Teleme e Macari

Xe Teleme una regazza
Tuta brio, tuta vivezza,
Ma ch'è stada sempre avezza
A bramar più del dover;
Ela in tuto la stravede,
Nè mai pase la possede.

Questa amava un regazzoto
Diferente assae d'umor,
Fresco e belo come un fior,
E seren come el bel dì;
Noia e gusto tropo forte
Gera odiai da tu a la morte.

De più dolce del so sono
No se pol imaginarse,
Nè più bel del so svegiarse;
L'è un incanto po fra el dì.
Nome Macari lu ga
E da tuti l'è bramà.

La regazza intolerante
Co secae lo tormentava,
I rimproveri ficcava,
La voleva adorazion;
E lu stufo, disparada
A ridando el l'à lassada.

Come storna la coreva,
Rossa in viso quanto el fogo,
A cercar per ogni logo
L'infedel, ma caro ben,
Che ghe gera un gran tormento
Senza lu star un mumento.

La va subito a la corte,
La dimanda a questo a quelo:
«Aveu visto qua el mio belo?
Ghe xe Macari, el mio amor?»
I soride a sta dimanda
E i se volta d'altra banda.

Un fra lori più compito
Co la ganga de la corte
El ghe dise: «Fia, par sorte,
Sto Macari che cerchè
Xelo un can o un oseleto?
L'aveu perso povareto?»

«Sto bel puto che mi cerco
No ga macola o difeto,
Questo è l'omo più perfeto
Che se possa mai trovar;
Odio mai l'à conossù,
E nissun mai l'a odià lu;

Co bon senso lu ragiona,
Nè sospeto, nè timor,
No l'à mai cambià d'umor,
Nè geloso mai l'è stà.»
«Omenoni de sta sorte,
Cara fia, no vive in corte.»

La va in bota a la cità,
La se imbate in t'un convento;
E la dise: «Pur qua drento,
Me dà el cuor, ch'el sia vegnù.
Quela so tranquilità
Me fa creder ch'el sia qua.»

El prior col colo storto,
Tuto miel e tuto unzion,
El ghe dise: «Xe un pezzon
Che se aspeta sto ben fiol;
Ma per nostra mala sorte
No l'à mai batù a ste porte.

Le visilie, el tempo perso,
La discordia e l'astinenza
De aspetarlo in ricompensa
S'à dovudo soportar.»
Salta suso là a la presta
Un fratin radà la testa:

«Tralassè d'andar atorno
Perchè, fia, se no i me ingana,
No ghe xe tanta bubana
Qua in sta vale d'aflizion;
Tanto bon e tanto belo
Nol pol esser che su in cielo.»

Sto discorso impertinente
Mete in colera Teleme:
«Vegnì qua, padre, ascolteme,
La ghe dise co furor,
Quel che al cuor me fa la guera
Ga da viver qua in sta tera;

Per mi certo lu xe nato,
Che i se averza pur la gola,
Mi ò da esser, sì mi sola,
L'elemento del so cuor.»
«Chi v'insegna a un'altra via
Ve minchiona in fede mia.»

La se parte dal convento,
E la tenta un altro passo;
La lo cerca in tel fracasso,
Fra la crapula, fra el vin;
La ghe pensa suso dopo,
E la dise: «Qua nol topo.

Fra i bei geni de Parigi,
Sì tra quei che l'à depento
Cussì pien de sentimento,
Cussì caro, e cussì bon,
L'à da esser senza falo;
Che se no, dove saralo?»

Un de lori in confidenza:
«Bela puta v'inganè,
El ghe dise, se credè
Che 'l se trovi qua co nu,
Co dei versi el depenzemo,
Ma, ste su, nol conossemo.»

Via la core, e la se trova
Al palazzo del pretesto:
«Leva i ochi e passa presto;
La se dise, qua no ghè
In sto logo abominabile
El mio Macari adorabile.

A stimar che el fusse in corte
No pensava da putela,
Qualche cossa gh'è de bela
Che pol forse lusingar;
Ma nemici soi mortali
Ga da esser i curiali.»

Al gran tempio de Ramò,
Da Melpomene e Talia
Sta regazza la se invia,
E la dise: «Là el sarà;
Ghe xe l'opera da novo
E per certo mi lo trovo.»

Là i la invida a una ceneta
De persone giovialissime
De bon ton, delicatissime,
Che par fate per star ben.
Questa xe la coteria
De la bona compagnia.

Una copia a prima vista
Del so Macari i ghe par,
Ma più i cerca d'imitar
Le so grazie, e parer lu,
Più la i scovre andando avanti
Dal so Macari distanti.

Disparada alfin Teleme
Stufa e stanca de cercarlo,
Senza mai però trovarlo,
La se torna a ritirar
In quel logo, che una volta
Cussì ben l'aveva acolta.

Oh! che caso inaspetato
Xe per ela, oh che dileto!
Trovar Macari al so leto
Che la stava là a aspetar;
Che sorprenderla voleva
Quando manco la credeva.

Co un parlar dolce e soave,
El ghe dise «Mia Teleme,
Vivaremo sempre insieme
Da qua avanti se ti vol,
Ma ti el grilo non aver
De bramar più del dover.

Sarò too se a ti te piase,
Tuto a ti vogio donarme,
Ma no star a domandarme
Più de quel che te voi dar.»
E in sto dir streti i se abrazza
El regazzo e la regazza.

Cossa sia Teleme e Macari
Savarà senza fadiga
Chi sa tolto un po la briga
Lingua greca de studiar,
E in sto emblema vedarì
Quel che a l'omo è destinà.

Ti ti xe, Macari caro,
Quel che sempre nu bramemo,
O che miseri perdemo
Per volerte tropo ben.
Mi za spero de goderte,
E me par de possederte,

Ma de dirlo assae me vardo,
Che se averlo alcun se vanta
Dal so sen l'invidia el schianta,
Lo fa gramo deventar;
Che per goder tanto ben
Saver sconderse convien.