Sibinön u no sibinön?

From Wikisource
Jump to navigation Jump to search
OKOPÜKOT HAMLET'A.


Sibinön, u no sibinön, atos binon el säk:
Va lan binom umo nobik if dasufom
Jedis e sagitis fäda lejekikün,
Ud if vafom oki ta töbs so gletik äs mel,
E finom omis tadunölo? - Deilön, - slipön, -
No sibinön; e lesagön, das slipölo finon
Doli lada gliföl, e jokis at mil natik
Kelis menad gelütom, - binos ga lefulot
Pövipöl relugiko[1] fa mens. Deilön, - slipön; -
Slipön! e ba dlimön; - si, atos binon fikul;
Bi dlims kels du deil sliplik ba okömoms,
Ven udelemufobs kompligi at menik,
Mutoms stöpön obis: tefam iet binom,
Kel lifi tu lonedik mekom neleläbik:
Bi kim vilomöv sufön flapis e nestimis tima,
Dämis lepedela, bolöti mena pleidik,
Tomis löfa panestimöl, zogi lona,
Nejemöfi löpalas, e fejokis stutik,
Kelis melid sufädik getom de mens nedigik,
Do om it takedi kanom givön oke
Me däg teik? Kim lodis vilomöv polön,
Hagöl e suetöl dis töb lifa fenik;
Pläsif lejek dö bos ojenöl ba pos deil,
Län at nepesevik, deü mieds kela
" Tävel nonik gevegom, vili obas kofudom;
Kodöl obis sufön liedis at plisenik,
Bufo al votikos nepesevik spidön?
Also konsien mekom obis valik temipäbis;
Ed also logodaköl natik sluduga fümik
Getom jini malädik sukü neled süenama;
E beginams valüdik e levemo veütik
Kodü tefam löpnik, flekoms leflumis okas,
E no rivoms nemi “dunams.”



Fa SHAKSPERE, poedal nelijänik.




NOETS.

  1. Relug (reläd) = divod kolü rel.




Se Kosmopolan 1894, Nüm: 18, Pad: 196.