Sior omo generoso

Sior omo generoso,
El cuor vu me offerì?
Cossa m'importa a mi
De sto regalo?
Co no gh'avè de meggio
Con mi per farve onor,
Tolè sto mio conseggio,
No stè a parlar d'amor.
Tegnivelo, godevelo,
Salvevelo, pettevelo,
Sior generoso, el cuor.

El cuor val un tesoro,
Lo so che me dirè,
Ma pochi ghe ne xe
Che sia sinceri.
No sta in te le parole
El merito maggior:
Ghe xe delle cariole
Che gh'ha un bell'esterior.
Tegnivelo, godevelo,
Salvevelo, pettevelo,
Che mi no credo al cuor.

La xe una bella prova
Per dir che se vol ben,
Quando che zo se vien
Coi regaletti.
La xe una cossa equivoca
Sto dir: ve porto amor;
Ma penetra le viscere
Dell'oro el bel splendor.
Tegnivelo, godevelo,
Salvevelo, pettevelo,
Che no ve vedo el cuor.

No l'è certo interesse
Quello che parla in mi;
Me fa pensar cussì
L'usanza sola.
Se a vu no se ve crede,
No, no ve fè stupor,
Ché se cognosse e vede
Dall'opere l'amor.
Tegnivelo, godevelo,
Salvevelo, pettevelo,
Senza le prove, el cuor.