Ti la vedi, Cate mia

Canzonetta per musica


Ti la vedi, Cate mia,
Se son degno de pietà!
Tiro i ochi, e paro proprio
Da le strighe zupegà;

I zenochi me fa giacomo,
Son ridoto un bacalà!
M'astu tolto per quel Ercole
Che gaveva tanto fià?

Te recordistu, Catina,
Quando a ti me son tacà?
Aborisso, ti m'à dito,
Quel che xe bestialità;

Mi son tuta sentimento,
Vogio un cuor per mi formà,
Lo vòi paro come un spechio
Da l'amor divinizà;

Vogio prove, no vòi chiacole,
Ma le vòi de fedeltà;
Gnanca un baso a tradimento
Nessun omo m'à scrocà;

Sarò toa, te lo prometo,
Ma te vogio ben provà...
Cate mia, t'intendo adesso
De che prove ti à parlà.