Sonetto finale di Pantalone tutore

Mi tutor no son stà de quella razza
Che scortega e tradisce i so pupili;
Che a forza de pretesti e de cavili
In tel sangue innocente i se sbabazza.

Oh quanti ghe ne xe che magna e sguazza,
In materia d'onor poco sutili:
Ma al strenzer de le strope, oh quanti stili!
No i sa quel che i se diga o che i se fazza.

Manizar bezzi el xe un mistier che piase,
Ma la roba dei altri scota e brusa,
E mai col cuor no la se gode in pase.

Tutori, no stè a far quel che se usa:
Perché se adesso la conscienza tase,
Un dì no gh'averè tempo, nè scusa.