeto,
Se tropo facili
Perdè el conceto,
No gh'è giustizia,
No gh'è perdon.

Chi sente i omeni:
La dona è dano,
I sarìa anzoli
Senza sto afano,
Vu d'ogni vizio
Sè l'ocasion.

Donete amabili,
Lassè che i diga,
Vedo che 'l diavolo
Però i castiga,
E che i ve spasema
Atorno ognun,

Sto gran discredito
Però no i sana,
Tute ste smanie
No li alontana,
Con tuto st'odio
No stè a dezun.

Ah chi ve carica
De tante acuse
Da sè medesimi
Vol far le scuse
E 'l proprio biasimo
Giustificar.

Se vu sè cocole,
Se sè amorose,
Se sè inganevoli,
Se sè ambiziose,
Cossa ga i omeni
Da no acusar?

Vorìa anzi vederli
Co sti fracassi,
Se vu altre femene
Vu li tentassi
Con quele smorfie
Che femo a vu.

Credeu che 'l vincerli
Sarìa un gran fato?
Che assae dificile
Sarìa el contrato,
E insuperabile
La so virtù?

Vardè co pessimi
Ch'i è da so posta,
Nissun li stuzzega,
Nissun se acosta,
I è lori el diavolo
Che va a tentar.

Vu sè dolcissime,
Vu le tentae,
E po a sti satiri
Ghe par assae
Se vu sè docili,
Se andè a mancar?

Ma per mi dubito
Che el mondo andasse
(Se la modestia
Vostra mancasse)
In precipizio
Senza più fren;

E che abiè el mento
Che nu no andemo
Come le bestie
A un vizio estremo,
Che un certo spirito
Vostro tratien.