Sgra thal ’gyur (A-'dzom blocks)

From Wikisource
(Redirected from Sgra thal ’gyur)
Jump to navigation Jump to search

@1
1
rin po che 'byung bar byed pa sgra thal 'gyur chen po'i rgyud ces bya ba bzhugs
2
rgya gar skad du
bod skad du
rin po che 'byung bar byed pa sgra thal 'gyur chen po'i rgyud ces bya ba
bcom ldan 'das rang byung chen po mchog gi ston pa
dpal kun tu bzang po la phyag 'tshal lo
'di skad bdag gis thos pa'i dus gcig na
'khor dang 'das pa'i thog mar ni
rang byung byas pa med pa las
3
'byung ba 'dus pa'i phung por shar
sa chu me rlung 'byung ba bzhi
dbus su rlung sems rgyu dang rkyen
'dus shing bskyed pa'i gzhal med khang
rang byung rig pas bcos pa med
'khrul pa yongs su dag pa la
bde chen 'dus pa'i thabs kyi 'khor
sku dang ye shes shes rab rlung
mi phyed sna tshogs dmigs med pas
rtsa rlung thabs kyi bde chen chos
so so'i nyams dang mthun par bshad
'das dang ma 'ongs da ltar med
4
mi phyed 'byed pa yongs su med
thams cad rang byung ye shes so
'di skad bdag gis thos pa'i dus gcig na
dga' dang ldan pa bsod nams brtsegs
'gro ba rnams kyi thog ma'i yul
sa dang chu dang me rlung gi
'byung ba chen po bzhi mi snang
sha khrag bkod pa'i gzugs med pa'i
rang snang dag pa chen po'i yul
rab tu mdzes shing rgyas pa yi
pad ma'i ze'u 'bru rdzogs pa'i grangs
stong dang ldan pa dbus ma'i gnas
yon tan thams cad rdzogs pa yi
rkyen bzhis smin pa'i gzugs kyi sku
brdzus nas skyes pa'i lus blangs te
ston pa sangs rgyas bcom ldan 'das
lo brgyad mdzes pa'i gzugs su sprul
gzigs stangs gsum las ston pa'i sku
snang ba'i 'od ni bsam mi khyab
sprul pa mdzad pa dang por byung
rgyud 'byung gleng gzhi dang po la
lnga po rnams kyi sa bon 'dzin
gdul bya brdzus nas skyes pa la
kha dog dkar zhing sha gzugs bral
5
zang thal dri ma med pa'i sku
nyon mongs rags pa rang dag ste
bag la nyal ba ma yin pas
mngon par rgyu ba rnam gnyis bral
dbang po lnga ni rang gsal la
mtshan ma rnams ni sbubs su nub
dbugs la brten pa'i 'gro 'ong zad
bar snang dag la gnas bcas nas
phan tshun 'khor dang langs par byed
'gro dang 'greng dang nyal ba dang
bskyod cing rgyug pa'i rnam pa rnams
bar snang nyid las gzhan ci min
rang las 'od byung snang ba las
nyi zla la sogs 'od mi snang
gos med 'jam pa'i ngang tshul can
mdzes shing ldem bag ldan pa la
bag yangs rnam shes gud med par
bsam gtan dang por gnas pa bzhin
mngon du bya dang byed pa bral
gzugs med las kyi 'gyur byed ltar
khams dang gud bcas las mi snang
khyad par snying po'i pad ma las
stong dang rtsa gcig gzugs rnams ni
'ja' tshon sgyu ma ji bzhin du
sangs rgyas rnams kyi gzugs sku'o
6
de yi khyad par ston pa'i gzugs
ris can 'od zer dpag tu med
nga ni lta bu dga' byed ste
dbang phyug rdzogs pa'i lus blangs nas
ston pa'i gsung gi 'od zer khyim
rang bzhin gyis ni bde bas rnyed
de tshe mdzad pa'i byin rlabs las
drug cu rtsa bzhi'i 'od skar ni
bar snang nyid las gzugs bkod par
sus kyang byas pa med par snang
khyad par yang zhun bcu bdun ni
bstan pa dam pa rdzogs pa'i phyir
sku gsung thugs kyi bstan pa dngos
rdo rje bcas dang sku gzugs ni
sus kyang byas pa ma yin par
ye thog nas ni rang snang bar
so so'i las dang skal mthun par
gser gyi snying po nyid la snang
kun dang lhan cig ma yin no
des na snying dang 'dra bas gsang
dngos grub mchog rnams mthar thug pa'i
'bad cing rtsol ba ma yin pas
gang su 'phrad pa grol bar nges
des na rdzogs chen bya rtsol bral
gzhan 'bad pa las byung ba min
sangs rgyas brjod du med pa yis
7
ye thog nas ni phyag mdzad pa'i
chos kyi sku la nges brgyud de
las can snang bar byed don du
sprul pa'i sa bon ldang ba'o
de ltar dngos kyi bstan pa las
gzugs brnyan cho 'phrul 'di lta bu
sus kyang brjod du med par ni
nam mkha' mi 'byed bar snang las
tshig rnams kun gyi thog mar yang
dgu gnyis bzhi yi yang steng nas
tshangs pa chen po'i dbyangs su bsgrags
de nas chos nyid nam mkha' las
khyab 'jug chen po'i gsung gis ni
byin gyis rlabs kyis rang sgrar ston
de nas phyogs bral nam mkha' las
ka la ping ka'i sgra dbyangs las
bstan pa kun gyi bcud bsdus pa'i
rgyud kyi rgyal po 'di nyid ni
tshig rnams kun gyi thog mar yang
brgya phrag gsum dang drug cu yi
sgra las drangs te ston pas gsungs
de nas 'byung ba so so'i sgra
byed rgyu tsha dang grang ba las
so so'i sgra dbyangs stong phrag brgyad
ston pas byin gyis brlabs par snang
8
khyad par 'byed rgyu'i gsung la yang
sgra tshig rnams ni 'byung ba'i gzhi
yan lag drug cur ston pas kyang
rang snang 'dus pa'i 'khor la gsungs
de yang dgongs pa ci zhe na
gsung tshul dgongs pa gsum dang bcas
gnyen po bsdus dang dbang po'i don
tshig rnams bsdus te snang bar byas
de ma yin pa'i brjod bya'i tshig
dus gsum 'byung bas gsung pa med
sgra tshig ming la res bsdus pas
ka la ping ka'i sgra rnams kyang
'dren dang 'jug dang snyan pa'i phyir
gsal byed sgra don bcu gnyis las
brjod tshig bzhi 'am lngar bsdus so
ston pa'i gsung la nges bsdus pas
tshangs pa'i dbyangs la stong dang lnga
nges pa'i brjod byed brgya dang gsum
ring byed sum cur nges par bsdus
de la gsal byed bcu drug go
rtogs sangs yan lag drug cu gnyis
spros med yan lag bzhi bcu gnyis
khyad par bsdus pa'i rigs gnyis ni
sgra dang tshig gi gzhi ma'o
de yi dgongs pa ci zhe na
so so'i las kyi 'phrul gyis kyang
9
bslab bya'i rtsa ba bcu bzhi gnyis
ri mo rnams la mkhas pa yis
sprul pa la sogs 'byin pa dang
rtag tu dgod pa'i don rnams shes
de ltar gsungs pa'i cho 'phrul du
rgyud rnams kun gyi thog mar yang
rtsa ba'i sgra tshig thal 'gyur las
thams cad nges 'byung bstan par 'phros
bstan pa dam pa'i 'du mched grub
gsungs pas 'khor ba nub par byed
'di la yon tan bsam 'das so
sprul pa'i bstan pa thog mar ni
'di 'byung bas ni 'phel ba'o
lus kun brdzus pa'i thog ma'i tshe
tshe lo dpag tu med dus su
brdzus nas skyes pa'i 'gro ba la
mi 'byed rang bzhin rnam dag pa
thams cad ngo bo dbyer med par
brjod cing sgra tshig bde rig ste
chos kyi sku yang rgyu med pa
longs sku brdal ba kun khyab par
sprul sku spros gzhi rdzogs pa las
dbyer mi phyed pas snyoms zhugs te
rang bzhin rdzogs pa chen po yi
dkyil 'khor gcig tu thabs cig 'khod
10
de ltar ngang gcig dbyer med do
de nas gcig dang tha mi dad
rang bzhin dag pa'i 'khor rnams las
lha dbang gis ni 'di skad gsol
e ma kye kye bcom ldan 'das
'di ltar snang ba dam pa nyid
bsam gyis mi khyab 'dus pa yi
tshig gi rang bzhin 'di lta ste
'byung bzhi'i dgongs pa ji lta bu
yan lag don kun ci ltar gnyer
de yi dgongs don ci lta bu
sgra yi brjod pa ci tsam zhig
thal ba'i gnas ni du tsam mchis
'gyur dang 'gyur byed gang dang gang
le'u rjod byed gsal ba ci
rdzogs pa 'di la 'dod pa su
gleng gzhi 'byung ba ci yi don
lhag ma'i bstan pa du dang du
'jigs pa'i rgyu ni ci las 'byung
zhig nas gnas pa gang nas byung
bar du su dang su yis 'dzin
tha ma 'di nyid gang du 'gyur
lus dang yan lag ci lta bu
'byung ba rnams kyi 'dod pa ci
11
sems can dus kyi rim pa gang
phyi rol nang dang don ni ci
dus kyi 'pho ba gang dang gang
zhag dang zla ba lo rnams ci
tshe dang dbang thang gang gis gzungs
byer zug snyoms pa'i mtha' cir 'gyur
'khor ba'i lam rgyud gang gis bcad
ston pa'i yon tan gang gis bsgrub
sku gsum ngo bo ci ltar bslab
thun mong las kyi mtha' gang lags
bye brag sku rnams ci ltar 'grub
gnyid dang rmi lam ci lta bu
sems 'dul bsgom pa gang la bgyi
rlung zhes bgyi ba'i dgongs pa gang
rtsa yi yon tan ci tsam mchis
de bzhin thig le'i rnam pa ci
mkha' 'gro ma yi las mtha' gang
'pho ba'i rnam pa'i las gang lags
rten cing 'brel pa ci yi rgyu
nad dang sdug bsngal gang gis grol
'byung ba'i 'pho lugs ji ltar lags
gnad kyi 'byung ba gang dang gang
rtsis sbyor las kyi yan lag ci
'byung ba'i bde ba gang gis 'grub
spo ba'i las ni gang gis bgyis
12
rig bcas bem po'i bye brag gang
gnad rnams rang bzlog thabs gang lags
grub mtha' dgongs pa gang gis 'grub
mthar thug pa la dgongs pa gang
bsgrub pa'i rim pa du zhig mchis
gnas lugs rnams kyi 'dug tshul ci
'khrul pa'i rtsis rnams ci ltar bzungs
shes bya'i spros pa gang gis bcad
bla ma bsten pa'i thabs gang lags
phyi rol 'byung rtags gang gis 'dzin
dus dang bstan pa'i bab so ci
dbang bskur pa yi cho ga gang
dam tshig sdom pa ci lta bu
brjod bya tshig gis bstan pa ci
tshig 'das spros pa gang gis bcad
mngon sum gnad la ci ltar bsgre
'khor 'das ru shan gang gis phyed
rlung 'dzin spyod pa rnam pa du
sems 'dzin bslab rim gang tsam zhig
phyi nang gsang ba'i 'chi rtags ci
lta ba mtha' la gang gis bskyal
bsgom pa'i srog shing gang dang gang
spyod pa'i sbyor pa ji lta bu
'bras bu'i thob sa gang tsam zhig
'khor ba'i chu rgyun ci yis gcod
13
bcud kyis len pa ji lta bu
gos ni gang gis 'grub pa lags
'byung ba'i rgyun ni ci ltar gcad
bzhi po ro rnams ci yis snyoms
mdzod la yon tan ci ltar 'byung
'phags pa'i rdzu 'phrul ci yis 'grub
gter la longs spyod ci ltar bgyi
gzhi lnga dbang du gang gis 'dus
'di dag bdag gis sngar ma 'tshal
snang ba'i bdag pos bdag la gsung
bdag la rim pa gsal phye bas
ma 'ongs pa yi dus rnams su
'di la dad cing 'dun pa kun
rdzogs chen 'di la yid ches nas
bya bral glen pas bde chen rnyed
'khor ba'i tha ma zad nas ni
mya ngan 'das pa'i lam sna zin
de phyir bdag gis ci zhus pa
rim pa gsal bar phyes la gsung
de nas khyab bdag sems dpa' ni
sgra tshig ming du ma bsgrags kyang
rang bzhin bcos med nam mkha' la
bris zhing bkod pa ma yin par
yan lag drug cu'i dbyangs ldan te
14
ma bris ri mo'i tshul tsam du
mdangs dang ldan pa'i dbang po la
nges par snang ste mngon sum pa'o
tshangs pa chen po'i sgra la yang
in dra lha yi dbang phyug nyon
lus dang ngag yid rab gtser bas
log pa'i spyod dang bsam spangs te
dbang po la sogs dag byas nas
dri ma spangs pa'i sems kyis nyon
e ma ngo mtshar rmad byung ba
sangs rgyas rnams kyis ma gsungs pa
rgyud gzhan las ni khyad 'phags 'di
khams gsum gnas su mi ldog phyir
rab tu gsang chen nges pa'i bka'
bstan pa'i snying po 'phel don du
theg pa'i yang rab rtse mo ste
chos kyi me long don gyis sdud
bka' yi 'grel pa man ngag snying
rang bzhin gsang ba rdzogs pa che
snying gi ti ka lung gi mig
yang gsang lde mig blta ba'i phugs
spyod pa'i sbyang sa bsgom pa'i gnad
mngal gyi rgyun gcod ngan song phyag
gsang ba mchog gi rgyud bshad kyis
rdo rje yang 'dzin 'khor rnams nyon
nga yi spros pa'i tshig rnams la
15
'khrul pa'i rdul gyi cha med pas
'di nas bstan pa'i chos rnams la
nges par grub cing don 'byung bas
the tshom med par 'bras bu 'phyin
des na bstan pa'i snying po bstan
kye kye dga' bar byed pas zung
dris pa'i tshig rnams gsal phye pas
khyab 'jug gis ni skad dag las
yi ge'i rnam sprul 'di lta bu
rang bzhin bcos med nam mkha' la
ma bkod tshig rnams rang byung bar
dris dang lan gyi tshul du snang
ngang gzhi bab kyis grub pa yi
tshig byung gzhi la 'di ltar snang
'byung ba'i dgos pa 'di lta ste
chu ni dangs ma sdud pa dang
snyigs ma rnams ni 'byed pa'i sa
so so'i lus la byed pas na
dgos pa tshad dang grangs ngo shes
sas ni gzhi ma 'dzin pa dang
grub cing chags pa'i las rnams byed
smin pas rtsa la sogs pa bskyed
dgos pa kun rdzob thig ler shes
mes ni 'byung ba sel ba dang
smin cing gsal ba'i las rnams byed
16
'bar zhing mched pas mig sogs bskyed
dgos pa drod rnams shes par byed
rlung gis stongs dang 'degs pa dang
bskyod cing g.yo ba'i las rnams byed
'gul zhing 'phrig pas lus 'dzin cing
dgos pa sems kyi gnas pa shes
'byung bzhi dag gi dkyil 'khor che
lus sogs grub pa'i rgyu byas te
bar du gnas shing 'dzin pa byas
tha ma 'jig pa'i las kun byed
'byung ba chen po rgyu gcig pas
sna tshogs byed pa'i bdag por snang
des na dgos pa rang dang gzhan
bya ba rdzogs pa'i don la mkhas
yan lag don ni 'di lta bu
sangs rgyas rnams kyi mkhyen pa yi
tshig brjod gsal ba'i rim pa ni
mtshan bstan pa dang gzhung gis kyang
rim dang cig char blo rnams kyi
rtogs par bya phyir rnam bshad pa'o
gzhung la rnam pa gnyis su bstan
lus nyid rnam par gzhag pa dang
yan lag don gyis rgyas par dbye
lus ni gleng gzhi rnam pa gnyis
gzhan las khyad par 'phags don du
17
thun mong min pa'i lus la sbyar
theg gzhan rnams dang sgo bstun phyir
thun mong dag gi gleng gzhi yis
sdud pa rang gi 'khor rnams la
yid ches bya phyir bstan pa ste
'dul gzhi las ni 'dul byed du
byung bas bstan pa gnas par byed
yan lag dpe dang tshig don no
le'u grangs drug gis gzhung nyid las
ci ltar gnas pa'i tshig don ni
lus kyi khog pa phye ba ltar
don snod la sogs snang bar ston
tshig gi don la rnam pa gnyis
dris dang lan du gsungs pa'o
lan gnyis mdo dang rgyas pa bshad
'dul yul gang zag mos don du
sna tshogs spros pa don yin no
e ma rgyud dag nges 'byung ba
dgongs pa rnam pa gnyis yin te
rig pa rang snang blo can la
rgyud kyi mtshan don rnam phye ste
brda dang sgra dang don gsum gyis
chos nyid mngon sum lam byas te
khams gsum 'khor ba'i rgyun bcad nas
phyi phyir ldog pa med pa yis
zad pa'i mtshan nyid shes pa'o
dmigs pas yul kyi blo rnams la
18
rgyud kyi gzhung rnams rnam phye ste
gang la gang mos nges pa'i gnad
re re dag la gnad btsugs nas
'bral ba med par yongs rtogs na
'khor ba dag la gnas pa min
spros pa nyid la dga' ba'i mis
sna tshogs thabs la bslab gyur nas
des kyang so so'i bsgrub pa snyems
dgongs pa'i gnad don man ngag ni
so so'i skabs dang shes par bya'o
rgyud kyi rgyal po 'di nyid kyis
nges pa'i mtshan gyi rnam grangs la
bstan nas rdzogs don man ngag ni
tshig tsam nges par brtags phye ste
'bru rnams don dang mthun par yang
don gyi ngo la 'di ltar skyel
sgra yi brjod pa 'di lta bu
rgyud rnams gzhan du ma bshad pas
e ma ngo mtshar che ba nyid
nga yi spro yis nga la nyon
sgra yi bab so rnam pa lnga
tshangs dang khyab 'jug ping ka dang
'byung ba'i sgra dang ston pa'i gsungs
lnga yis 'byung ba'i chos rnams la
ci dgar rol pa chen por spyad
tshangs pa'i gnas ni lnga po la
re re dag la brgya phrag gnyis
19
gnas gzhan byed pa re re ste
stong dang gnas gzhan lnga yin pas
'di nyid shes pa tsam gyis ni
bcom ldan 'das la reg par sbyor
khyab 'jug gis ni gnas gzhan las
gnyis dang lnga dang drug gsum gyis
zur phud phyed pa'i las kyi rgyu
mtshan ldan sdom pa rdzogs pa la
de dag nyid la brgya brgya ste
nges 'byed 'phrul gyi rnam pa las
grangs de de yis brjod shes na
rgyud du mngon par shes pa 'grub
ping ka la yi sgra dbyangs kyis
lus la brgya dang nyi shu la
de bzhin ngag dang sems la yang
gong ma tsam ste nges brjod gsungs
'jig rten pa yi lha rnams dang
de bzhin 'das pa'i lha dag dang
mkha' 'gro ma rnams 'dus pa yis
sgra yi bye brag rnam shes na
de rnams skad ni shes pa dang
mngon shes drug la nges spyad na
bde gshegs bka' yi don rnams shes
tshigs su bcad pa'i grangs kyis su
so sor gnas dang nges par sbyor
de nas chu yi sgra la yang
20
snyan brjod gsung ni bsam mi khyab
mkhas pas cho ga rdzogs pa'o
'byung ba rnams kyi sgra don ni
dpa' dang dpa' bar 'gro ba yis
sa chu me rlung bzhi dag la
re re la yang gnyis gnyis te
gcig ni ma ning stong pas na
pho dang mo yi khyad par las
tsha dang grang ba'i byed rgyu can
stong phrag dag ni gnyis gnyis las
brjod cing brtags pa'i sgra rnams ni
rnal 'byor pa yis brjod shes na
de dag kun gyi skad la yang
bde legs su ni nyan par spro
de nyid su yis nges 'byongs pa
rigs drug la yang nges par sbyor
dus dang bcas te mngon snang ba'o
'das dang ma 'ongs da ltar gyi
ston pa sangs rgyas bcom ldan 'das
dbyangs gcig gis ni dkyil 'khor du
skal pa can gyi snang ba la
dbang po drug gi rnam dag pas
bcu bcu yi ni sku gsum las
khyad par sprul pa'i sku las 'phros
'phros pa yi ni zer tsam gyis
rnal 'byor rtog pa'i chu rgyun 'gags
gnas dang 'byed dang gnas bcud yul
21
thob cing mthong rtogs nges 'jug pa'o
de ltar sgra yi dgos pa ni
rnam pa gnyis su shes bya ste
mchog dang thun mong pa dag gi
las can so so'i nges 'byed 'phrul
mchog la sku lnga mngon par 'grub
de ltar grub pa'i rtags bcu yis
rdo rje 'chang gi lus dang mnyam
'di la yon tan brjod mi langs
chos dang chos kyi dbyings nyid dang
gzhi dang lam dang 'bras bu la
bde bar rol pa nyid yin no
thun mong gyur pa'i dgos pa ni
sgra tshad rig pa'i bstan chos dang
bzo dang sgyu rtsal sna tshogs dang
'phongs dang ma sbyangs las rnams 'grub
'byung ba lnga la spyod nus dang
mtshon dang dug las rgyal ba dang
bem dang rig bcas sgra rnams dang
brda' dang tha snyad la mkhas 'gyur
mdor na dgos pa'i bstan bcos dang
bka' yi mtshan nyid shes par 'gyur
sman dang rtsi sbyor bye brag 'byed
thal yig phul du phyin pa dang
'jig rten sbyor ba lhun gyis grub
sgra don de ltar dgos pa 'grub
22
rgyud la nges pa'i 'phrul 'byed phye
thal ba'i gnas ni rnam pa brgyad
'jig rten khams dang zhing khams dang
dam bca' skyon dang skyon gnas dang
'phen pa'i las dang sbyor ba dang
grags dang song ba'i gnad dang brgyad
'di rnams thal ba'i gnas su 'dod
'jig rten khams ni chags pa dang
gnas pa nyid dang 'jig pa'i dus
stong pa nyid dang rgyu dang rkyen
grub tshul dang ni grangs tshad do
zhing khams rnam pa bcu gsum la
'di nas 'jig rten 'og na ni
thal ba'i dbyangs zhes bya ba'i yul
rgya khyon dpag dka' rab tu mdzes
rgyu dang rkyen dang rang bzhin dang
ston pa'i bstan pa de yi 'khor
steng dang 'og dang phyogs mtshams su
chu zhing nyams dga' bkod legs spras
de nas 'jig rten drug 'og tu
thal ba 'dzin zhes bya ba ni
'khor lo'i dbyibs la zang thal lo
ston pa'i bstan pa bden pa nyid
spras legs bkod pa gnyis pa'o
'di nas 'jig rten gsum g.yas na
thal ba skyob ces bya ba ni
23
ma rgad ngag gis yongs spras pa
'od dang kha dog nges gsal zhing
ston pa'i bstan pa 'dul ba'i zhing
so so'i las dang mtshan bcas pa'o
de nas 'jig rten drug gi steng
thal ba brdal zhes bya ba ni
pad ma rgyas pa'i dbyibs 'dra ba
shin tu brdal ba khod snyoms pa
sna tshogs 'od 'bar kha dog ni
dkar dmar snang ba 'khrugs pa las
rags pa'i gzugs brnyan snang ba min
ston pa'i bstan pa 'du mched rgyas
bskal pa rdzogs pas thal zhes bya'o
'di nas 'jig rten steng du yang
bcu dgu 'das pa'i yang steng na
thal ba'i be con zhes bya ba
rab tu rdzogs te nyams dga' bar
rin chen sil ma sna tshogs pas
nges par spras te spungs pa'i tshul
ston pa'i bstan pa rdzogs gnyis ldan
thod pa'i phreng ba bkod pa'o
'di nas 'jig rten byang shar mtshams
thal ba'i rgyun zhes bya ba ni
mchod rten dbyibs 'dra bang rim mdzes
bkod pa lnga yis yongs su spras
24
sgra dbyangs sna tshogs 'byung ba'i gzhi
ston pa'i bstan pa dus 'byung nges
de steng nyi shu rtsa gcig na
rab tu thal bas khyab ces bya
dmigs pa dag pa'i rang bzhin du
phyi dang nang med zang thal snang
ston pa'i bstan pa 'byung bar ston
byed pa'i rgyu rkyen khyab 'jug go
'di nas 'jig rten lho shar g.yon
'jig rten khams ni drug 'das na
thal ba'i sgra zhes bya ba yi
skyod byed 'phan gyis rab tu bklubs
rgyal mtshan gdugs la sogs pa bsgreng
me tog sil ma'i char dang dri
ston pa nyid dang bstan pa la
mdzes byed gzugs brnyan tshogs kyis bskor
bde ba'i rol pa 'byung ba'o
'di nas 'jig rten lho nub g.yas
drug 'das 'og na thal ba'i rlung
g.yo zhing spyod pa bar snang la
phan tshun g.yo zhing lding ba dang
bskyod pa las ni sgra rnams 'byung
ston pa'i bstan pa rlung gis g.yo
lnga ldan 'jug pa gsum yin no
de steng bcu gsum brtsegs pa na
rin chen thal ba zhes bya na
bkra shis nyi ma rnams kyis spras
25
'dod pa'i yon tan rnams kyis brgyan
'phrul gyi ri mo yi ge mdzes
ston pa'i bstan pa gzugs brnyan rdzogs
lda ldi pad ma'i spyan gyis mdzes
'di nas nub byang mtshams kyi steng
'jig rten khams ni drug pa na
'du ba'i thal ba zhes bya ba
mchod pa rdzogs pa'i lha mor bcas
'od kyis khengs shing tsan dan dri
ston pa'i bstan pa cha mnyam pa
bcu drug lo ldan mdzes pa'i gzugs
rab tu bzhon pa rnams kyis bskor
de 'og 'jig rten dgu pa na
dung ldan thal ba'i lha zhes pa
dad cing bsung pa'i dri yis myos
'khyug cing rab tu 'bar ba'i 'od
rab tu mer mer po yis 'khrigs
ston pa nyid dang bstan pa dang
de yi 'khor dang longs spyod rdzogs
'di nas 'jig rten drug pa na
skar ma'i thal ba zhes bya ba
'khor lo brtsegs pa'i rnam pa ni
lnga dang dgu yis yongs su brtsegs
'char kha chun 'phyang rnams kyis brgyan
'brug sgrogs glog dmar lce rnams 'byin
ston pa'i bstan pa lung gis bskor
26
'od 'byung phreng ba klu yi gdong
phyogs dang mtshams kun gsal ba'o
rang dang gzhan gyi dam bca'i tshig
rang gi tshig gis nges bsal te
rang 'dod nges par skyol ba ni
lung dang rigs pa man ngag gis
skyon bsal bsgrub dang 'gal pa spang
skyon gsum spangs te the tshom bsal
gtan tshigs bzhi dang dam bca' blangs
gnas pa'i mkhar bzung zur la bros
phyogs bzhi dbus su 'khor lo bri
phyogs bral gtan tshigs bsgrub bya'o
gzhan la thal ba'i nges 'jug rtsod
dam bcas bsgrub bya gtan tshigs la
gsum gsum dag gi 'phen pas bskor
mkhas pas mtshan nyid rdzogs gis sbyar
rang gzhan grub pa'i brjod bya'o
skyon ni rang dang gzhan gnyis las
rang skyon rang gis shes byas la
dam bcas gtan tshigs bsgrub bya ni
so so'i skyon rnams ngos bzung ste
yon tan rnams ni rdzogs par bya'o
gzhan gyi yon tan shes byas la
de yi skyon rnams mkhas pas brtags
27
sgra don brjod bya'i tshig tsam las
'brel dang 'brel med mtshan nyid kyis
khyab bya'i don rnams thal 'gyur brtsi'o
'phen la rlung ste 'pho ba'i las
tshig dang zur la gzhon pa dang
gtan tshigs 'khor lo 'og dang steng
log dang zur la 'bigs par byed
chos can chos nyid tshul dag gis
gnyis gnyis 'jug pas 'phen par byed
rlung gis kyang ni nyon mongs 'phen
ma dag pa yis ye shes so
sbyor ba'i dmigs kyis rang 'dod bskyang
chos can dam bca' gtan tshigs dang
de yis mtshon te sbyor ba gcig
chos can 'brel pa yul gyis shes
dam bca' skyon ni brtags te bca'
gtan tshigs dag gis 'brel don brtsis
dpes ni snang ba'i chos rnams grub
grub mtha' blo la brten pa yis
rang gzhan shes pa'i rtsal gyis so
grags pa dag gis thal 'gyur te
bya ba'i las dang dpyad rnams dang
tshig dang rtogs pa tha dad dang
28
rgyu rkyen smin so sna tshogs te
'gro bar 'dod dang song ba dang
bye brag 'brel so tha dad pa'i
song ba zhes bya yul rnams dang
lam dang gnas te tshig dang 'jug
dran pa dngos dang dngos po med
gnas dang byung dang byed pa dang
ldog bcas lam dang ldog med lam
bskubs pa rnams dang sgrub par byed
bya byed rgyu rnams de dag go
rgyu mtshan nges pa'i mthar sdud ni
'gyur ni 'byung ba'i cho 'phrul gyis
nam zla dus kyis 'gyur bas na
rnal 'byor nyams dang shes pa yang
'gyur ba'i dus tshod mkhas pas bzung
rlung me sa chu'i 'gros kyis ni
me rlung sa chu bzhi gnyis 'khor
sa rlung chu me 'gyur byed gnyis
rlung sa me chu cha lnga las
'gyur zhing byed pa lus kyi gzhi
stong pa'i gnas te brgyad yin no
'gyur bar byed pa'i shes pa'i rtsal
'phro dang 'khyil dang mched pa dang
'dus dang rtags te 'di rnams la
'dren cing gnas pa 'gyur byed la
rlung rlung sa sa me me chu
gcig gi byed pa bcu drug las
29
khyab dang 'jug dang gnas byed bsrungs
lung sdeb ya sdeb sdom gcig pa
dpa' bar byed pa'i 'gyur byed do
le'u brjod gnyis kyang gsal phye na
sna tshogs bkod pa man ngag gnas
nges par 'byung 'gyur dang po la
gzhi ste ma 'ongs nges par ston
gleng gzhir bcas pas gzhi bzung ste
gnad 'dus bkod pa sems kyi rten
rang thog 'bebs pa gnyis pa yin
bka' gsang 'byung bas 'gyur tshad ston
gsum pa ye shes bkod pa la
sgra brda' mtshon pa'i gzhi ma ston
bzhi pa chos nyid bkod pa la
yon tan rdzogs pa'i sems nyid lung
lnga pa blta bsgom bkod pa ste
bya bral rdzogs pa dbyings kyi gnad
drug pa sku rnams bkod pa ste
yon tan rdzogs pa gsang ba'i gzhi
de ltar drug gis sku gsum gyi
'bras bu thob pa de dag go
tshad bstan le'u gyur dag shes
dbal gyi dgongs pa 'byung ba'i gter
bde ba thabs kyi sku nyid kyang
lung bstan rjes 'dzin sems kyi gnad
30
'gro ba bdag skyob rlung gi lha
lhag ma nyid kyang de tsam mo
rdzogs pa zhes ni bshad pa la
zhen pa rang grol bstan pa'i tshig
gzhung la lhag chad med pa dang
don la 'khrul pa med par rdzogs
bshad pa tha snyad tshig dang bral
rigs byed rdzogs pa'i rnam pa las
'gro ba drug gi skad rnams dang
brda' yi 'jug pa thams cad snang
so so'i nus pas bsgyur ba gang
rang bzhin rdzogs pas rdzogs pa che
snang stong 'byed pa'i rdzogs pa ni
gzhung gi tshig don gsal phye nas
lhag ma med par yongs su rdzogs
gzhi nyid 'gyur ba med par rdzogs
lam ni drang zhing nye bar rdzogs
'bras bu byar med ngang du rdzogs
blta bsgom bya bral chen por rdzogs
dbang dang dam tshig sdom pa rdzogs
mdor na thams cad rdzogs pa'o
gleng gzhi dag la yang dag tshig
gdul bya gang zag so so la
gdul gzhi phung po rnam pa lnga
de yi 'dul byed gleng gzhi ste
31
gleng ba tshig la brjod pa gsungs
gzhi ni rnam pa lnga yin te
gnas ni rnam pa gsum du 'dod
phun zhes bya ba 'dus pa la
gsum ni grangs te 'char byed do
tshogs pa yon tan rdzogs pa'o
ston pa nyid kyang gsum yin te
phun zhes bya ba skur rdzogs pas
gsum ni sku gsum 'char byed la
tshogs pas 'khor rnams sdud byed do
'khor kyang rnam pa gsum yin te
phun zhes bya ba gzugs su bkod
gsum ni grangs te sna tshogs 'dus
tshogs pas dad cing 'dus pa'o
bstan pa nyid kyang gsum yin te
phun zhes bya ba yang snying bcud
gsum ni sde snod rin po che
tshogs pas gang zag grol ba'o
dus kyang gsum la bzhi 'dus pas
phun zhes theg pa kun rdzogs te
gsum ni 'das dang da lta phyis
tshogs pa nges par rdzogs pa'o
thun mong min pas khyad par te
theg pa kun las 'phags pa'i rtags
bcud rnams snying por bsdus pa ste
ston pas gsung gis 'khor la bstan
32
ngo mtshar mchog 'dus bstan pa'i gtso
thun mong gleng gzhi'i rgyu dang rkyen
gzhan dang lung tsam sgo mthun phyir
thun mong pa zhes grags pa'o
'di ltar bstan pa 'di nyid la
lhag ma'i bstan pa 'di lta bu
dus kyi nges par phye ba bshad
snying po ldan dang rdzogs ldan dang
rdzogs ldan dag ni chen po dang
de bzhin gsum dang gnyis ldan dang
rtsod ldan dang ni rtsod ldan che
de dag re re'i bar dag tu
mun pa'i bskal pa drug cu la
bstan pa'i btsas ni gzhan du 'gyur
byang gi phyogs na g.yo ba ldan
bstan pa'i sgron me der gsal te
dpal ldan skyong zhes bya ba yi
dge slong dag gis 'dzin par 'gyur
de yi yon bdag rgyal po ni
dzi na mi tra zhes bya yi
bstan pa gso ba'i gzhi ma byed
lo ni stong dang sum brgyar gnas
de nas mun pa'i bskal pa ni
drug cu'i bar du gnas pa'o
de nas lho phyogs tshal pa skyob
gling ni yangs shing mdzes pa ni
bstan pa'i srog shing der babs shing
33
dga' ba'i dpal zhes bya ba yi
lcang po can gyi rigs dag gis
bstan pa 'di ni 'dzin par 'gyur
de yi yon bdag khyim bdag rigs
dge ba'i dngos grub ces bya bas
bstan pa dam pa 'di nyid ni
lo brgya'i bar la gnas par byed
de nas mun pa'i bskal pa ni
lo ni brgya dang nyi shur 'gyur
de nas shar phyogs bde ba'i rlung
rdo rje 'byung ba'i ri rtse la
bstan pa dam pa 'di babs nas
su tra sde zhes bya ba yi
rgyal po nyid kyis bstan pa 'dzin
de yi yon bdag bram ze ni
dza ya sa kar zhes bya bas
lo ni stong dang bzhi brgyar gnas
de 'og mun pa'i bskal pa ni
lo ni stong phrag lngar 'gyur ro
de nas nub phyogs brtse ba'i gling
bha ra sa li zhes bya bar
'gro ba bzang po'i rigs la yang
yang bcud snying po gsum babs nas
dge slong bde ba skyod gis kyang
bstan pa dam pa 'di 'dzin te
de yi yon bdag dpa' bo 'dzin
gdol pa'i rigs kyis lo stong bar
'di nyid gnas shing 'phel bar byed
34
de 'das 'og tu mun pa nyid
lo ni stong phrag lngar gnas te
de nas yang ni 'dir babs te
rdo rje gdan zhes 'byung ba'i gnas
'di nyid 'phel nas 'od 'bar ba
lo ni lnga brgya lnga bcu'o
'di nyid blo gros bzang pos 'dzin
de yi yon bdag mkha' 'gro ma
bsil byed gtsang ma bya ba yin
de yi 'og tu 'jig rten 'di
sa chu me rlung sdebs 'khrugs nas
mi gnas stong pa chen por 'gyur
bskal pa zhes pa dang po las
tha ma 'jig pa'i dus 'byung ngo
bstan pa 'jig pa'i nye rgyu ni
de dag so so'i gnas dag tu
gang zag log sred can zhes pa
re re dag gis bstan pa kun
'jig par byed pa'i nye rgyu yin
'di nyid dang po'i mun pa'i dus
'dzam bu gling gi nub phyogs su
rgyal po lag pa'i sor mo drug
mdun na so lhag sngon po yod
lag pa g.yas pa'i gru mo la
sme ba nag po sdig pa'i dbyibs
rab tu 'jigs pa yod pa yis
sangs rgyas bstan pa mun par 'gyur
lo ni drug cu'i bar la 'gyur
35
de 'das dpal 'dzin dang pos 'dzin
stong dang sum brgya 'das 'og tu
yang ni 'dzam gling byang gi ngos
gzi brjid ldan pa'i ri yi rtser
dge slong gzugs la byams sems bral
g.yas pa la ni rna ba gnyis
mig ni zur gsum mas yar 'geb
'di dang mu stegs sde rtsod nas
lo ni drug cu mun par 'gyur
de 'og bde ba'i lha zhes pas
lo brgya'i bar la 'phel bar byed
de 'das 'dzam gling byang shar du
chu bo rab med 'bab pa'i rtsar
rgyal po'i lus la bsod nams ldan
mig ni gcig las med pa la
yan lag rags shing lus shed ldan
'phong dang sgyu rtsal rnams kyis brgyan
'dis ni chos byed bsnubs nas ni
lo ni drug cur bstan pa nyid
'dir ni nub nas gzhan du 'gyur
de 'das rang sangs rgyas kyi gzugs
rdo rje gdan nas nub tu 'byung
des ni bstan pa dam pa nyid
lo ni brgya dang nyi shur gnas
de 'das 'og tu 'dzam gling dbus
gser gyi grong khyer zhes bya bar
gnas rten lus la lce rtse gnyis
36
bongs chung yan lag thung ba zhig
sde pa rtsod cing mtshon cha 'dzin
'di 'byung bas ni mun par yang
lo ni drug cu'i bar la 'gyur
de 'das 'og tu 'dzam gling shar
chu bo dag ni lo ki ta
g.yas kyi phyogs kyi 'gram dag tu
dpal gyi seng ge zhes bya bas
lo ni stong dang bzhi brgyar gnas
de nas yang ni 'dzam gling dbus
chu bo chen po gang ga'i 'gram
rgyal po'i bu la dpung ba ni
mar gad mdog dang mthun pa la
rab tu byung ba sor bzhi'i tshad
'di 'byung bas ni mun pa yang
lo ni drug cu'i bar la 'gyur
de 'das 'og tu ka ma la
shi la zhes pa'i gtsug lag khang
de yi bdag po gzhon nu'i mgon
'dis ni lo stong bar du gnas
de 'og 'dzam bu gling gi lhor
tshangs pa'i gling zhes bya ba'i grong
dmangs kyi rigs la seng ge'i mgo
'di ni skyes nas zla gsum nas
drug cu'i bar la mun par 'gyur
de 'og bya rgod phung po la
dge slong mdzes byed gzhon nu yis
lo ni lnga brgya lnga bcur gnas
de 'das 'og tu 'dzam gling mtshams
37
kha che'i yul zhes bya ba yi
sgra dang ldan pa'i grong khyer du
bya yi lus la mi yi gdong
rigs ngan dag gi nang skyes pa
'di nyid skyes nas lo bcu nas
drug cu'i bar du mun par 'gyur
de 'das 'og tu 'dzam gling ni
dbus nas shar du dpag tshad lngar
dge slong sha kya dzi ka yis
'di nas lo bcu'i bar dag tu
sgron me 'bar ba bzhin du 'gyur
de ltar rim pa bdun gyis ni
'dzam bu gling du 'phel 'grib byed
de nas mdzes ldan bkod pa yi
zhing khams dag tu nges 'phar nas
tshe lo dag ni bcu'i 'og tu
'di nas mi gnas der snang ngo
de ltar dar 'grib rdzogs nas ni
bstan pa dam pa'i snying po 'di
yangs pa skyob pa'i 'jig rten du
sangs rgyas bstan pa gnas byed pa'i
ut pal me tog mdzes zhes pa'i
ston pa sangs rgyas bcom ldan 'das
bde byed brtsegs pa'i khang bzangs su
stong phrag lnga dang bcas pa'i 'khor
thams cad byang chub sems chen po
mi skye'i chos la bzod thob ste
38
dge ba'i sems ldan 'ba' zhig 'byung
ston pa de nyid 'byon pa dang
log sred can rnams nges btul nas
bstan pa dam pa 'di nyid ni
lo ni lnga stong phrag stong du
bstan pa'i snying po gnas par byed
de nas yang ni snga ma bzhin
rim pa bdun gyis 'phel 'grib byed
de 'og gtsug phud dbyangs ldan pa'i
'jig rten khams ni yangs par ni
ston pa mtha' yas 'khor ba 'jig
'khor ni brgya phrag phyed dang brgyad
kun kyang dgra bcom zag pa zad
bya ba byas shing khur bor pa'o
des kyang bstan pa'i snying po nyid
lo ni 'bum phrag bdun du gnas
sngar shugs nyid kyi rim pa yi
de ltar gnas pa bdun thal nas
bskal pa brgyad cu rtsa lngar yang
chos rnams sangs rgyas skur thim nas
'jig rten khams ni gang du yang
sangs rgyas bstan pa mi gnas so
de nas 'jig rten 'og ma la
bskal pa sa ya drug 'bum du
sangs rgyas bstan pa yun ring gnas
'di la 'phel 'grib 'byung ba min
'gro ba rnams ni smin byed do
39
rdzogs sangs rgyas kyi bstan pa ni
rnam pa gnyis su 'dod pa la
bstan pa dngos dang gzugs brnyan te
gzugs brnyan nyid la nges med ste
'di dang 'di 'byung 'chol ba'o
nyi ma rab tu snang bar byed
sku gsung thugs kyi dngos po gsum
su la bab pa 'bad med par
gdon mi za ba'i sangs rgyas thob
de phyir byin gyis rlabs kyi gnad
gsung gi sprul pa nyid las kyang
ston pa'i kha dog legs bris nas
mchan khung g.yon du btags byas te
dus su klog dang 'dzin byas na
gdon mi za bar 'tshang rgya des
rgyud 'di sus ni rtag bklags na
des kyang gong ma bzhin du 'gyur
bka' gsang nges pa bcu bdun dang
bstan pa'i gzer dang 'phrul yig bcas
sprul sku'i zhing khams thog ma la
ston pa kun tu bzang po yis
stug po bkod pa'i gnas su gsungs
de nas lcang lo can gyi gnas
kun gzigs rnam par snang mdzad kyis
'di nyid bzung bas rigs lngar smin
40
de 'das nga yis bzung ba yis
bstan pa'i srog shing dam pa yi
sangs rgyas stong dang rtsa gnyis ni
'di la brten nas nges par 'byung
brdzus dang sgo nga las skyes dang
drod dang mngal nas skyes pa yi
sems can rnams ni smin par byed
'dul ba'i bstan pa 'di nyid nas
bcu gnyis chos kyi 'khor lo 'byung
'di yi mdzad pa sum cu drug
sku gsung thugs la brten nas ni
gdul yul sems can rnams la snang
nga ni mya ngan 'das 'og tu
nub phyogs u rgyan dag gi yul
dha na ko sha'i lha lcam la
pha med bu ni ba dzra te
'dis ni dam pa'i bstan pa 'dzin
de yis rjes bzung nub kyi phyogs
bram ze'i phrug gu skal ldan pa
man dzu shri pa ti zhes
lo ni bdun cu rtsa lngar 'dzin
de yi rjes su skal ldan pa
so sha'i gling zhes bya ba yi
khyim bdag rigs la shri sing ha
zhes pa yis ni 'dzin par 'gyur
de rjes 'dzin pa gdol pa'i rigs
dznya na su tras 'di nyid 'dzin
de rjes 'dzin pa khyim bdag rigs
41
phyag rgya rgya chen dag gis 'dzin
de yi rjes la rgyal po'i rigs
sprul pa phyag brnyan bcas pas 'dzin
de yi rjes la dge sbyong gzugs
lhun gyi rgyal mtshan dag gis so
de rjes seng ha shwa ras 'dzin
de rjes sa la gnas pa yi
byang chub sems dpa' dag gis 'dzin
de 'og lag na rdo rje yi
sprul pa ba dzra pha las 'dzin
de 'og rgyal po seng ge ste
bzang po dag gis 'dzin pa'o
de 'og sgra mkhan dpal 'dzin no
de 'og yo gi pra bhas 'dzin
de 'og rgyal po khri 'od do
de 'og dge slong dpal dang ldan
de nas blo gros mchog gi 'dzin
de nas mkha' 'gro dpal 'dzin mas
bstan pa 'di nyid bzung nas ni
tshe lo bcu pa'i dus la dar
de nas mi gnas ngo bo'o
bstan pa'i snying thig gsang ba 'di
de ltar bstan pa bdun 'das nas
zhing khams gnyis la nges spyad nas
de ltar bdun po thal nas kyang
rdo rje gdan gyi sbo la ni
bstan pa kun gyi gsung gi btsas
rang byung chen po'i yi ge nyid
42
sgra dang bcas te babs pa ni
'di nas bskal pa bye ba na
'khor log glog gi phreng ba yi
bcom ldan 'das la snang bar 'gyur
de nas lo ni brgya phrag gsum
de ltar gsum po thal ba'i 'og
bstan pa'i thugs kyi rdo rje yang
ston pa de la snang bar 'gyur
de nas lo ni lnga brgya nas
bstan pa'i sku yang der babs te
de ltar bstan pa dngos babs nas
yang ni bstan pa'i me ro ldang
ston pa de yi 'khor du yang
'phags pa tshangs pa'i 'od ces ba
rdzu 'phrul stobs ldan rdzogs pa la
rab tu dad cing 'dun pa nyid
nges par bzung ste mngon par snang
de la sogs te ston pa'i 'khor
'phags pa nyan thos khri phrag gnyis
'dul ba'i bstan pa bskal pa gcig
dgra bcom 'bras bu nyid la bkod
de nas mun pa'i bskal pa drug
de nas dgra bcom 'bum phrag gnyis
nyid kyi 'khor du 'dus nas ni
mdo sde'i bstan pa bskal pa brgyad
drang nges las kyi mtha' la dgod
rdzu 'phrul stobs ldan dbang bskur nas
43
nges par 'phen te bstan pa rdzogs
yang ni mya ngan 'da' tshul ston
de nas mun pa'i bskal pa gnyis
de nas ston pa sku 'khrungs nas
byang chub sems dpa' chen po'i 'khor
stong phrag brgya ni 'dus pa las
mchog tu 'dus pa rab 'jigs dpal
rab tu ston pa'i bstan pa sdud
mngon pa'i bstan pa bskal pa brgyad
thams cad tshe gcig 'bras bu thob
'di dus 'khor ba dong sprugs te
sems can rnams kyis sangs rgyas 'thob
'gro ba drug ces snang mi srid
bskal pa stong phrag nyi shur ni
sems can 'khor ba rgyun chad nas
lus can rnam par mi snang ngo
de nas las kyi bye brag las
sems can nyon mongs mngon med kyang
bag la nyal ba langs pa'i dbang
shin tu phra ba blangs pa'i gzugs
grangs mang rab tu phra ba las
gzugs can sems can lus 'phel 'gyur
de ltar brjod kyis mi langs pa'i
bstan pa'i tha ma bsam mi khyab
44
re zhig tshig gis mtshon pa'o
rgyud kyi lus dang yan lag ni
lus la bkod pa brgya phrag ni
gnyis dang lnga bcu tha ma pa'o
dang po nges pa gsal ba yis
sna tshogs bkod pa yan lag la
zhus pa bdun cu tham pa la
yan lag bkod pa brgya gcig go
lus nyid rdzogs par byas pa'o
de yi yan lag nyis brgya bcu
gong ma'i lus dang yan lag rdzogs
lus rdzogs yan lag gsang 'byed pa'o
gnyis pa'i lus ni nyer bstan pa
gnad rnams 'dus pa'i bkod pa la
zhus pa nyi shu rtsa brgyad las
gnad dus bkod pa sum cu gcig
de yis lus nyid rdzogs pa la
yan lag brgya phrag gnyis dang brgyad
des ni gnyis pa'i lus dang ni
yan lag dag ni rdzogs pa'o
gsum pa'i lus ni nyer bstan pa
zhus pa nyi shu rtsa gnyis la
ye shes bkod pa lnga bcu brgyad
yan lag nyid la brgya phrag gnyis
gsum pa'i lus la yan lag rdzogs
45
bzhi pa'i lus dang yan lag ni
zhus pa nyer gcig nyid yin no
chos nyid bkod pa sum cu gnyis
yan lag lnga bcu rtsa brgyad do
lnga pa'i lus dang yan lag ni
zhus pa bcu gcig dag yin te
blta bsgom bkod pa sum cu gnyis
de yi yan lag drug cu bzhi
lnga pa'i lus dang yan lag rdzogs
drug pa'i lus dang yan lag ni
zhus pa brgyad du dris pa las
sku rnams bkod pa bcu drug yin
de yi yan lag sum cu gnyis
drug pa'i lus dang yan lag rdzogs
'byung ba'i 'dod pa 'di lta ste
spyi mthun las kyi bye brag las
sems can las kyi brten so yis
phyi yi 'byung ba la brten nas
las dang gos dang dbang po dang
'khor dang skye ba rdzogs par 'dod
nang 'byung las kyi rim pa ni
sas ni lus kyi gzhi byas te
bskyed pas sha ni smin par 'dod
chus ni lus kun bsdus nas ni
bskyed pas khrag tu smin par 'dod
mes ni lus kun smin byas te
46
bskyed pas drod du smin par 'dod
rlung gis lus kun 'degs pa la
bskyed pas dbugs su smin par byed
de yi sgra don bye brag gis
spyi yi rnam pa nges bstan pa
gzugs la bslabs pas lus zad 'gyur
sgra yis skad rnams shes par 'gyur
dris ni bcud kyis len pa 'grub
ros ni dngos po bdud rtsir bsgyur
rtsi ni sems can gzhan don dang
rang gi don yang rdzogs pa'o
sems can dus ni rnam pa brgyad
nad dang rlung dang tsha ba ni
shes pa nyon mongs byang sems dang
ye shes nyid dang 'byung ba'o
dbyar dgun stod dpyid dus bzhi la
rlung mkhris bad kan 'dus pa bzhi
so so'i gnas nas 'phos pa yis
sems can rlung sems 'pho ba'i dus
'di dus rlung ni brtseg ma'am
yang na dal zhing bar chad pa
yang na phra zhing tsha bar 'gyur
'di yis tshe rnams thung bar byed
shes pa 'phrog cing myos pa'o
skabs su g.yeng zhing 'pho bar 'gyur
nyon mongs lnga po 'dus pa yis
47
ngan song gnas su 'phen par byed
byang chub sems ni 'jil ba dang
rab tu 'phrigs shing phra bar 'gyur
ye shes gsal ba ma yin no
'byung ba byer zug las 'phros nas
sems can gcig gi dus yin no
sems can spyi yi dus dag ni
dang po dpag tu med pa nas
tha ma tshe lo bcu pa'i bar
dus kyi rim pa drug cu 'byung
nyon mongs las dbang gzhan 'gyur phyir
rang mthun spyi don las kyi yang
tshe lo nyid ni stong pa las
'dzam bu gling pa rnams la yang
brgya yi bar la dus rim ni
sum cu dag tu 'gyur pa yin
de nas brtsams te bcu yi bar
dus kyi rim pa sum cu 'byung
goms pa'i 'pho dus brgyad rim gyis
spyod pa phyi nas ngan par 'gyur
dus kyi gdon dang mu ge dang
mtshon dang nad kyis dus 'byung ste
bye brag mang ste dus rim pa'o
phyi rol 'byung ba rlung la yang
nam mkha' khams dang sbyar ba ste
de la chu ste de steng sa
rgya khyon sa ya mthug khong snyoms
48
grangs med bzhi dang sa ya gcig
gcig ni de yi bzhi cha stong
gling rnams bkod dang ri rab dang
dpag bsam shing dang nor bur bcas
nyi zla so so'i lha rnams dang
rgya mtsho chen po'i zab kyis bskor
ri rab rnams dang chu bran dang
rin chen bdun gyis nges par bkod
nang ste gzugs med dang po la
gzugs kyi khams te 'od gsal ni
rim pas 'dod pa'i khams su yang
zla ba dri ma med pa dang
nyi ma rab tu snang byed las
'jig rten khams ni mched pa ste
gzhan 'phrul la sogs yas rim bzhin
de nas lha min gnas dag ste
gling bzhi'i mi rnams rim gyis so
nyon mongs bdag dang bcas pa yis
ngan song gnas ni rim par chags
rigs drug so so'i 'gro ba ni
nang du chags te lus bong dang
tshe tshad spyi mthun las kyi yang
so so'i gnas dang bsod nams ni
gling dang mthun par gnas pa'o
don ni 'jig dang chags pa dang
gnas pa nyid dang stongs pa dang
skyes dang rgas dang na dang 'chi
49
srid pa'i 'khrul 'khor nyid du'o
dus kyi 'pho ba 'di lta ste
thog ma dpag tu med pa nas
tha ma bcu yi bar dag las
yar skyes pa dang mar 'grib pa
nad dang mu ge mtshon dang ni
bskal chud gsum gyis mtshams sbyar nas
drug cu dag ni thal nas kyang
me yis bdun la chu yis bdun
de ltar bcu bzhi rdzogs nas ni
lhag ma rlung gis 'jig pa yin
de ltar drug cu gnas pa dang
'jig pa'i yun kyang de tsam las
drug cu'i bar la stongs par gnas
de ltar brgya dang brgyad cu las
yun gyis bskal pa dang por 'dod
de ltar brgya dang brgyad cu la
bar gyi bskal pa gnyis pa'o
de ltar sbrags pa de tsam las
bskal pa chen po gcig yin no
zhag ni bcu phrag gsum pa yang
zla ba dag ni gcig yin te
de ltar bcu gnyis rdzogs pa las
lo ni gcig tu 'dod pa'o
nang dang dgong mo bdun brgya dang
50
nyi shu dag ni rdzogs pa las
zhag ni sum brgya drug cur 'dod
de rnams rdzogs pas lo ni gcig
zhag ni pho mo las kyi dbye
zla ba ston dpyid dbyar dang dgun
re re dag la gsum gsum gyis
'jug cing 'byung ba'i rnam lnga byed
byi ba glang dang stag nyid dang
rna ring sbrul dang 'brug dang yang
rta dang lug dang spre'u dang
bya dang khyi phag bcu gnyis kyis
'byung ba'i rtsis rnams spel ba'o
tshe ni spel dang gso ba dang
bsgrub dang rgyas ba'i cho ga nyid
rnal 'byor pa yis sbyor shes na
nyi zla dag dang mnyam par 'gyur
gzhan ni mnyam dang gzhig pa las
dgug dang bcings dang gshed la dbab
spor zhing bsad pa'i las rnams kyang
rnal 'byor pa yis bkug shes na
'gro ba rnams ni dbang du 'dus
dbang thang spel dang gso ba dang
gnas shing chags par byed pa nyid
gzhan ni mnyam pa'i sbyor ba nyid
rnal 'byor pa yis brtsam par bya'o
51
byer zug snyoms la bcu gnyis te
sa chu me rlung bzhi la yang
gsum gsum nyid de bcu gnyis la
chu yi zug pas dbang po sdud
byer ba yis ni 'khrugs par byed
snyoms pa yis ni 'bras bu 'byin
sa yi zug pas rdul rnams 'byin
byer ba yis ni yan lag 'byin
snyoms pas lus 'byung rdzogs pa'o
me yi zug pas nad du byed
byer ba dag gis lus gnas 'gyur
snyoms pas 'byung ba gnas par byed
rlung gi zug pas 'byung ba skyob
byer bas las gzhan 'jig pa las
snyoms pas rlung sems gcig du sdud
gsum gyis byed pa'i mtha' 'di'o
chu yi zug pas sa 'dus la
zug pa zug pa 'phrad pa yis
gang mi 'grub cing 'jig par 'gyur
byer ba nyid kyis nad du 'gyur
snyoms pas rtsi sbyor sman rnams 'grub
me dang rlung gnyis phung po 'jig
byer bas las kun 'grub pa la
snyoms pas 'khrug pa'i las mthar 'gyur
chu dang me las don rab 'grub
byer bas gzhan la 'jug par 'gyur
52
snyoms pas tshe ring dbang thang 'grub
sa dang rlung gis zhi ba 'grub
byer bas rgyas dang dbang du byed
snyoms pas mngon spyod las rnams 'grub
rlung dang chu yi bya ba nyid
byer pas dge ba'i las kun 'grub
snyoms pas dmag las rgyal ba'o
sa dang mes ni spel ba 'grub
byer bas 'byung ba spo ba 'grub
snyoms pas gshed kyis cho ga 'grub
zug byer las kyi mtha' la yang
nges par 'gyur ro dbang po'i lha
'khor ba'i las rgyud gcad 'dod na
bya ba bral bar rdzogs pas rdzogs
mtha' dang bul bas dbus mi gnas
yongs su rdzogs pas dngos dang bral
lhag ma med pas cha shas min
gcig tu ma yin gnyis mtha' zad
du mar mi snang gcig las 'das
brjod du med pas tshig gi gzhi
dngos bral stong pa snying po'i don
phyogs su ma lhung lta ba'i don
'di shes 'khor ba'i lam 'gag go
gnad las byung ba'i mngon sum nyid
goms pa'i stobs kyis 'khrul 'jig
53
rang bzhin dag pas g.yengs pa med
rgyun du gnas pas 'bral ba med
rang snang yin pas rnam rtog zang
rlung zad ye shes nyid la spyod
'di dang 'bral ba med pa yis
'gro drug lam gyi rgyun gcod do
byas shing bcos pa med pa yis
shugs su spyad pas 'khrul pa 'dag
lhug mar byung bas skye ba med
'dzin chags med pas ci dgar rol
rnal du phab pas rnyog pa sangs
rang bzhin yin pas thabs las 'das
'dis kyang 'khor ba'i sgo 'gag go
ston pa sangs rgyas bcom ldan 'das
yon tan brjod kyis langs pa min
phun sum tshogs pa drug cu yis
bstan pa dam pa'i gzhi ma 'dzin
'jig rten khams su yun ring bar
sangs rgyas bstan pa gnas pa la
yon tan brjod kyis mi langs pa
de ni gang las byung zhe na
sku dang gsung dang thugs dang ni
mdzad pa bcu gnyis phrag gsum kyi
ston pa 'jig rten byon nas ni
gdul bya dag gi yon tan no
54
phyi nang gsang ba'i las bzhi las
dag byed yon tan dpag tu med
sngar bstan gyi ni rim pa'o
bstan pa 'phel zhing rdzogs pa yang
bcom ldan 'das kyi yon tan no
sku gsum bslab pa'i rim pa nyid
'byung ba'i 'dod don gtsor byas te
mchog tu sa chu me rlung gi
sgra la bslabs pas nges par 'grub
chu yi sgra ni gshad pa la
mkha' 'gro ma yin sgra dbyangs 'dzin
'di la rtag tu goms byas na
sprul pa'i sku yang nges par 'grub
sa yi sgra ni bsil zhing lji
tshangs pa chen po'i sgra skad ldan
'di la rtag tu brtan spyod na
longs spyod rdzogs sku nges 'grub pa'o
me yi sgra ni ring byed bslab
khyab 'jug chen po'i gsungs dbyangs ston
'di la mnyan par sus spyod pa
chos sku'i yon tan nges par 'thob
rlung gi sgra ni gzir zhing drag
mkha' lding rgyal po'i sbyor pa gsung
'di ni rtag tu zlo shes na
sku gsum thun mong bslab bya'o
de ltar 'byung bzhi'i sgra don ni
55
phyi yi dus la nges par sbyor
dgun dang dpyid dang dbyar dang ston
chu dang sa ste me rlung gi
rim pa dus dang des sbyar te
rnal 'byor lus dang bstun byas na
'grub par the tshom mi za'o
'jig rten thun mong las mtha' ni
'phur bar 'dod pas ri lu bsten
mi snang 'dod pas sems bzhag la
thig le stong pa'i dra bar ni
lus dang sems gnyis bcug pas 'grub
zang thal 'thob par 'dod pa yis
rlung nyid bzung ste thig ler gzhug
skabs su shes pa na bun bzhin
tshangs pa'i gnas nas 'don par bya'o
mtshon dang dug las rgyal 'dod pas
'byung ba bzhi la sems gtad de
phye mar sbyar zhing las bsgrubs na
de dag nges par 'grub pa'o
khyi dang dred sbyang las rgyal bar
'byung ba bzhi dag rjod byed cing
rten cing 'brel ba bzhi byas na
de rnams las ni rgyal bar 'gyur
'jigs pa brgyad las thar 'dod pas
'khor lo ri mo ldan pa nyid
spyi bor bsgoms te rlung bsgoms na
56
'dis kyang de dag rnams las rgyal
mig sman 'grub par 'dod pa yi
khwa ta bya gshog sbyor ba ni
legs par byar te gsal byed kyi
yi ge rtag tu bzlas spyod na
khams gsum po yang gsal bar snang
dmag dang tshong dang gnyen sbyor las
su dag rgyal bar 'dod pa yis
'byung ba'i dus dang phyogs bzung nas
'khrugs pa med par byas na yang
nges par 'grub par the tshom med
gang gis ral gri 'dzin 'dod na
sa la ser po'i sbyor ba yi
'byung ba'i yi ge rab bzlas shing
lus kyi gnas lngar legs spyod na
'byung ba'i dus nyid rab bstims nas
rab tu sbyor ba bstan pa yis
ral gri 'dzin pa chen por 'gyur
mkha' 'gro dbang du sdud pa'i mis
ma mo 'du ba'i sar phyin nas
rin po che yi sbyor ba dag
'byung ba'i mgo nyid 'tshogs dus su
legs par sbyar te ri lu nyid
gang gis kha yi nang bzung na
mkha' 'gro ma rnams dbang du 'gyur
57
rkang mgyogs bsgrub par 'dod pa yis
rdo rje'i gshog pa bcu drug la
a dang yam gis rnam par brgyan
'dab chags sbyor ba byung dus la
dus la 'khrul pa med byas te
rkang pa'i mthil du sde gus ni
grangs dang mthun par byugs pa dang
skad cig gis ni 'dzam bu gling
rgyu zhing 'khor bar the tshom med
dur khrod gnas su rgyu bas kyang
mig gi sbyor bas ri lu nyid
rang dus sbyor ba'i dus rnams la
legs par sbyar te a yis bskor
rang lo'i 'byung ba bcud pa la
gnas su phyin pas nges par 'grub
bcud kyis len par 'dod pas ni
bdud rtsi rnam lnga sbyar ba'i thabs
gzhan du 'byung ba snyoms pa la
mkhas pas cha snyoms legs sbyar nas
rin po che'i snod du blugs
de nas sbrang dang ud tsid ta
kha tshar legs par btab nas ni
dngul chu'i thigs pa re blangs nas
nang bzhin sran ma'i rdog ma tsam
mkhas pa dag gis za spyod na
bcud kyis len pa chen por yang
58
'gyur ba the tshom mi za'o
bye brag sku rnams bsgrub pa na
'byung ba bzhi yi dri la bslab
chu yi dris ni bde ba ster
'di la za nus 'phel che bas
btab ste rlung la sbyar ba yis
rdo rje 'dzin pa'i sku nyid 'grub
sa yi dris ni rtogs pa sdud
pa la sha yi sbyor lugs dang
rten 'brel rgyun du bstan pa yis
ngo bo nyid kyi sku yang 'grub
me yi dris ni nyams bskyed de
rang lus gsal ba'i nyams kyis ni
goms na he ru ka yang 'grub
rlung gi dris ni bslab bya'i gnas
gnas 'jug las kyis bsdeb byas te
nges lus rim pa gsal bsgoms na
rigs lnga'i sku ni legs par 'grub
gzhan yang ro dang reg nyid la
rim pa ji ltar bslab byas na
gang 'dod sku rnams 'grub pa la
the tshom za ba ma yin no
gnyid kyi rnal 'byor sus bsgom pa
'dis ni gti mug lam du byed
phyi yi dus ni gzhi dag las
rnal 'byor lus kyi rtsal sbyangs te
rtsa rnams khungs su bzung ba gnad
59
nang gi dus ni bzhi nyid kyis
rnal 'byor dag gi rtsal sbyangs te
brjod pa'i rgyun rnams gcad pa gnad
gsang ba'i dus ni bzhi yis kyang
rnal 'byor sems kyi rtsal sbyangs te
gnyid la goms pa gnad yin no
kho na nyid kyi dus bzhi yis
lus dang ngag sems nges bsdus nas
'od gsal chen po gnyid dang bsre
de ltar goms nas sku gsum la
nges par sbyor ro rnal 'byor pas
rmi lam gnad kyi lam khyer ni
sngon du bya dang gnad la dbab
sngon du lus ngag sems sbyangs te
'byongs pa'i rtags la brten nas ni
brtag dang zil gyis gnon pa dang
bag chags gsum po nges gzung bya
de nas gnad la 'bebs dus su
sbyang dang bsgyur dang bcad pa dang
dkrugs dang gcud dang gnad la 'bor
bskyil bzlog las kyi gnad byas pas
las kyi rmi lam mtha' zad de
bag chags 'khrul pa drung nas thon
'di dus rang gi brtson 'grus kyis
rab la chad dang 'bring la shes
60
tha ma 'gyur bar nges pa ste
'di dag rmi lam thog ma yang
rab la brjed dang tha ma 'gags
'bring la shin tu gsal ba la
tha ma yin pa shes pa'o
tha ma mi gsal de nas 'gyur
de rnams kyis ni tshad la pheb
skyes bus rang sems ma thul ba
mi rtog bsgoms pas nges thul te
rnal du phebs nas rang gi'o
sngon du sbyangs pa'i rim pa dang
dngos gzhi rang gi rgyud la brten
sngon du sbyang ba'i rim pa ni
lus kyi sngon du 'gro ba las
so so'i byed pa'i rgyu 'gags pa
rdo rje'i skyil krung du bcas te
lus sbyang sems la phan pa'o
ngag ni hum zhes gnas pa las
rgyas gdab pa dang rtsal sbyang dar
gnyen btsal lam du zhugs pa yis
de ltar ngag sbyang sems la phan
sems ni thog ma byung sa dang
[var. mTshams brag rnying rgyud, vol. Na, p. 50 (l. 3) : sems ni thog ma byung ba dang ; but Klong chen pa and the dGongs pa zang thal both always have byung sa, at least in the A ’dzom ’brug pa prints]
bar du gnas pa tha ma 'gro
[var. Klong chen rab ’byams, many occurrences of this quotation, in the form : bar du gnas dang tha ma ’gro, as well as in the Bi ma'i ’grel tig of the dGongs pa zang thal, vol. IV, p. 338]
de ltar gsum la brtags dpyad na
sems sbyang sems kyi gnas lugs shes
dngos gzhi rang gi rgyud brten ni
lus kyi gnad dang ngag dang yang
61
sems kyi gnad la brten pa yis
rlung ni ci nas dal bya ste
rab tu 'phang ba las byung ba
lus dang sems kyi 'brel chad de
khams gsum du yang ldog pa min
rlung gi dgos pa rnam pa gnyis
'jig rten lus rdzogs bskyed pa dang
brten cing gnas pa'i tshe rnams dang
dbang dang tshe la sogs pa 'phel
bsod nams las kyi byed pa'o
'gro ba'i bkrag dang gzi mdangs bskyed
mched cing sdud pa'i las kun byed
'das pa'i sku dang ye shes dang
thig le nyid la goms pa dang
yang zhing stod dang gsal bar khyab
lus kyi 'byung ba zad pa dang
sems kyi rtog pa 'gags pa dang
mi rtog ye shes skye ba dang
phyi yi snang ba zad pa dang
rlung sems gnyis su 'dres pa ste
des na rlung gis las kun byed
lus kyi gnad ni rtsa yin te
gnas dang bkod pa 'gyu pa dang
'khor lo'i rten dang lus kyi srog
ming dang bye brag rgyu dang rkyen
62
byed pa'i las dang mtshan nyid dang
nyon mongs las dang ye shes las
lam la brten nas mngon snang ba
nad dang 'byung ba'i bye brag dang
'khrug mar gnas pa'i mtha' yis dbye
bsdams pas 'gags la btsir bas 'ching
mnan pas gnas la gcud pas gsal
gcus pas rgal la drang bas shes
'phul bas sdod la drag pas zin
de ltar rtsa yis gnad kyis kyang
sangs rgyas gnas ni mtshon pa'o
tsal brten pa'i rlung dag ni
nyi khri dang ni stong phrag gcig
drug brgya dag tu 'gyu ba ni
'gyu ba chen po'i rlung du 'dod
de yi byed las rnam pa gnyis
gyen la rgyu dang thur du sel
bar na mkhas pas gnad nyid btsal
rtsa nas nges par 'gyu ba ni
'bum phrag gcig dang khri phrag gnyis
stong phrag drug dang brgya phrag drug
rtsa nas nges par 'byung ba ste
'gyu ba chung ba'i rlung du 'dod
nad dang gdon dang tshe yi dus
mkhas pas shes par bya de yang
de yi gnad kyis sbyor thabs 'bad
63
chen po la ni dus brtsi ste
mchog dang thun mong dngos grub brtag
so so'i las kyi bye brag gis
las dang ye shes gnyis bar dang
nyon mongs rnams dang rtog med las
so so'i grangs tshad bzung ba ste
sgom pa pos ni rnam par sbyang
des ni so so'i rlung tshad zin
thig le'i chos nyid brtan 'dod pas
don dam dang ni kun rdzob las
re zhig kun rdzob thig le la
brten nas sangs rgyas 'dod pa yis
rigs ma mtshan nyid rdzogs pa ni
lha dang lha min tshangs pa dang
gal te rigs ngan mu stegs sam
mtshan nyid rdzogs pa dag mthong na
'gugs pa'i sbyor ba nges brtsams nas
brten bya nyid dang rtsa rnams dang
dmigs bya dag gis lus rdzogs bya
de nas kun rdzob thig le nyid
dbab cing gzung dang bzlog pa dang
rtsa la gdab cing rlung dang bsre
stong nyid brtan bya blo rjes bcad
lus dang sems gnyis go bzlog bya'o
don dam thig le brtan pa yis
chos sku stong pa'i yul rnams rnyed
64
thig le stong pa'i sgron ma nyid
gtems te rig pa'i rtsal rnams sbyang
nyin mtshan med par goms spyod na
'di nyid rtsol bral mngon du snang
de ni 'byongs pa'i tshad yin no
mkha' 'gro ma yi las kyi mtha'
dbye na brjod kyis mi langs kyang
mdor bsdus nas ni bshad par bya
rten 'brel zab mo dag gis kyang
zas gos la sogs bral ba dang
bde chen zag med thob pa dang
'byung bzhi dag la dbang sgyur 'gyur
dngos la brtags pa'i las mtha' yis
gzugs dang sgra dang dri dang ro
reg gi khams la brtags pa yis
'jig rten thun mong las mtha' dang
mngon par shes pa rdzogs pa dang
zhing khams rnams la longs spyod do
'pho ba'i bye brag rnam pa gsum
dbang po dag gi dbye ba yis
'od gsal ba dang sgyu lus dang
tha ma lus ngag yid la'o
lus ngag 'pho ba rnam pa gnyis
dngos su 'pho dang dngos med do
65
dngos ni rlung gis sbyang ba'i thabs
sgra dang bzo dang sgyu rtsal dang
rten cing 'brel la sbyangs pas ni
so so'i 'byung ba nang mthun pas
lus ngag yid kyis gtad pas 'grub
dngos med sems kyi goms stobs brtan
sgyu lus rmi lam dag la sbyangs
de nyid 'byongs pas lus nyid kyang
grib ma'i rnam pa lta bur 'gyur
des ni bar ma do yi lus
'di dag rang du 'dzin par 'gyur
'od gsal 'pho ba rab kyis te
gnyid kyi bsam gtan la sbyangs nas
'byongs pas nyin dang mtshan med par
phyi rol snang ba gsal ba na
'dis ni 'od gsal chen po 'grub
'di yi lus kyang gsum yin te
brtson 'grus kyi ni rim pa yis
sprul sku longs sku chos sku la
nges par dngos su 'pho bar nus
rten 'brel sbyor ba rnam pa gnyis
sna tshogs rdzu 'phrul bsgrub pa dang
'byung ba gnad kyi cho ga'o
sna tshogs rdzu 'phrul thabs sna tshogs
lam sna zin pas rang shes sbyar
rgyu dang mi rgyu rlung gis bskor
66
lus dang dbang po bsgrub pas dbye
'byung ba'i gnad ni rang dang gzhan
phan gnod 'bras bu nges par 'byin
rang rang lus dang 'byung bar sbyar
chu dang sa dang me dang rlung
so so'i las kyi rten 'brel gyis
gso zhing spel dang nyams par byed
sa dang chu yis 'jig pa la
sa dang mes ni spel ba'o
sa dang rlung gis gshed du 'bebs
chu dang mes ni nyams par byed
chu dang rlung gis gso ba'o
me dang rlung gis snyoms pa nyid
bzhi 'dus pas ni 'khrugs pa nyid
gang zhig brjod pa'i rten 'brel ni
rnal 'byor so so'i nyams dang sbyar
yid kyi rten 'brel rlung la dri
gsum 'dus pa yi byed pa nyid
so so'i sdeb dang legs sbyar na
'dis kyang phan dang gnod pa 'grub
nad dang sdug bsngal grol 'dod pas
rang dang gzhan gnyis nyam par sbyar
gzhan la rten 'brel dag gis bya
rang gi spo dang bya bas bya'o
bya ba dag ni gsum yin te
lus kyi gnad dang ngag dang yang
67
de bzhin sems kyi gnad kyis dkrol
lus ni 'khrul 'khor sna tshogs la
seng ge nyid dang glang po che
bya rgod dag dang lug gis sbrug
wa mo dang ni skyes bu nyid
'bu srin la sogs lus dang ni
'khrul 'khor rnam pa sna tshogs kyis
phyi nang stod sman yan lag lus
rlung mkhris bad kan 'dus pa ni
'byung ba nad sdeb bzhi yis sbyar
tsha dang grang bas mthar phyes te
de dang de sbyar nad las grol
ngag ni sgra skad sna tshogs pa
a li ka li rab gsal bas
rang bzhin rtsa la gnas pa yi
yi ge bzlog tshul drug gis kyang
so so'i gnas dang sbyar ba dang
lha dang klu dang gnod sbyin dang
srin po nam mkha' lding gi skad
tshangs dang brgya byin khyab 'jug dang
'dre dang rlung lha dag gi skad
grul bum lto 'phye dri za dang
lhag cing dngos po'i skad kyis kyang
so so'i skad dang sbyar bas grol
sems ni dran pa sna tshogs dang
ci ltar 'gyus ba'i mtha' yi yang
rnal 'byor pa yi rig pas dbye
68
gzhan yang lus ngag yid kyis bsgyur
yang na sems kyi bya ba'i las
sna tshogs ting nge 'dzin gyis bsgyur
sdug bsngal las kyang mtha' dbye'o
'byung ba'i 'pho ba 'di lta bu
e ma ngo mtshar che bar bshad
phyi rol nang gi dbye ba las
sa dang sa ste lhag ma yang
gong ma'i 'gres kyis shes par bya'o
nyin mtshan nang nub zhag dang ni
zla ba lo yi 'khrul lugs kyis
bcu gnyis phrag dang spom pa yang
zug dang byer dang snyoms pa las
ngas med 'khrugs mar gnas pa bzhi
dus la nges phye bcu drug ni
so so'i dus nges 'pho ba'i mtshams
rten 'brel la sogs 'byung ba'i gnas
'pho ba'i dus la 'pho ba ste
de bzhin 'jug dus 'jug pa la
gnas pa'i dus na gnas pa'o
'khrugs ma nyid la 'khrugs mar ro
nyin mtshan zhag dang zla ba'o
'pho ba'i gnas ni mkhas pas dpyad
chu dang sa ste me rlung gis
mthun pa dang ni mi mthun pa
so so'i las dus sdeb ka yis
las kyi mtha' rnams bsgyur bar bya'o
69
gnad kyi 'byung ba rnam phye na
bzhi brgya nyid dang rtsa bzhi las
des bcas 'jug pa brgyad cur sdud
de las nyi shu rtsa ba zhi'o
mchog tu gnas pa bcu drug nyid
pho mo'i sdebs kyis brgyad du 'gyur
rang ngo dag pa bzhi yis ni
gnad rnams bsdus te nges par bstan
byer zug snyoms pa'i byed las kyi
tshes dang zla ba lo rnams dang
'khrul pa med par sbyar byas na
gnang rnams dag kyang nges par 'gyur
de ltar gnad la brten nas ni
rtsis kyi sbyor ba'i yan lag bshad
e ma ngo mtshar che ba nyid
sangs rgyas gzhan gyis ma gsungs pa'i
'byung ba'i rtsis kyi rim pa la
brten nas 'khor 'das 'jal byed pa'i
rab tu gsang ba 'di nyon cig
chu dang sa ste me rlung las
rnam par dbye ba'i rim pa nyid
lnga po gcig ni ma ning stong
shes shing bstsi ba'i rim pa yin
zug dang byer dang snyoms pa'i las
bcu gnyis dag las ma yi lo rnams kyang
70
bcu gnyis dag ste gsum gsum gyis
so so'i dmigs dang rten 'brel yang
dus dang sbyor ba mkhas pas brtags
za ma zhag dang zla ba lo
byer zug snyoms pa'i dus kyis kyang
skye dang rgas dang na ba dang
de bzhin 'chi ba'i dus rnams gzung
gza' dang skar ma gdon rnams dang
nyi ma'i dus kyi rim pa'o
bzang dang ngan pa'i bye brag brtsi
bya dang mi bya mkhas pas gzung
gzugs dang sgra dang dri ro yis
tshe rabs snga phyi'i las 'brel brtags
'byung ba so so'i 'gyu byed kyis
dge sbyor 'phel dang gdon dus bzung
nang mthun dbye ba bcu drug gis
las dang nyon mongs ye shes brtags
'byung bas bskyed dang gnas dang 'jig
stong dang 'khyams dang 'byams pa dang
'khyil dang 'khor dang log pa dang
rno dang rdug dang drag zhan dang
dgra dang gshed dang grogs dag gis
rang rang las kyi rnam grangs brtsi
phyi rol 'byung ba'i gzugs dag gis
ya bzhi bzung ste rang rang bstun
71
rang rang 'byung ba'i bsdeb ka yis
tshe dang dbang thang dus rnams bzung
skyes dang na dang 'chi ba ni
rang dang gzhan du nges par sbyar
zla ba dgun dbyar dpyid ston dang
gsum gyi grangs rtsis bcu gnyis la
lo stong zhag kyang 'bum phrag gsum
skar ma yi ni gnyis med pas
lo dang zla ba steng brtsegs 'gyur
nyin dang mtshan gyi sgyur byed las
nyin mtshan mnyam pa dus gnyis 'gyur
tshes zhes rnam grangs grags pa las
yar gyi ngo la mtshan mo ring
de nas brgya dang brgyad cu yis
mar gyi do la nyin mo ring
nyin mtshan ring thung byed pa yi
'byung ba pho mo'i thabs dbye las
bcu gnyis rim pa nyin mtshan las
log pa'i dus te mkhas pas bzung
nyin mtshan ring dang thung ba las
dge dang mi dge dbye ba'o
nyin mtshan 'gres pa'i zhag la yang
zla ba lo ste byer zug snyoms
rten 'brel dus te bcu gnyis sbyar
72
thams cad bcu gnyis rim shes na
'jam dpal mkhyen pa rdzogs pa'o
phyi rol 'byung ba'i cho 'phrul dang
nyin mtshan ring thung rnam grangs las
'byung ba'i lo rnams dus chod sbyar
lo ni so so'i 'gres sbyar te
mgo la rang dus mnyam sbyar nas
rlung dang 'od dang sgra chen dang
sa g.yos mnyam dang gzugs brnyan dang
nam mkha' dag gi yal lugs ni
so so'i phyogs dang des bstun nas
sad dang char chen char med dang
mu ge nad dang gdon rigs dang
rtsod dang ri khri g.yo ba ni
so so'i dus dang rigs las shes
rgyal po dmangs dang dge sbyong dang
btsun mo blon po pan di ta
rgan dang gzhon dang phyugs rnams dang
gzhan yang byol song so so'i bye brag dang
skyes pa bud med gzugs rnams dar
shing thog lo thog rtsi thog rnams
legs dang nyes dang bzang ngan rnams
rim pas rnal 'byor pas shes bya'o
e ma ngo mtshar rmad byung ba'i
73
'byung ba'i bde ba 'di lta bu
bstan pa gzhan du ma grags pa'i
yang gsang bla na med pa nyid
lha bu skal ldan ngo che bas
ngo mi chogs pas khyod la bshad
mchog tu skal ldan brtson 'grus can
'khor ba'i yid dang bral ba yis
bla ma mchod dang bstod bya ste
'jig rten bya ba kun spangs la
so so'i 'byung ba dang bstun te
chu dang sa dang me dang rlung
so so'i lus dang nges sbyar te
'byung ba so so'i go rim gyis
dngos po'i gzugs rnams nges dpyad la
gzugs dang sgra dang dri dang ro
so so'i 'dod pa'i yon tan la
sgra nas brtsam te bslab par bya'o
de yang rnal 'byor skal ldan pas
dngos po so so'i kha dog dang
dbyibs la legs par brtags dpyad ste
thun mong mchog gi bsgrub par sbyar
de nas so so'i sgra la sbyang
sgra la nges par 'byongs pa yis
lhag ma rnams la brtsams pas 'grub
de ltar phyi rol 'byung ba la
brtson 'grus rab dang 'bring mtha' yi
zhag dang zla ba lo rnams kyis
74
so so'i tshad la rtags kyis 'grub
'di ltar su yi 'grub pa la
sprul pa'i sku dang longs sku dang
chos sku ngo bo nyid kyi sku
mchog tu sku yi 'bras bur sbyor
gcig ni ma ning stong phyir ro
sgra la sogs pa'i dbye ba ni
gnas 'jug 'byung dang bzlog dus kyi
so so'i bye brag la brten nas
thun mong las kyi sbyor ka ni
mkha' 'gro ma dang rigs drug dang
'byung ba so so'i skad rnams la
brten nas mngon par shes pa 'grub
zas gos 'bral dang 'byung ba la
sgra dang bral nas dbang bskur ro
lus kyi 'byung ba zad pa dang
mar me'i grib ma bzhin du 'gyur
rga shi'i sdug bsngal nyer bral nas
nyi zla dag dang mnyam par 'gyur
phyi nang dbugs ni rgyun bcad nas
rnam par rtog pa thams cad 'gags
mi rtog bsam gtan la brten nas
chos kyi dbyings dang nye bar sbyor
'jig rten thun mong lus bzung nas
'di nyid zad nas khams gsum du
ldog pa de ni ma yin no
spo ba'i las ni rnam pa gnyis
dngos po nyid dang stong pa'o
75
dngos po gzugs kyis bsdus pa ste
de ltar 'byung ba la 'byongs na
rlung la goms pa brtan byas nas
dngos po'i gzugs can gang rung la
shes pa bcug pas 'gul bar nus
de ni dngos por spo ba tsam
stong pa sems kyi goms pa gtso
chos kyi dbyings dang chos kyi sku
gnyis med sbyor bas stong par shes
stong nyid gsal ba'i rang bzhin la
sems kyang de yi ngang la'o
rten 'brel cho ga rdzogs pa yis
gnad kyi spo la gtang thabs dang
skad kyi brjod pa las shes bya
so so'i 'byung 'dus 'phrad pa yis
mthong ba tsam gyis 'pho bar bya'o
gal te byol song gzugs mthong na
rlung dang sbyar te mkhas pas so
'on te dngos grub la thug na
mi snang gzugs kyis lus kun 'grub
dngos po chags pa'i rdzas mthong na
bla ma mchod phyir spo bas blang
gzhan du bya ba ma yin no
de bzhin gzhon pa'i gzugs la sogs
bla ma dpa' bos bka' stsal na
rlung la goms pas 'di yang blang
76
'jug pa'i sems dang ldan pa yis
rnal 'byor pas ni spo bar bya'o
spo 'dod rnal 'byor skal che bas
rigs bcas sems kyi bsdus pa la
gzugs su snang ba'i srog can la
nang mthun las kyi 'gyur dag gis
rang gi nad sogs gzhan la spo
de ltar spos pas dngos las grol
gzhan ni rten 'brel sbyor ba gsung
bem po'i 'byung ba bzhi dag las
dngos po 'gyur pa'i rten 'brel gyis
grangs dang brda' dang skad dag gis
dmigs pa bsgyur te nad sogs spo
shing bu rde'u gseg ma dang
rtswa dang mgal dum gyo mo sogs
de bzhin chu sa nam mkhas kyang
nges par bzung ste spo ba'i las
rnal 'byor sems kyi stobs kyis bsgyur
de yi rtags tshad mkhas pas brtags
gzhags ni bcag dang bsgyur ba dang
bslang dang bsnyal dang bsrang ba dang
spo dang spar dang bor ba dang
bzung dang phyi dang brdug pa yis
sgrub pa pos ni rab shes bya
'gugs pa'i phyag rgya ldan pa yis
77
ser snas bcings pa'i zas nor la
bla ma mchod phyir spo bas blang
'di nyid sems la dmigs gsal na
khab len rdo la lcags 'du ltar
nges par len par byed pa'o
gal te 'jig rten rang 'dod phyir
brtsams kyang 'grub pa ma yin no
rgyud gzhan kun las ma bshad pa'i
'byung ba'i gnad rnams drang dang bzlog
zab mo nges par bshad kyis nyon
rlung dang mkhris pa bad kan dang
gnyis 'dus pa dang gsum 'dus pa
de yi phyed dang cha bcu gnyis
rim pa dus dang nges sbyar nas
rgyu gnyis dag la rkyen brgyad ni
tsha dang grang ba ngos bzung ste
phyi nang yul gnyis zung sbyar la
lus dang yan lag mkhas pas dbye
stod smad bar gyi gnas sbyar te
gnas gsum ldan pas nad rnams gdon
lus kyis 'khrul 'khor sna tshogs dang
bcud kyis gcun pa'i las mtha' yis
'byung ba'i nad kun phyir la drangs
lus dang yan lag phyi nang gis
nges par sbyar te sems ldog bya'o
78
ngag gis sgra skad sna tshogs dang
yi ge'i brda' sbyor sna tshogs dang
gnas dang brjod med don gyis bya'o
sems ni sa chu me rlung dang
dmigs pa sna tshogs nang dang sbyar
bzlog pa dbang po'i gnad kyis so
so so'i grangs dang tshad kyis ni
nges par rtags tshad grol mtshams kyi
dus tshod nges par shes pa yis
rang lus nad las grol ba dang
gzhan lus rten 'brel sbyor ba shes
'di ltar byas pas don 'grub pa'o
grub mtha'i dgongs pa rnam gnyis te
'jig rten lam 'jug dgongs pa dang
dam pa don gyi dgongs pa'o
so so'i gzhi dang dbang po yis
'jig rten pa dang 'das pa yi
theg pa dag ni gnyis su 'dod
gzhi ni 'jig rten pa yin te
'di las 'dod pa gnyis yin no
'das pa rgyu dang 'bras bu las
rgyu la gsum la 'bras bur gnyis
gnyis po las phye drug tu 'gyur
'di ltar dbang po'i rim pas so
de ltar dgu la brten nas ni
79
khams gsum po yang yang dag gi
lam du 'jug par byed pa'o
dam pa'i don ni blo bral nas
dbang po cig char rang grol bas
mngon sum mthong ba'i gnad kyis ni
rang gi grub pa'i mtha' zhig nas
gang la zhen dang 'dzin med par
yang dag chos nyid ro myangs nas
khams gsum 'khor ba'i rten med par
mkha' la mkha' nyid thim pa ltar
rnal 'byor mchog kyang de bzhin no
mthar thug pa yi dgongs pa ni
bskyed pa'i mtha' ni lus yin te
de nyid lha dang zung 'jug pas
dngos po zad pa nyid la thug
rdzogs pa'i rim pa nyid kyi mtha'
'gyu zhing 'dzin par byed pas na
rlung dang shes pa zung 'jug pa'o
snang ba zad pa nyid la thug
grub pa'i mtha' yi brjod bya la
rang gzhan 'dod pa zung 'jug pas
rang ngo shes pa nyid la thug
phyag rgya chen po nyid kyi mtha'
bsgyur ba bde ba dag yin te
bde dang stong pa zung 'jug pas
yid la byed pa med la thug
80
rang bzhin rdzogs pa chen po'i mtha'
chos rnams rang sar bzhag pa ste
snang shes chos nyid zung 'jug pas
ye grol cog bzhag nyid la thug
dgongs pa blo las 'das pa dang
mtshan bcas rang sar dag pa dang
stong dang dngos po'i mtha' grol dang
'gyu zad rtog pa med pa dang
blo zad yid las 'das pa'o
e ma gsang sngags mthar thug pa'i
bsgrub pa'i rim pa grangs mang yang
gtso bos rnam par phye ba yi
thabs dang shes rab mchog tu zab
de nyid las ni nyer bsdus pa
re zhig shes rab rnam par bshad
byin rlabs ston pa rnal 'byor ma
'di las bsgrub pa bdun du 'gyur
bsnyen pa bsgrub pa las kyi mtha'
so so'i sngags rab mchog tu zab
ci ltar yi ge'i sbyor 'brel gyis
so so'i rtsa ba'i sngags bzung la
sgrub pa pos ni bzlas pa brtsam
skyed par byed pa'i gsal byed las
so so'i kha dog gis phye nas
cho ga'i yan lag kun rdzogs te
bcom ldan 'das ma'i gzugs su ldang
81
ye shes dbang bskur gyis brgyan te
dngos grub 'dod pas rtag tu bsgom
a li ka li 'i phreng ba la
dmigs te rnal 'byor blo gnas bya'o
rgyas gdab sems la rdzogs pa brten
slar gso ye shes lus kyis ni
yar nas yang du goms spyod na
drug dang bdun dang dgu ste gcig
gnyis dang gsum dang lnga yis ni
gdon mi za bar 'grub pa'o
dngos grub ston pa'i 'od zer can
'di la bsgrub pa gsum du 'gyur
gsal byed phreng ba nang sdebs kyis
'di yis so so'i sngags kyang shes
de la bsnyen sgrub sngar dang mtshungs
yan lag 'dus pa'i cho ga las
lha mo'i mdog dang zhal phyag ni
gsal bar rnal 'byor lus gnas te
thugs kyi 'od kyi phreng ba las
dmigs pa ci 'dod gsol ba gdab
sems ni yi ge rab gsal te
zung 'jug rdzogs pa chen por bzhag
de ltar rtag tu bsgom pa 'am
yang na thun drug rgyun brten na
dgu dang bdun dang lnga yis ni
nges par 'grub par gdon mi za'o
las rnams ston pa tsan ti ka
82
'di nyid la yang sgrub pa gsum
dbyings kyi yi ge 'phrul sdebs kyis
'di rnams sngags kyang shes byas la
cho ga ldan pa'i rnal 'byor pas
rang sems dag pa gnas bsams te
lha mo'i gzugs kyi mdog gsum la
yi ge gzhug pa'i sbyor ba yis
mi mthun mtshan nyid bsal ba la
las ni so so'i khro mo bsgom
las rdzogs nas ni stong pa yi
sems kyi rnal 'byor rdzogs pa'o
de ltar rtag tu bsgoms pa yis
gcig dang gnyis dang gsum gyis ni
'dod pa'i don kun 'grub pa'o
thabs kyi sgrub pa zab mo nyid
mdor bsdus pas ni bshad par bya'o
las kyi mthar thug gshin rje'i gshed
'di la sgrub pa gnyis yod de
a li ka li mnyam sbyar bas
de yi sngags kyang shes par bya
'khor lo'i las rnams rdzogs byas te
cho ga'i dgongs pa tshad pa las
ci ltar mos pa'i yi ge ni
kha dog nges par bsam byas te
gshin rje'i gshed kyi rnal 'byor ba'o
gcig la las kyi mtha' bsgyur te
ci ltar 'dod pa'i mos bas bsten
83
gcig ni yi ge rdzogs pa la
rnal 'byor pa yi sems gnas bya'o
nus pa'i mthar thug mi g.yo mgon
'di la sgrub pa gsum yod de
a li ka li so so'i 'brel
de rnams sngags ni shes par bya
bsrung ba'i dam tshig lnga po la
cho ga rnams ni rdzogs byas te
khro rgyal mi g.yo mgon po'i sku
dad pas nges par rang lus bsam
lcags kyu yi ni 'od zer gyis
dgug dang bsad dang bcings pa'i las
rang gis ci ltar 'dod pa sbro
rdzogs pa'i byang chub don du bsngo
'di ltar bsgrub pa zab mo nyid
gshin rje'i gshed ni 'bum phrag gsum
gnyis dang lngas ni rnal 'byor rdzogs
mi g.yo 'bum phrag gcig dang ni
de bzhin gnyis dang gsum gyis 'grub
zab mo'i don gyi bsgrub pa gnyis
mdor bsdus nges par dril ba yin
'di la the tshom sus za ba
sangs rgyas nyid kyi bka' bcag go
de phyir nges par 'grub pa'o
gnas lugs 'dug tshul 'di lta bu
84
bshad na nyan thos rang sangs rgyas
rab tu skrag ste brgyal bar 'gyur
des na mchog tu gsang bar bya'o
brtag pa med pa'i chos rnams ni
byung ba med pa'i gzhi zhes bya
de la gnas pa med pa'i phyir
dngos dang stong pa gang mi gnas
gsal dang mun pa sid 'byung min
'go 'ong srid mtha' med phyir ro
'bad cing rtsol bas ma bcings pas
zang ma nyid dang thal byung ngo
rgya chad phyogs lhung med pa'i phyir
dge dang sdig pa'ang 'grub pa med
dge sdig gnyis ka sel phyir ro
'khor dang 'das pa mi gnas pas
chos nyid stong pa kun khyab phyir
ye shes rang ngor gnas pa las
gsum gyi tshul du dbyer med do
'di ltar gzhan du ma bshad pa'i
'khrul pa'i rtsis sbyor ngo mtshar can
nga yis bshad kyis legs par nyon
rtsa ba yi ni rten 'brel las
so so'i lus kyi 'byung ba dang
rten 'brel 'khor lo'i 'brel so yis
'khrul pa'i dus tshod des bzung ste
rags par gnas pa'i dus dag las
rnal 'byor sems kyi 'khrul ngos bzung
85
'khrul dus gnas dus bzlog pa'i dus
bye brag gsum las bcu gnyis tshad
mtha' ldan tshad kyi 'khrul 'khor gyis
re mig rnams ni mkhas pas bzung
dus dang grangs dang nyer len gyis
phung po khams la sogs par sbyar
ldog par byed pa'i gnad kyis kyang
lus can so so'i 'khrul pa bzlog
shes bya rang gi mtshan nyid la
spyi dang bye brag 'gyur shes kyis
so so'i 'dod pa tha dad kyang
'jig rten yid spyod blta ba yi
spros pa la dga'i blo rnams kyis
re zhig tshig dang bcas pa spyod
lugs su khyad par sdebs gnyis kyi
'du shes can dag mtha' la 'jog
mngon sum gnad kyi man ngag gis
'khor 'das 'byed pa'i spros pa gcod
bsgom pa gnad kyi 'khor lo yis
rlung sems 'brel pa'i spos pa gcod
shes 'jug lam gyi rim pa yis
the tshom 'khrul pa'i blo rnams gcod
bla ma rdo rje 'chad chen gyis
rim pa rnam par bshad par bya'o
mtshan nyid rdzogs pa'i bla ma ni
86
yon tan kun gyi 'byung khungs shing
rdzogs pa'i byang chub gzhi 'dzin pa'o
rtsa ba yan lag bla ma gnyis
so so'i mtshan nyid tshang ba la
rgyal srid dang ni rang gi lus
'khor dang longs spyod rnams kyis bsten
lus ngag spyod pas mnyes pa yi
bla ma sangs rgyas mnyam sbyor bsten
dad dang shes rab ldan pa dang
mos shing 'khrul pa med pa dang
brjod bya rnams ni 'khrul nor med
dbang po gsal pas bla ma bsten
bstan pa de las yon tan ni
dpag bsam shing dang yid bzhin nor
'dod 'jo'i ba dang 'dra ba yi
yon tan dpag tu med pa 'thob
de la dmigs te bla ma bsten
'khor ba'i g.yul las bzlog phyir ro
phyi rol 'byung rtags sra ba dang
tsha zhing bsreg dang sdud cing brlan
yang zhing 'byed dang khyab pa nyid
'byung ba'i bslab bya'i dum bu yi
rnal 'byor pa yi lus ngag gis
'di dag rnams kyang 'dzin pa ste
bcu gnyis lo yi dus nges dang
rang dang mthun par legs sbyar te
so so'i dus kyi dang po la
87
sga dang gdams ngag la sogs te
dmigs kyi cho 'phrul bcu gnyis las
lha rnams kyis ni 'jig rten lha
skyod par byed pa bcu gcig la
than ngu nges par dmigs byas te
'dzam bu gling du snang bar byed
nam mkha' dag gi yal lugs kyis
cho 'phrul gyis kyang nges par dbye
'dzam gling rang sa'i phyogs bzung ste
shar la sogs pa'i rgyal po dang
mi chen dmangs la sogs pa la
dge dang mi dge nges par ston
de bzhin rgyal khams legs nyes dang
dge dang mi dge mkhas pas brtags
'di ni dngos po'i grub pa brnyes
'jig rten mngon shes nges 'grub po
dus ni las 'phro sad pa dang
'byung ba'i 'gyur dang sems kyi gnad
'khrul pa dag pas rang dus rnyed
de yi bzlog pa'i dus yin no
bstan pa'i bab ni stong pa dang
stong pa nyid dang mthar byed de
lhag ma gang zag so so'i dus
gong du bstan pa nyid dang mtshungs
e ma lha bdag dbang phyug nyid
88
dad ldan skal pa chen po nyon
rgyud gzhan dag tu sbas pa yi
sus kyang shes pa med pa yi
dbang bskur pa yi cho ga bshad
phyi dang nang dang gsang ba dang
gsang ba yongs su rdzogs pa'o
sdebs ni rnam pa bzhi dag gis
'gro ba'i lus ngag yid sems bzhi
rnam par dag pa bya ba'i phyir
dpang ni rnam pa bzhi yis kyang
skal bar ldan pa smin par bya'o
spros bcas nyid dang spros med dang
shin tu spros pa med pa dang
de bzhin rab tu spros pa med
dbye ba bzhi yi tshul gyis ni
dad ldan rang rgyud smin par byed
spos pa can gyi don du yang
bsnyen pa bsgrub pa nye bar bsnyen
mtshan nyid tshang ba'i bla mas bya
gzhan yang sa yi cho ga dang
sta gon thig dang tshon dgye dang
rgyud las 'byung ba'i dkyil 'khor bzhengs
de nas dbang bskur cho ga yang
nyan thos theg pa nas brtsams te
rim pa brgyad po rdzogs byas nas
rdzogs chen rig pa rtsal dbang bskur
de dag so so'i dgos pa dang
'jug cing nus pa'i khyad par bshad
89
spros med dang ldan 'jug smin phyir
spros pa med pa'i dbang mchog ni
man dal bum pa la rten nas
tshigs su bcad pa'i dbang sbyin bya
shin tu spros pa med pa la
'khor 'das ru shan 'og bzhin dbye
de tshe nam mkha'i mtshan nyid las
lus ngag yid kyi sgrib pa spang
mtshan nyid kyis ni nges par brtags
gal te spyad pa ma dag na
rang rang mthun pa'i dge bas sbyang
dbang ni brda la brten pa yis
rang rig gsal ba'i rang ngo 'phrod
brda 'grol man ngag mkhas pas bya
rab tu spros pa med pa la
sems kyi dkyil 'khor sgo phye la
lus kyi 'dug stangs nges par brtsam
de la goms te gzigs stangs sbyar
mngon sum rig pa lung gi brda'o
rtog med sems dpa' lha yi bu
dga' byed dbang phyug mgu bya'i phyir
dbang brten pa yi dam tshig bshad
bye brag brjod kyis mi langs kyang
mdor bsdus sku dang gsung dang thugs
rnal 'byor lus ngag yid la sbyar
90
dmigs pa bla ma rdo rje mched
bsrung ba'i yul gyi rnam par dbye
sdom pa lus dang ngag tu 'dus
rdo rje gsang ba'i gnas gzung bya'o
yang ni lha dbang dga' byed nyon
tshig brjod grub mtha' rnam grangs kyis
rim pa dgu ni yid spyod pas
mngon sum gnad dang bral ba la
ma 'ongs gdul bya'i sems can rnams
tshig la yid ches byed pa 'byung
rtog pa rags pa'i sems can rnams
tshig la spyod phyir smin pa min
'di yi bstan pa tha ma'i dus
mos pa spyod pa'i sa zhes bya'o
tshig 'das spros pa yongs rdzogs che
gsang ba nges pa'i rgyud 'di ni
mngon sum lam la brten pa yi
rang shes rig par 'dus pa'o
sangs rgyas thams cad bsdus pa yi
rang rig nges pa'i chos nyid ni
mnyam nyid 'dres pa med pas sbyang
de ni tshig 'das rim pa'o
mngon sum gnad ni lus ngag sems
so so'i gnad rnams nges par bstun
de yang lus ni sku gsum las
rgyun du 'da' bar mi bya'o
91
ngag ni bslab dang gnas pa dang
la bzla ba yang bstan par bya'o
sems ni dbyings la gtad pas 'grub
gnad gsum man ngag 'bral mi bya
de yang sgo dang yul nyid dang
rlung dang rig pa'i gnad nyid brten
sgo ni sku gsum mig gis blta
yul ni sgrib byed bral ba'o
rlung rig dal bas ye shes 'grub
de la snang ba bzhir 'gyur te
chos nyid mngon sum snang ba yis
yid dpyod 'dzin pa'i tshig las 'das
gong du 'phel ba'i nyams snang gis
'khrul pa'i snang ba nub par byed
rig pa tshad pheb snang ba yis
sku gsum rtogs pa'i lam snang 'das
chos nyid zad pa'i snang ba yis
khams gsum 'khor ba'i rgyun thag bcad
de la mtha' brten yid ches bya'o
mi 'gul gsum la gzhi bcas pas
rlung sems gnad la pheb pa'o
sdod pa gsum gyis tshad bzung bas
rmi lam bzlog dang lus ngag yid
rtags dang tshad ni nges bzung ba'o
thob pa gsum gyis gzer btab pas
92
zag bcas phung po mi snang ba'o
e ma ngo mtshar che ba yi
'khor 'das ru shan ma phyes na
khams gsum lus ngag yid kyi yang
'brel pa chod par mi 'gyur bas
'khor 'das ru shan phye ba bshad
'di la rnam pa gsum yod do
lus ni 'gro dang 'dug pa dang
gcud cing 'khrul 'khor sna tshogs dang
yan lag 'phen zhing sdud pa dang
bya byed rnam pa sna tshogs brten
dran pa'i sems kyis mngon bslangs te
'gro drug gzugs kyi spyod pa rnams
sems kyis blangs te lus kyis bya'o
de ltar su yis spyod nus na
ci ltar brtsams pa phyis rgyun chad
'di la dgos pa rnam pa gnyis
thun mong mchog gi dbye bas brtags
de ltar rtags dang tshad phebs na
rnal 'byor pa yi ngag spyod brtsam
brjod pa rtog pa'i rang bzhin phyir
sgra skad rnam pa sna tshogs pa
ci smras ldog pa med pa'i phyir
lha dang klu dang gnod sbyin dang
dri za grul bum khyab 'jug gi
skad ni bzang ngan bye brag brjod
mdor na 'gro ba drug gi skad
93
sems kyi dran bsam ngag gis brjod
'dir yang dgos pa rnam pa gnyis
mchog dang thun mong mtha' yid bye ba'o
de ltar tshad la phebs nas kyang
rnal 'byor pa yis sems sbyang bya
'das dang ma 'ongs da ltar gyi
dran bsam 'phro 'du'i 'khor lor brten
dga' dang mi dga' bzang ngan sems
yod med sna tshogs thams cad la
phyi ru brtags te nang du bsam
ci ltar bsam pa'i dran pa nyid
phyi nas skye rgyun 'chang par nges
'di yi dgos pa gong gis dbye
de ltar spyod pa rdzogs byas na
mngon sum gnad la rtag tu 'gel
de rdzogs khams gsum 'jug pa min
rab tu gsang ste bstan par bya'o
gal te lus kyi spyod pa la
brten nas nang rlung 'dzin 'dod pas
rlung 'dzin spyod pa nyer gcig ni
rnal 'byor pa yis byed spyod na
rlung la goms te lus 'byongs 'gyur
rgyan cha dag ni ldan pa la
gnas su rten 'brel 'khor lo bya
rlung dang shes pa rgyan la gtad
94
'gro zhing mig gi lta stangs sbyar
'dug pa'i tshe na sems 'phang ngo
sems 'dzin bslab pa nyer gcig gis
dang po gnas su gzhug pa dang
gnyis pa lus sems 'bral ba dang
gsum pa chos nyid mthong ba'o
'di dus lus ngag sems kyi gnad
rnal 'byor ldan pas rnal dbab bya'o
'gyu byed rlung gi brda' dang yang
bsres shing 'phen cing sdud pa yi
gnad rnams mkhas pas bsten byas na
sems kyi rtog pa rgyun chad do
'chi ba'i rtags kyang nyi shu gcig
dur khrod dben pa'i phyogs song la
bla ma mchod cing gtor ma bya
gzhan yang bza' dang btung ba yis
'gro ba gzhan yang mgu byas te
de nas phyi nang gsang ba yi
'chi ba'i rtags kyang brtag par bya'o
gal te ngan na bzlog pa brtsam
bzang bas bla mar gsol ba btab
sems can don phyir lha dbang khyod
brtse ba'i don de dris pa'i lan
ngas bstan 'khrul pa med par bzung
95
rang bzhin rdzogs pa chen po la
dmigs gtad lta ba'i blo zad kyang
re zhig tshig gis gtan la dbab
chos nyid mngon sum gnad kyis kyang
las la bzang ngan med par rtogs
snying thig nges par bsdu ba yis
dbang po rnams la rno rtul med
yid dpyod tshig gi mtha' zad pas
shes rab mig gi dbang pos mthong
tshig gis chos nyid mi mthong bas
thun mong theg pas don mi 'grub
sku gsum lam snang yin pa'i phyir
'di mthong khams gsum ldog pa min
chos kun mnyam par ro gcig pas
gzhi dang 'bras bur ltos min pa'o
rang rig rtog pa kun bral bas
grol lugs bzhi dang bcas pa'o
gnad bzhi gol ba'i gding gis ni
'khor dang mya ngan 'das mi gnas
ma byung byas pa med pa'i chos
gzhi dang rtsa ba med pa'o
thos mthong gol ba'i gnad nyid ni
gnyis dang lnga ste brgyad kyis rtogs
gding chen bzhi yis dbyings su sbyar
ngo sprod gsum gyis yid ches bya'o
96
yang ni bsgom pa'i srog shing bshad
sems kyi lung gis nges sbyar te
gzhan yang bsgom pa'i gnad rnams la
sngon 'gro ba dang dngos gzhi dang
rjes 'gro rnam pa gsum du 'dod
lus sbyangs sems nyid gdul ba dang
ngag gi bya ba rdzogs pa yis
sems nyid lam du zhugs pa'o
rlung la brten te lus sems bral
khams gsum 'phros khung bcad pa'i phyir
lus ngag zhen pa gting nas bzlog
'gro drug g.yang sa mnyam pa'i phyir
lus ngag yid kyi gnad rnams gzir
sems nyid chos dang sre ba'i phyir
rlung dang shes pa gyen du drang
'khrul snang zad par bya ba'i phyir
rtag tu rlung la goms par bya'o
spyod pa'i sbyor ba dbyings rig la
gzer gsum ldan pa 'bral med par
rtag tu 'dis na spyod pa bde
chos kun bya ba bral ba dang
'khor 'das 'brel pa chad pa'i dus
rtog bcas 'khrul pa 'gags pa ste
'khor ba'i g.yang rgyun bcad pas
rnal 'byor chen po'i spyod pa'i
97
'bras bu brjod par mi nus kyang
chos rnams zad sar phyin pa dang
rang gi grub pa'i mtha' yang 'jig
'di dus bla ma'i man ngag nub
blta sgom spyod pa'i mtha' stongs pas
chos su snang ba yod ma yin
sku dang ye shes rgyun chad pas
sangs rgyas med cing sems can med
mdor na gang yang gnas pa med
song ba med pas 'ong ba med pa'o
'khor ba'i rgyun thag gcad 'dod pas
lus ngag zhen pa bzlog nas kyang
mngon sum gnad la gzir bar bya'o
'khrul pa'i rtsis kyi sbyor ba yi
'khor 'das dus tshod bzung byas te
bzlog pa'i gnad la mkhas par bya'o
thub ngug tshad du phyin pa yis
skyon drug las ni rnam par grol
des ni 'khor ba'i rgyun chad do
bcud kyis len pa 'di lta bu
rgyud gzhan kun tu ma bstan pa
e ma ngo mtshar che bar bshad
lha bdag sems dpa' khyod nyon cig
rin po che la brten pa yis
tshe ni nyi zla dag dang mnyam
sna tshogs rdo yi sbyor ba yis
mtshon gyis lus la tshugs pa min
98
sngo la brten pa'i sbyor ba yis
skra dkar gnyer ma med par 'gyur
rtsi sbyor dag gi bcud len gyis
gzi brjid ldan zhing gzhon par 'gyur
sha la brten pa'i sbyor ba yis
lus zungs ldan zhing stobs bskyed 'gyur
gzhan yang rlung la brten pa yi
ngo mtshar che ba'i bcud len bshad
'byung ba rgyun gcod ces bya ba'i
steng dang 'og gi rlung gis shes
mkhas pas rlung ni gnas su sba
yang ni rlung gi 'gyu rtsis kyis
zas kyi rnal 'byor dag tu 'gyur
'byung ba dag la brten pa yis
ci ltar snang ba zas su 'gyur
de ltar bcud kyi len pa yis
'gro ba'i gdung ba chod pa'o
gos kyi rnal 'byor 'di lta ste
rlung dang rten 'brel zab mos bya
rlung ni 'phen zhing sdud pa las
'gro 'ong bskyil ba'i gnad kyi yang
dmigs pa so so'i 'byung ba dang
rnal 'byor lus la mthun par dbye
rten cing 'brel ba'i sbyor ka yis
gnyis dang drug dang bdun gsum la
ri lu phye ma legs sbyar nas
stor btad byugs pa'i mtha' yi bya'o
99
yang ni lus 'byung rgyun gcod pa'i
bcud len ngo mtshar che ba bshad
dri chen rgyun du bskor ldog pas
tha ma lus kyi zag pa zang
yang na bcud phyung mar 'khru ni
tshad dang ldan pa bsten pa yis
'byung ba'i rgyun rnams chad par 'gyur
lus kyi 'byung ba rgyun chad pas
lus la srog chags mi gnas dang
bshang gci la sogs med pa dang
phyi nang rlung yang med par 'gyur
'di dus rnal 'byor chen po ste
zas gos gnyis ka dag par 'gyur
'dis ni tshe dang longs spyod la
ci ltar 'dod pa 'grub par 'gyur
gal te 'byung ba bzhi po la
ro snyoms byed pa'i rnal 'byor pas
sa chu me rlung gnad bstun te
lus dang bsres te rlung gis sbar
rang lus so so'i 'byung ba yis
bsgyur zhing de nyid spyod pa la
gnad 'dus dkyil 'khor bsgom par bya'o
de nyid goms pa'i tshad phyin pas
bzhi po'i nus pa ngo mnyam nas
bde bar spyod cing 'jig bral te
'dis kyang zas gos gnyis 'grub nas
100
tshe dang longs spyod rdzogs pa'o
mdzod kyi yon tan 'di lta ste
thun mong mchog gi dngos grub la
ci dgar rol cing bde bar 'grub
rten cing 'brel pa'i yan lag rdzogs
rdzu 'phrul rnams dang mngon shes kyang
mdzod la spyod pas nges pas 'grub
nad dang dus tshod shes par 'gyur
'phags pa'i rdzu 'phrul bsgrub 'dod pas
dngos po'i rten dang dngos med la
rlung gi sbyangs pas nges 'grub ste
sgra dang bzo dang rten 'brel dang
brda' dang tshig dang tha snyad dang
dpe dang bya byed bslab thabs la
brten nas las rlung spyad pa yis
rdzu 'phrul ci ltar 'dod pa 'grub
rtog med ye shes bsgom pa dang
stong nyid bsam dang gnad kyis kyang
'bad rtsol med par rdzu 'phrul rnams
nges par 'grub par 'gyur pa'o
mi mdzad gter la spyod 'dod pas
khrom gyi 'khrul 'khor bsten pa ste
de yi sbyor rtsis mkhas par bya
dus gsum bzhi gnyis ldan pa yi
zla bcur sbas shing legs bskams nas
101
gang 'dod phyogs su gtad brtsams te
zer dang rlung la sbyar ba yis
gang 'dod brtsams pa'i las rnams 'grub
yang na bsgrub pa zab mo yi
bsnyen sgrub las kyi mtha' phye bas
nor gyi bdag po bsten byas te
sngags la goms pas longs spyod do
bzhi lnga dbang du byed pa yis
sems kyi bdag pos lus bzung ste
gnas gsum 'khor lo'i lto bar yang
'bru bzhi lnga dang gzugs 'dogs kyis
ba spro bsdu bstim 'khyil pas bya'o
de nyid rdzogs pas 'phur ba dang
'dzul zhing mi 'byed 'tshig pa med
bying bar mi nus rgyug nus pa'o
ston pa sangs rgyas bcom ldan 'das
yon tan thams cad rang rdzogs pas
brjod cing gsungs pa ma yin par
rang byung ye shes rol pa las
sgra tshig ming gi cho 'phrul du
skal pa bzang po rnams la snang
de ltar rdzogs chen gsang ba'i tshig
lha dbang gis ni nges thos nas
lus tus thal mo legs sbyar te
ston pa nyid la rjes yi rang
thams cad rdzogs pa chen po las
102
rang bzhin spros pa med par gyur
chos nyid dbyings las dbyer med pa'o
zhes sgra thal 'gyur chen po chos rnams kun gyi rtsa ba las
sna tshogs bkod pa rang byung man ngag gi rtsa ba nges par 'byung ba'i le'u ste dang po'o
@2
de nas lha dbang rtog pa med
chos kyi dbyings dang dbyer med kyang
ma 'ongs dus kyi sems can la
rtogs pas nges par 'khor ba las
bsgral bar bya ba'i blo yis kyang
sems bskyed sngon du btang nas ni
ston pa nyid la 'di skad zhus
kye kye brdzus nas skyes pa'i sku
sems can khams gsum 'khor ba las
grol bar byed pa'i gnad nyid gang
bcom ldan bdag gis zhu ba bgyi
sems can 'khor ba'i thog ma gang
'das pa'i tha ma gang gis bzung
sangs rgyas ma 'khrul gnad 'di ci
sems can 'khrul pa ci las byung
rang rig ye shes gnas pa gang
de nyid lam yang gang las 'byung
ye shes 'char ba'i sgo ni ci
sgron ma'i gnad ni ci lta bu
de yi mtshan nyid ci ltar snang
yul gyi gnad ni gang la 'char
103
de brten khyad par gang gis bsgrub
blo rim gnad ni ci lta bu
nyams su ci ltar len pa lags
de yi rtags dang tshad snang ci
bar ma do yi snang ba ci
rang sems grol ba gang gis grol
grol nas thugs rje ci ltar 'byung
de nyid ye shes gnad nyid gang
bzhugs tshul gnas lugs ci lta bu
dgongs pa gcig gam tha dad lags
kun gzhi chos sku gnyis gnad gang
sems dang ye shes gnad nyid ci
'byung ba dwangs snyigs gang gis 'byed
sgron ma ci ltar gtems pa lags
gtems pa'i snang ba ci lta bu
rtsa yi gnad la du tsam zhig
sems kyi sbyang ba rnam pa du
nyon mongs 'byung ba ci yi rgyu
'di dag bdag gis ma shes pas
ston pa thugs rje chen po la
tshig brjod rtog dpyod mi mnga' yang
rang bzhin bcos med nam mkha' nas
brjod med gsung gis bdag la gsungs
dang po la nang gses bcu bdun
de nas ston pa rdo rje 'chang
rang bzhin spros med rdzogs chen las
sgra tshig ming du mi gnas kyang
lha dbang nyid la 'di skad gsungs
104
rtog pa zad pa'i nam mkha' las
sgra tshig ming du ma bsgrags kyang
rang byung ye shes chen po nyid
gdod nas byas med rang bzhin las
ma bkod tshig tu 'di ltar shar
'khor ba rnams kyi thog ma ni
mi 'byed byas med rang gzhan las
dmigs par 'dzin pa'i yul shar te
rtog 'dzin las ni tha dad snang
dmigs 'dzin 'brel pa bcu gnyis su
'khor ba'i thog ma nyid du'o
ma rig gsum gyi 'khrul tshul te
rgyu gcig 'byed med rtsa ba ste
rang ngo yin par ma shes pa
'di yang 'khor ba'i thog ma'o
de las gcig gsum brgya phrag bzhi
'khor rkyen brgyad kyis nges bzung ste
gzhi gnas 'khrul pa'i rtsis sbyor ro
de las lhan cig skyes pa ste
don dam kun rdzob snang brtags pa'i
bden gnyis cha yi yul nas ni
las kun spyod pa nyi shur 'gyur
de yul snang cha'i bye brag las
kun brtags nges pa'i rkyen bzhi'i cha
rgyu dang bdag pos nges bzung ste
dmigs pa nyid dang dus mtshungs pas
'khrul pa'i cha yang brgyad gnyis te
105
dmigs pa'i dus ni mtshungs pas na
'du byed btags pa'i 'khrul pa ni
'du ba brgyal byed pa gcig
las kun rdzogs pas mtha' yas 'gyur
de yi dus dang dbang po brtsi'o
rnam shes 'khrul pa lugs bzhin las
snang ba yul ni brgyad dang drug
shes pas dpyod byed nyi shur 'gyur
de yis lus dang yan lag brtsi'o
de yang ming gzugs 'khrul ba'i cha
ming las gdags bzhi drug cu gnyis
'khor 'das bzhi dang yi ger bcas
gzugs ni phra rags rtags phye nas
grub cing 'dzin pa brgya dang lnga
las kun 'gyur byed bzhi chas brtsi'o
skye mched 'khor lo drug gi yang
yul dang shes pa dbang po'i gnad
so so'i 'jug cha brgyad gnyis drug
las yul brtsi bde tsam mo
reg cha sems kyi 'khrul pa'i lugs
rgyu byed snang ba nyams bcas drug
las dang byed pa rig shes lnga
mtha' yi rtog pa bdun 'gyur brtsi
tshor ba'i tshul ni bdun gnyis te
yid ldan snang cha'i rtog pa las
106
yid sems 'gyur ba brgyad cur 'gyur
de las rtog bcas bdun cur brtsi'o
sred pa'i 'khrul pa gsum lnga las
byas tshe grangs ni drug cu ste
yan lag mtha' yi bzlog tshul grangs
brgya gnyis las kyi mthar bzlog bya'o
len pa'i 'khrul gzhi bcu gsum drug
las mtha'i gzugs la reg nus brgya
'khrul bzung yul la snang char 'gyur
de yi byed par 'gyur brtsi'o
srid pa'i 'khrul pa bcu gnyis la
mi 'byed cha la bcu drug go
de yis rtog bcas yul sems bcings
las bzhi so sor rnam dpyad bya'o
skye ba'i cha las gsum gnyis lnga
'jug dang 'ong ba rlung gis byed
langs dang gnas pa'i dus la brgyad
'khor tshul 'bras bu bcu gnyis so
rga dang shi las 'khrul rkyen dgu
'bad 'gags rtog pa la bco brgyad
gnas su 'jug pa brgyad dang cha
bag la nyal dang kun 'khor ro
de ltar 'khrul rtsa bcu gnyis las
lus dang dbang po lo rnams dang
so so'i 'byung ba dus kyis dbye
107
rang dang gzhan te bzhir 'gyur ro
'di dag 'khor ba'i thog mar byung
sems can khams ni du mar bcas
'jug phyir las kun mthar spyad pa
ldan pas rdzogs te nyer bstan pa'o
lha dbang ngo mtshar chen po nyon
mya ngan 'das pa'i tha ma ni
'khrul pa'i rtog pa kun zad pas
'khor ba'i byed snang med tshe na
rtog zad 'khrul pa rang snang bas
'das pa gzhag phyir sems can khams
rang bzhin du yang 'di nyid yul
gzhan dbang ma yin yongs su grub
kun brtags las dang brjod pas stong
mtha' ldan phye ba ma yin no
gnyis gnyis 'jug dang kun tu khyab
las dang dbang po blo rnams yul
'jug pa'i las ni tha dka'o
de ltar 'khor 'das thog mtha' las
sangs rgyas 'khrul par ma gyur pas
gzhi las 'phags pa'i dbang po yis
rang snang rang bzhin med par shes
rtog dpyod yid rnams phyir ma shor
'gyu ba rang thog chod pa'o
de yang gnas lugs chen po las
'khrul zhes ka nas dag pa la
108
ma 'khrul nyid du bcos su med
med snang mthong ba med pa'i chos
byas byung rtog pa rang 'gags so
'khrul nas dmigs par snang ba min
rang bzhin ye gdangs ma g.yos pas
chos kun mnyam par ro gcig go
'dzin rtog bral nas ye sangs rgyas
bcos shing bsgyur du btub pa min
de yi gnad ni yul yin te
yul dang stong pa rig rtsal mnyam
tha dad rtog pas shes pa min
yang ni 'khrul pa man pa'i gnang
gcig shes pa yis thams cad gol
de nyid shes pas bzlog pa nyid
mi snang 'dzad pa med pa las
'byung rig gnas kyi tog pa zad
byas pas ma phye bcos su med
bya dang byed pa'i blo med pas
yul rkyen sangs pas sangs rgyas so
mtha' grol 'gag pa med pa las
yongs su rdzogs pa'i ting 'dzin gnas
chen po yin pas gong na med
rang bzhin g.yos pa med phyir ro
sems can 'khrul pa gong ma yi
rtsa ba'i rten 'brel la 'khyal bas
'khrul 'khor rtsis kyi gzhi mar byung
109
chos nyid rang gdangs snang ba las
rtog 'dzin snang bas yid phrog ste
'khrul pa'i yul ni phra mo'i las
bsgribs shing rang snang ma dag gyur
de las bag la nyal ba nyid
phra zhing rdul gyi cha dag ni
'gyu zhing 'dzin pa tsam du gyur
phra bas phra 'gyur shes pa las
rtog dpyod gzung cha gnyis su song
phra rdul ye shes snang ba 'gags
yul shes thad ka tsam du shar
ma rig la sogs bcu gnyis chos
'go ba'i 'byung rigs bcu gnyis 'gyur
de yi nang shes 'byung ba'i lus
phung po rnams dang khams dang yang
skye mched las kyi tshogs pa 'dus
nyon mongs 'dus pa dpag med las
'gro ba'i lus kyi rtog tshogs sdud
rten 'brel tshogs pa du ma las
mi mthun gzugs sogs bye brag go
'byung ba bzhi yis bskyed pa'i rgyu
rigs dang grangs kyis rnam bsdus te
mi 'dra'i kha dog tha dad las
gong ma'i cha las mngon snang ba'o
gzhi las rtog tshogs 'dus pa yis
byed pa'i las kyang bcu gnyis kyis
110
'byung ba'i phung po brten pa dang
gnas dang chags dang 'jig par byed
'khrul tshul bcu gnyis dag las ni
byed pa nyid du smin pa yis
'gro ba'i las dang bsang nams dang
dag dang ma dag gzugs rnams kyi
bye brag so so snang ba byed
gzhan yang snod dang bcu dag gi
'byung ba'i las kyang rlung gis byed
rlung gis 'phen cing sdud pa dang
'gro dang 'ong dang 'jug par byed
des na rlung gis las kun byed
bzlog pa nyid kyang rlung la thug
'jug 'phel las kyi mtha' yis dbye'o
rang rig ye shes lus la gnas
til 'bru las ni mar bzhin du
lus kyi bkrag dang gzi mdangs ni
ye shes rlan gyis khyab par byed
lus dang bstun pa'i sku rnams dang
ye shes 'od dang kha dog rtags
las dang 'jug dang sku rnams kyis
mdangs dang bcas te khyab pa'o
shes rab nyid dang sgron ma'i las
don dam kun rdzob rtags phye ba'o
smin byed thig le so so'i gnad
'gyu byed rtog pa rags 'dzin pa
ye shes snang ba bzhi gnyis cha
111
las 'byung 'jug pa'i dbye ba las
tsit ta rin chen gzhal yas su
rin chen 'dus pa zur brgyad sgo
ye shes lnga dang sku lnga ste
rlung lnga shes pa'i rtsal yang lnga
thams cad lnga lnga'i rang bzhin no
sku yi gnad ni gdangs kyis so
ye shes 'dug stangs dag gis so
thig le bskyal zhing dkrugs pas 'grub
'od ni yas shing sdud pa'o
'brel ldan bsdoms pas rlung gi gnad
'jug pa'i las ni mtha' yis dbye'o
de yi 'gyu byed las rlung zad
'khrul pa'i sdebs dang sbyar ba'o
rig pa'i gnad ni byung ba dang
bskyil zhing mkha' la gtad pa'o
dbyings kyi gnad ni bsdu ba dang
dgug dang khams kyi byer yas sbyar
snang ba'i gnad ni 'phel dang zang
sna tshogs rang sar grol ba'o
rig pa ye shes lam nyid ni
rang gi rtsa yi 'khor lo las
sku gsum rang rdzogs gnas pa las
112
ro ma rkyang ma kun 'dar ma
ma gsum dag gis lus bzung ste
dbu mas 'khor lo bzhi rten byas
'di dag g.yas g.yon dbus gnas pas
kun rdzob don dam dbye ba yis
lus dang yan lag bskyed pa dang
sgron ma nyid kyang smin par byed
ro mas ro rnams 'khor lo la
rlung gis bskul zhing thig le 'phen
ro ni rtsal brten pa yis
bde bas lus sems rgyas par byed
mas ni dangs ma sdud pa dang
gong 'og gnas kyi gzhi ma byed
'di la bskyil zhing gtems pa gnad
'di yi yan lag drug pho la
gtar zhing bsregs na ye shes 'gag
drod thob 'dod nam nye ba gnad
rlung dang thig le dgug par bya'o
rkyang mas skyed byed 'khor lo la
rlung gis 'phen sdud thig le 'jug
rkyang zhes bya ba zla med pas
nyag gcig dgongs pa ston pa byed
mas ni snyigs ma sel ba dang
ngo bo'i gzi mdangs bskyed pa'o
'di las gseng zhing ma nye ba gnad
'di la yal ga mi snang bas
smin so bzhi la thig les gdab
zas la dbang thob 'dod pas ni
113
rlung ni gtems shing mchil mi 'dor
dam tshig gis ni rab brtag go
kun 'dar mas ni dran pa dang
rtse mo'i 'khor lo sdud pas smin
las rlung bzlog cing ye shes 'dzin
kun ni sprul sku'i yon tan ster
'dar bas longs sku'i yon tan no
mas ni chos sku dngos su ston
'di yis yan lag bcu gnyis la
gseng zhing 'dril ba gnad yin no
tshe nyid spel na byugs pa bston
thig le lus dang sems kyis bya'o
ye shes lam ni 'di dag las
thig le sku dang bcas par 'gyur
rlung ni 'gro 'ong las kun byed
sems kyi bdag po yid kyis bzung
lam gyis bzung dang dgug pa'o
ye shes 'char ba'i sgo nyid ne
lus bcud dangs ma kun 'dus pa'i
tsak shu zhes pa'i sgo las 'thon
gnyis kyi cha 'dzin snang ba ston
skyed byed rtsa las 'brel byung ba'i
rtse mo las ni gcig gyur pa
dbang po yul la 'char byed pa'o
gcig la yal ga lnga yod pa'i
so so'i dbang po'i sgo la snang
114
khyad par skyon dang byed pa yi
ba min rwa 'dra'i khyil pa las
a 'bras zhes pa dkar nag gyed
rig cing gzugs rnams 'dzin pa dang
shes pa'i rang gsal rdzogs par ston
'di la ye shes dngos 'byung ste
mngon sum ba dang rang gnad kyis
chos nyid dag pa'i rang snang yul
rtog bcas 'gags par gnas pa'o
de yi 'byung byed ci zhes na
don dam chos nyid 'byung ba las
sgron ma rnam pa bzhi zhes te
smin cing 'jug la khyab stong pas
chos nyid yul snang sdud pa'o
rgyang zhags las ni gzugs sdud ste
rlung gis bskyod cing 'phen par byed
'ong dang 'gro ba'i 'phel 'grib kyis
ye shes dag ni sdud par byed
thig le stong pas las kun byed
'das pa'i lam gyi sna bzung nas
rlung gis bkrag dang gzi mdangs bskyed
bsgyur cing ye shes snang ba ston pa'o
shes rab rang byung sgron ma yis
chos kun mnyam pa ro gcig tu
bsdus te rang snang 'dzin par byed
'dis ni bag chags 'brel rgyun gcod
dbyings kyi dangs ma sdud pa dang
115
rig pa'i sku rnams 'dzin pa dang
gnad gsum bcud du smin pa yis
'khor ba nyid ni spong bar byed
de ltar mig las sgron shar bas
sangs rgyas dgongs pa'i gnad 'dus par
rang snang yul rnams 'dzin pa'o
sgron ma'i gnad ni ngas bshad kyis
lha bu skal ldan khyod nyon cig
yul dang rig pa rlung dag gis
chos nyid lam du bzung ba'i phyir
ye shes rdzogs pa'i chos nyid dag
'di yang sgron ma'i gnad yin no
rgyang zhags 'gul ba med pa gnad
'di dus lta stangs gsum dang sbyar
shes rab sgron ma sbyang ba'i gnad
cho ga gsum gyis spel ba dang
bsgrub pa'i gnad kyis rgya nyid bskyed
thig le'i sgron ma gtems pa gnad
rtsa dang mtheb mdzub ma bral bas
ye shes gong du 'phel ba'o
dbyings kyi gnad ni 'khrid pa ste
nyi ma'i bslab thabs rnal 'byor bas
legs par sbyang ste khrid par bya
zla ba dag la'ang bslab par bya'o
'di ltar rgyun du sus byas pa
'khrul pa'i snang ba rgyun chad de
116
dag pa ye shes lnga yi 'od
sa rdo ri brag bag stongs nas
gru chad dang ni yul gru tsam
khrid la mkhas pas nang bar 'gyur
'di dus thabs kyis bcos pa gnad
rdzogs pa'i chos nyid theb pa'o
'di ltar goms pas chos nyid stobs
lus 'byung rang sor rdzogs pa'o
de ltar lus 'byung rgyun chad pas
zag bcas phung po mi snang bar
'di la mngon par 'tshang rgya'o
sgron ma'i mtshan nyid 'di lta ste
spyir yang snang ba ston pa dang
ye shes ma bur sbrel bar byed
'khor 'das sa mtshams sbyor ba'o
rang gdangs gsal bas 'od lus la
rtog bral ye shes sdud par byed
rtag bcas yul gyi snang ba la
mi rtog ye shes gzhi ma 'dzin
rgyang zhags sgron ma'i mtshan nyid ni
khyab pas 'jug la 'jug pas khyab
'byung ba bzhi bdag byed par gnas
'dzin 'jug mched dang byed pa'o
shes rab dag gi mtshan nyid ni
gsal ba'i tshig 'jug gzhi ma sdud
nyon mongs las dang bag chags bsreg
smin byed 'khor 'das srog gcod pa'o
117
thig le stong pa'i mtshan nyid ni
zlum zhing rang bzhin kun gsal ba
dmar dang kha dog gsal ba'i 'od
spros dang bcas te mched par byed
dbyings nyid dag pa'i mtshan nyid ni
mthing ga rang rdzogs gnyis kyi cha
thabs dang shes rab rdzogs pa yis
zung gnyis cha las sku gnyis 'dzin
rab tu snang ba mched par byed
'di dag rnams kyang rang shes rdzogs
khyab bdag sems dpa'i gzugs brnyan ston
lu gu rgyud ni srang nas 'dren
dkyil 'khor rdzogs pa'i gzugs dang mtshungs
ye shes rnams kyi gzi mdangs ston
'od kyi gting mdangs bkrag kyang ston
sku dang thig le bdun pa'o
de ltar ye shes rdzogs pa'i sku
'di nyid sus mthong 'tshang rgya ste
sku gsum zad sar rang bzhin grol
gzung 'dzin 'phrang la brgal nas ni
'khor 'das gdos thag chod pa'o
'di nyid yul gnas 'di lta ste
sprin bral phyi yul stong pa la
rnal 'byor nam mkha'i bya lam gnas
118
'di dang ma bral chos nyid do
spyir ni so so'i mtshan nyid las
yul ni tha dad gcig rdzogs gnad
ye shes 'dus pas sems rgyun 'gags
'byung ba 'dus pas lus rdzogs pa'o
khyad par chen po'i snang ba las
smin 'jug bskyod pa'i yul du gnas
rtog mtha' zang phyir 'khor las grol
rgyang zhags yul ni gzugs la sogs
sdud cing 'dzin la 'phen par byed
gnad kyis bcing dang bzhag pa dang
dngos po bsgyur dang rtsa ba bcad
'dren cing gzugs la bslab par bya'o
shes rab yul ni tshig dang don
tshig don 'brel par 'dod pa yis
mtshon pas shes dang brjod pas so
mtshon pa dpe dang brda' mtshon dang
tshig gis mtshon pa tha mar brjod
brjod pas shes pa tha snyad dang
ngo sprod pa dang 'khrid pa dang
la bzla shan dbye dag gis so
thig le'i yul ni kha dog ste
lnga dang drug dang gsum gnyis drug
gsal dang dro dang bsil ba dang
yang zhing g.yo ba'i bdag nyid 'dzin
don dam chos nyid 'byung ba'o
dbyings kyi yul ni stong pa dang
119
gsal dang sgrib bral mdangs 'byin pa
khyab cing yangs la gcig 'dus pa'o
bag rdul dangs pa'i nam mkha' la
mnyam rdzogs chos nyid dag pa'o
gsal zhing ye shes lnga yi gdangs
'od gsal dag pa'i lus nyid do
ye shes dag pa'i sgron ma'i rten
spyir ni rten dang brten pa yis
'khor 'das sa bon 'phel bar byed
rgyang zhags rten ni snang ba la
dag dang ma dag bye brag gis
las dang tshogs pa dag dang ni
sku dang ye shes nyid la brten
shes rab rang byung brten pa ni
tshig dang yin min rtog pa dang
grub pa'i mtha' dang lta sgom dang
chos nyid la ni brten pa'o
thig le stong pa'i brten pa ni
rnam shes nyid dang par snang dang
rtsa dang rlung dang thig le dang
ye shes dag la brten pa'o
rnam dag dbyings kyi brten pa ni
smin mtshams nyid dang nam mkha' dang
'od dang thig le dag dang yang
sna tshogs sku la brten pa'o
de yang rten yul khyad par ni
gsum kyis byed 'dus khyad par brten
120
rgyang zhags nyid las rten pas ni
skyon med bya byed rnams spangs pas
chos nyid ma la spyod pa'o
las dang bag chags dag byed pas
chos nyid mngon sum snang ba la
brten pas 'khor ba dong sprugs te
myang 'das mtshams su reg nus pa'o
rtog dpyod zad pa'i sems nyid kyis
'khor ba rgyang du 'phangs pa yis
ye shes dag pa'i sku mthong nas
'khor 'das gnyis kyi 'dun sa 'jig
gang gis me tog mdzes mthong ba
'dis ni chos nyid yur bar 'drongs
rig pa srang la btab nas ni
chos rnams zad pa'i sar bskyal lo
dbyings la goms par gyur ba'i mis
'khrul snang stongs par byas nas ni
chos nyid dag pa'i yul mthong bas
zhen yul khungs nas thon pa'o
blo rim gnad ni 'di lta ste
'byung ba snod kyi khyad par las
'byung ba'i smin so'i khyad par gyis
'gro ba'i blo yi bye brag gis
rigs dang dbang po tha dad do
de yang 'byung ba'i rnam 'phrul gyis
chu yis sa ni las dag pas
121
thog ma mchod par nus pa la
tha ma zin pa'i chos mi brjed
chu yi mes ni zin skyin brjod
chu yi rlung gis blo bsgyur cing
kun la 'jug cing sa zin med
chu yi rlung gis yas pa dang
yul dang shes pa 'phrad par 'gyur
chu yi chus ni babs che zhing
'du shes chung zhing zin pa'o
sa yi 'byung ba dag pa las
sa yi chu yis tshig 'phel dang
rtog pa sna tshogs spel bar byed
sa yi mes ni mchog tu dbang po dag
gsal zhing 'jam des ldan par ston
sa yi rlung gis rmugs pa dang
bar chad can de res 'jog 'gyur
sa yis sas ni tshigs dang yan lag rgyas par 'dzin
me yis sas ni dbang po rgyas
chu yis 'jug cing khyab par ston
rlung gis dbang po rab tu rno
me yi mes ni zin skyen brjed
rlung gis sa ni don spyod che
chu yis ting 'dzin dmigs pa gsal
me yis tshig la longs spyod nus
rlung gi rlung gis rtog spyod 'dzin
122
'di yi 'byung ba ma dag pas
log pa'i las kun byed par ston
snang ba g.yengs dang shes pa 'gyur
rtog pa rags shing mi dge slong
chos kyi sems kyang spang ba'o
de ltar 'byung ba snod dag pas
thar pa'i lam sna ston pa dang
sku gsum yang dag gtan la 'bebs
de nas ma yi mngal zhugs pas
lo dang zla ba zhag gi rtsis
so so'i 'byung ba'i rang dus kyis
dus tshod nges par bzung byas la
rang rang 'byung ba gso ba yi
rten 'brel sngags pas 'bad de brten
'byung ba bskyed pa'i cho ga yis
dbang po rno la ye shes gsal
gzugs dang kha dog rdzogs pa dang
'gro ba byams zhing longs spyod ldan
sdig spang dge bskyod par smin
des ni 'byung bas bcud bskyabs te
snod kyi kha dog bye brag gis
man shel mdog kyang 'gyur ba bzhin
dri ma med pa'i sems nyid kyang
'byung ba'i snod kyis de bzhin no
nyams su len pa'i gnad 'di'o
dmigs rten nyid dang bsam gnas so
123
dmigs gzugs sgra dri ro dang reg
'dod pa lnga yi gnas sbyangs te
gzugs ni kha dog dbyibs rnams dang
bzo dang sgyu rtsal tha dad dang
mig 'phrul rnam pa sna tshogs pa'o
sgra ni pi wang bum lngir dang
rgyud mangs rdza rnga gling bu dang
pheg dang har la sogs pa'o
dri ni dad ldan sbyar ba dang
yid mthun rten 'brel zab mos bya
ro ni bu ram drug ldan dang
rgun chang sbyar ba sna tshogs bsgyur
rten 'brel yan lag sbyor ba'o
reg ni mkhas pas khri steng 'dug
gzhu bsnol 'byung ba'i sbyor ba dang
shing gi lo ma 'ga' zhig gis
reg pa tsam gyis chos nyid la
'bral med sems kyi gnas pa'o
sems ni bzung dang gnas pa dang
rtsa ba bcad dang dngos pos ded
yul dang shes pa'i bar nas btsal
yengs la bor ba rnams yin no
de ltar nyams su blangs pa las
rtags dang tshad ni 'di lta ste
lus ni yang zhing zang thal snang
sa la reg med thogs med dang
ngag gi nus rdzogs gtam zungs zad
124
sems ni 'pho bar nus pa'o
mig dang rna ba sna dang lce
lus kyi dbang po kun brang ste
rang bzhin med pas nus pa zang
bar ma do yi snang ba ni
rang bzhin gnas pa'i phung po dang
khams dang nyon mongs yul du snang
'chi kha'i ban bun lang ling dang
shes pa gcig tu mi gnas pa'o
chos nyid bar do'i sku dang yang
ye shes 'od dang kha dog go
thig le mched dang 'byung snang dag
cir snang chos nyid gzhal yas so
srid pa'i snang ba phyad phyod dang
yad yud rmi lam snang ba ltar
bden snang rdzun pa yid kyis las
dkar gleg la sogs rigs drug 'od
so so'i dmigs pa'i snang ba'o
rang sems grol ba zhes bya ba
gcig nas gcig tu song ba med
gang gis bkrol ba med pa'i sems
gzhi la rdzogs pas 'gro 'ong med
brtags pas ma rnyed rgyu mtshan med
gzhi rtsa med pas stong par gnas
rang gsal gnas pa'i sems de ni
gnad kyis grol bas phyogs ris min
125
dus kyis grol bas ltos gzhi med
'bad med grol bas rtsol sgrub med
gding gis grol bas 'bad rtsol med
de la gding gis grol bar bshad
ye nas grol bas bskyal gzhi med
rang gis grol bas gnyen po med
cer gyis grol bas mthong sar yal
yongs su grol bas 'bad med pa'o
de ltar grol ba'i sems nyid la
thugs rje med pa ma yin te
gzhi la gnas pa'i ye shes kyis
rang bzhin shugs kyis 'char gzhi byed
mtshan nyid 'dzin pa'i ye shes kyis
rkyen gyis dag pa smin par byed
shes dang shes bya'i ye shes kyis
mos gus can la dngos grub ster
de yang sems nyid smin pa'i tshe
chos kyi sku la gzhi gnas te
ka nas dag pas dri ma zad
ngo bo ye nas 'khrul pa med
'char byed ma 'gags lhun grub po
rang bzhin 'di 'dra nges pa med
kun la khyab pas thugs rje ste
'khor ba 'das pa chad pa min
longs sku'i ye shes mtshan nyid 'dzin
126
yul dngos dag pas me long ste
'khor 'das gzugs brnyan gsal ba'o
phyogs ris med pa'i mnyam pa nyid
dbang po'i yul brten so sor rtogs
'bad pas ma yin bya ba grub
tha dad med pas chos kyi dbyings
sprul pa'i sku la shes bya ste
ji ltar mkhyen pas dngos po yi
gnas lugs rang gi don du shes
ji snyed pas ni gdul bya yi
bsam pa ci ltar gnas la shes
de ltar thugs rje'i 'char tshul las
gdul bya'i 'gro ba tha dad la
'du la byed sku yang de tsam mo
de nyid ye shes gnad bstan pas
dang po gzhi la khyab tshul la
bar du lam la rdzogs pa yi
tha ma 'gro ba'i lus la khyab
lus kyi dus ni 'di lta ste
'byung ba 'dus pa'i phung po yi
tsit ta rin chen gzhal yas na
ngo bo ka nas dag pa'i cha
stong gsal 'dus pa sku yi gdangs
zhal phyag rdzogs pa bum sku'i tshul
lhun grub 'od kyi gong bur gnas
thugs rje kha dog so sor gsal
ro ma rkyang ma kun 'dar ma
ka te shel gyi spu gu can
127
me long mnyam nyid so sor rtogs
bya grub chos dbyings ye shes ni
thig le rgyu dang mi rgyu dang
rang rtsal rdzogs pa'i rten du gnas
dangs ma 'dus pa'i mig gnyis nas
thabs dang shes rab khyad par las
ji ltar mkhyen pa'i thig le dang
dag pa dbyings kyi sgron ma smin
ji snyed pa ni rgyang zhags dang
shes rab sgron mar smin pa yis
'gro ba rnams kyi las kyi yang
dbang po'i bye brag ci lta bar
de la bslabs pas shes par 'gyur
bzhugs tshul gnas lugs rnam pa gnyis
thog ma'i gzhi la gnas pa dang
'khrul pa'i yul la gnas pa'o
thog ma'i ngo bo rang bzhin dang
thugs rje rnam pa gsum du gnas
de yang ngo bo skur gnas pas
chos dang longs spyod sprul pa'i char
ma phye 'byed pa med pa'i tshul
bab las grub pa nyid la yang
sku mdog la sogs blo yul med
rang bzhin 'char byed 'od kyi tshul
dkar dmar ser dang ljang mthing ni
mtshan ma ris can ma yin par
128
ris med shes bya'i bab las grub
thugs rje 'char ba sna tshogs las
'di dra gcig tu nges med pas
sna tshogs snang phyir gzhi zhes bya
'khrul pa'i yul la rang bzhag dang
cog bzhag rang grol rgyas gdab po
dgongs pa gcig las g.yos ba med
snang ba snang ba'i thog gsal bas
bzhin dang me long lta bu las
grol ba de dang de nyid grol
shes pa 'gyu ba yul stong pas
mthong shes rig pa tha dad min
de nyid rang gi thog tu grol
gcig shes pas ni kun grol byed
gnyis dang gsum gyi grangs mtha' zad
rtog cing 'dzin pa'i yul mi snang
'gyu dang 'dzin pa ye nas stong
stong pa'i dgongs pa gsal rdzogs pas
du ma'i grangs mtha' zad pa'o
kun gzhi dang ni chos sku'i gnad
de la kun gzhi re zhig bshad
chos dang chos min kun gyi gzhi
ngo bo nges tshig dbye ba bshad
ngo bo bag chags rnams kyi snod
dbye ba yul dang sbyor ba dang
sna tshogs pa dang ye gzhi'o
nges tshig kun ni 'dus pa las
129
gzhi ni tshogs shing sogs pa'o
chos kyi sku ni spros bral te
rang gar 'dzin pa'i mtshan ma med
ngo bo stong gsal dbyer med la
dbye ba chos dang longs sprul sku
gsum gyi dbye bas khyad par 'jug
nges tshig chos ni yang dag lam
sku ni de las grub pa'o
de ltar dbye ba'i gnad kyis ni
dus dang thabs dang dpe nyid dang
phyed pa'i tshid kyis 'bras bu'o
sems dang ye shes gnad nyid ni
sems zhes bya ba 'khrul rtog la
ngo bo 'jug cing khyab pa la
dran bsam rnams kyi gzhi ma'o
dbye ba dag dang ma dag pa
nges tshig bsam pa dran yul skye
de yang gang la sems dang gang gis sems
gang sems pa dang gang phyir sems
ye shes rtog pa ma yin te
ngo bo rang gsal snying po'i don
dbye ba dag ni gsum du 'dod
nges tshig ye nas gnas pa'i don
de ltar shes pas ye shes te
de nyid dbye ba'i don bstan pa
dus dang thabs dang dpe dang tshad
dgongs pa so so'i 'bras bu dang
130
ye shes rtogs pa'i mtshan nyid ni
lus dang ngag dang sems kyis kyang
rtags dang tshad dang 'jug pa dang
mtshan nyid 'gyur bar shes pa dang
mnyam nyid rdzogs pa'i bye brag go
'byung ba dwangs snyigs byed 'dod pas
don dam kun rdzob dbye ba las
'byung ba la yang gnyis su 'dus
de yi smin po byed las de tsam mo
sa yi snyigs ma rags pa las
de yi smin po phra rab rdul
byed las sha dang de yi nang
dangs mas lus zungs rdzogs pa dang
don dam byang sems spel ba dang
rgyang zhags sgron mar smin pa dang
gnad kyis goms kyang 'grub pa'o
chu yi snyigs mas rlan zhing sdud
byed las khrag dang de yi nang
smin pas chu rdul tshogs pa sdud
dwangs mas rga shi zil gnon dang
byed las chos nyid brtan pa dang
shes rab sgron mar smin pa dang
gnad gyis zas kyi rnal 'byor 'grub
me yi snyigs mas bsreg cing mched
smin pas lug dang glang rngul lo
byed las drod dang de yi nang
131
dangs mas ngag lus rdzogs pa dang
thig le'i sgron mar smin pa dang
gnyid kyi bsam gtan bsgom pa dang
gnad kyis rmi lam 'gags par byed
rlung gi snyigs mas dwangs 'byed bskyod
smin pas nyi rngul rdzogs pa dang
byed las dbugs dang de yi nang
dwangs mas sems bde nus pa dang
byed las chos nyid gsal ba dang
rnam rtog tha dad 'byed pa'o
smin pas dbyings kyi sgron ma las
gnad kyis bag chags drungs nas 'byin
dus dang thabs dang gnad dang tshig
de yi rang bzhin 'jug pa yis
'byung ba'i gnad kyi man ngag rdzogs
sgron ma gtems pa 'di lta ste
dad ldan 'khor ba'i yid bral bas
bla ma mchod dang gtor ma bya
'khor ba'i 'bral pa kun spangs te
dben pa'i phyogs sam dur khrod du
grogs spang gcig pur gnas par bya
gsum po brten pa ma yin par
rang gi mtheb dang mdzub mo yis
thig le stong pa'i sgron ma gtems
gtems pa de las gang byung ba
chos nyid mngon sum snang ba'o
132
de las ye shes 'phel ba'i nyams
kha dog dang ni dbyibs kyis kyang
phyi dang nang kun gsal bar khyab
gong nas gong du nges par 'phel
'di dus lus ngag bde ba'i rtags
snang ba'i tshad dang rim pas sbyar
ye shes rdzogs pa'i snang ba dang
chos nyid dag pa'i snang ba las
snang gsum rdzogs nas zad par 'gyur
de la 'bras bu zhes bya'o
de ltar gtems pa'i snang ba ni
dang po dmar po dag pa yi
dbang rdzogs zlum po rang gsal rdzogs
mdzub gnyis dag las gsum du 'gyur
de nas yang yang gtems pa yis
ye shes lnga yi kha dog ni
dkar dmar ljang gu ser mthing nang
yul la snang ste rtsol ba'o
de nas rtsol bral phyin pa yang
rlung gi cha yis 'gro dang 'ong
me long dag gi dbyibs tsam las
gnyis dang gsum gyi char snang ngo
de nyid rtag tu goms pa las
kha dog lnga yi 'od kyis kyang
re lnge tsam las gru chad snang
yul gru tsam las mthong tshad do
de la goms pa'i tshad rnyed nas
133
thig le'i nang du sku dang bcas
phyed sku dag tu yun 'ga' gnas
de las lnga lnga zung du bcas
rab tu gsal ba'i thig les 'brel
yab yum sku yi snang ba can
'khrul snang zad nas zhing khams so
'di dus lus ngag yid kyi tshad
so so'i snang ba mthong dus kyi
rang la smin pas rtags rdzogs te
zad pa'i tshad rnams mngon par snang
'di la brtson 'grus che chung gis
zhag dang zla ba lo rnams kyis
so so'i dus la nges par 'grub
'gyur ba med pa'i dus dag las
so so'i tshad la phebs pa'o
rtsa yi gnad ni brgya phrag gnyis
de la legs par gnad bsdus nas
brgya dang bco lngas las kun byed
rab tu 'gyur ba rtsa yi gnad
drug cu rtsa brgyad chos nyid sbyor
mchog tu bde ba chen po'i rtsa
gzhi yis 'gro ba'i snang ba ston
gzhi yi gnas dang 'gro ba'i lam
smin pa'i sgo dang byed pa'i las
dus dang de yi snang tshad do
de yi gnad kyi man ngag ni
134
gnas dang 'ong dang 'gro lam rten
smin pa'i sa dang thig le sbyar
de ltar su yis byas pa yis
rnam rtog 'gags nas ye shes skye'o
dus ni rlung gi tshad kyis bzung
'gyu ba'i grangs kyis ye shes gnas
mkhas pas shes pa byas te bzung
byed las lung gi grangs tshad kyis
ma 'khrul pa la chos nyid dang
ma dag las kyi bye brag ston
snang ba'i tshad kyang lus ngag yid
so so'i dus la bab pas so
sems kyi sbyangs pa 'di lta ste
phyi rol yul dang nang gi lus
bar du lus dang sems bsdams pas
ngag gi bya ba'i las kyi bya
mchog tu sems kyis sems la sbyang
yul ni yod dang med pa dang
'gro dang 'ong ba'i gnad kyis bsam
lus ni ming dang phra rab rngul
bye brag du ma nyid kyis gzhig
lus sems bsdom pas bar tu brtags
ngag gi brjod pa bye brag gis
so so'i rlung dang 'gro dang 'ong
dus kyi gnyis med bsres pas 'grub
mchog tu sems ni 'gro 'ong gnas
rgyu mtshan brtag pa med pas sbyangs
de ltar 'byongs pa'i tshad kyang bzung
135
de ltar de yi mtshan nyid rdzogs
nyon mongs pa ni rang rkyen las
rang gi grib mas 'jigs pa bzhin
rang gi rang bzhin mthong bar 'gyur
de yang rlung gi grangs tshad las
brgya dang nyi shu'i grangs kyis shes
la la yul la brten pa yis
bden dang rdzun gyi khyad par 'byung
la la dmigs pa med pa las
gzu bo tsam gyis shes par gzung
la la 'khor 'das 'dod pa yang
bden pa gnyis las sems gnyis 'khrul
de las snang rkyen nyon mongs sogs
gzhan yang rab tu bshad bya ba
snang ba 'khrul pa'i rang bzhin ni
ye shes yin par sngar ma mthong
rtog bcas 'khrul pa'i gzhi med pas
kun gzhi chos sku chen por rtogs
'khrul pa'i rang rtog rgyun chad do
de ltar 'khrul med snang ba ni
ye nas grol ba'i gnad las 'byung
'gro ba'i phung po sangs rgyas sku
ye nas yin par sus ma rig
phung po sangs rgyas lnga bdag tu
rtsa gnas yi ge grub las byung
chu bur mig las ye shes ni
136
ngang snang yin par sus ma mthong
de las 'khrul pa'i snang ba ni
sgron ma'i gnad las byung ba'o
gzhan yang lus kyi spyod lam nyid
sku gsum dag tu grol ba'i phyir
bya byed thams cad chos nyid do
ngag tu ci ltar smras pa kun
gsang sngags gsang ba'i bzlas pa ste
yi ge'i rnam 'phrul gnad las byung
'gro ba'i sems kyi rtog pa kun
bsam gtan yin par ci ma shes
rang sems rtogs las grol bas na
de ni 'byung ba'i gnad las byung
de ltar thams cad chos nyid las
bslab par bya ba gang med cing
gzhag par bya ba cung zad med
gong du med pa'i chos nyid do
bya byed brjod dang bsam pa las
'khor 'das grol ba'i gnad brtags te
sangs ma rgyas pa gcig kyang med
khams gsum 'khor ba dong sprugs so
gzhan yang khams gsum sems can kun
lus ngag yid la ma 'das pas
sku gsum gzhan du btsal mi dgos
btsal kyang rnyed pa'i gnas med do
ma byung byung ba med pa las
bltas pas mthong ba ngo mtshar che
137
ngo mtshar chen po'i rol pa ni
sangs rgyas sems can 'byed pa med
nam mkha' la ni sprin bzhin du
rang byung rang la rdzogs pas zhi
chos nyid mngon sum khyad par gyis
dbang po rno dang brtul med pas
sems can thams cad sangs rgyas las
gzhan du gnas pa ma yin no
lus can sems kyis khyab pa'i phyir
sangs rgyas ma yin sems can min
sa bon las ni 'bras bu bzhin
rang gi rang bzhin gshis kyi gnad
brjod pa'i tshig gis ma yin par
dbang po yul la gsal snang bas
cer mthong grol ba'i bdag nyid do
gzhan yang rkyen gyis sems can rnams
sangs ma rgyas pa gcig kyang med
rang snang ye shes chos mthun phyir
'khor ba ye nas yod ma yin
de phyir rang rang sangs rgyas so
skye ba nyid ni rtog pa las
mngal du gnas pa chos kyi dbyings
lus sems 'dus pas dbyings rig 'brel
lus su gnas pas sku gsum ste
rgas pas chos zad 'khrul snang 'gags
138
na bas chos rnams nyams su myong
shi bas stong pa ngos bzung med
des na sems can sangs rgyas so
de yang chos nyid mngon sum gnad
mthong ba tsam gyis shes pa dang
shes pa yis ni rtogs pa dang
rtogs pa tsam gyis grol bar 'gyur
grol zhes bkrol ba ma yin te
nam mkha' dag ni nam mkha' la
thim nas rang bzhin dmigs med ltar
ris med cha shas yod ma yin
mngon sum mthong ba'i skal ldan la
khams gsum 'khor ba'i ming med pas
srid gsum gdar sha chod pa'o
zhes sgra thal 'gyur chen po chos rnams kun gyi rtsa ba las
gnad 'dus bkod pa rig pa'i rtsa ba nges par 'byung ba'i le'u ste
gnyis pa'o
@3
de nas lha dbang dga' byed kyis
ye shes bkod pa zhes bya ba'i
sangs rgyas bcom ldan 'das la zhus
chos nyid gnas pa ji ltar lags
de las 'khrul pa ci ltar byung
'khrul pa'i rgyu rkyen gang dang gang
mtshan nyid rtogs pa ci yi phyir
sems can tha dad ci yi rgyu
139
rang bzhin rdzogs pa'i gnas skabs gang
ming gi mtshan nyid byed pa gang
las dang dbang po'i 'thad pa ci
tshig gi 'jug pa ci yi phyir
blo dang shes pa gang las byung
gzung dang 'dzin pa ci yi phyir
ngo bo ka dag ye shes gang
rang bzhin lhun grub ci yi phyir
thugs rje kun la gang gis khyab
me long lta bu ci yi phyir
mnyam pa nyid kyi 'dod pa ci
so sor rtogs pa gang tsam zhig
bya ba ji ltar 'grub pa lags
chos kyi dbyings la ji ltar spyod
shes pas bsdus pa'i ye shes gang
ji snyed pa la khyab pa ci
ji ltar mkhyen pa'i dgongs pa gang
ye shes rnams kyi sdom gcig gang
'di dag bdag gis sngar ma 'tshal
ston pa thugs rje chen pos gsungs
nam mkha' mi 'byed par snang nas
sus kyang byas pa med pa'i tshig
rang bzhin rtog pa gang med par
brjod med bsam dag sgra las kyang
tshig gi rgyal po 'di dag ni
ston pas gsungs pa'i tshul du shar
chos nyid gnas pa zhes bya ba
dus kyi gnas dang rang bzhin dang
140
'pho ba nges pa'i tshad kyis gnas
ye nas gnas deng 'bad pa dang
rkyen dang rgyu rkyen bar skabs so
dus kyi gnas pa'i chos nyid ni
dbyar dgun ston spyid cha bzhi las
ston gyi dang por phung po dang
khams dang ye shes rgyas pa'o
'di dus rten 'brel zab mo bstan
zla ba mar gyi dgu dang brgyad
yar gyi bcu bzhi lnga la gnas
zhag ni bcu gnyis cha yi phyed
nyi ma'i dus kyang bcu gnyis la
cha yi rnam pa bzhi la gnas
'di dus chos nyid sbyang bar bya'o
rang bzhin du na gnas pa dag
phyi rol yul dang nang gi sems
bar gyi dbugs la gnas pa ste
'di yang rnal 'byor pas shes bya
'pho ba nges pa'i tshad gnas ni
'gyu ba chen po'i rlung dag gis
so so'i gnas skabs 'gyu tshad la
lnga brgya dag la re re nyid
chos nyid gnas pa'i 'pho ba ste
rtog pa 'dzin pa stong tshigs la'o
rigs drug so so'i ltung ba'i gnas
rlung gi 'gyu ba'i mtshams sbyar bzung
de la sems nyid gnas pa'i thabs
lnga brgya'i dus nas brtsis nas ni
so so'i dge ba'i sbyor kha 'bad
141
'di yang rkyen gyis nyon mongs 'gyur
so so'i rlung gi mtshams nas bzung
tshe tshad las kyi bye brag yang
rlung gi 'gyur las shes par bya'o
ye nas gnas pa'i chos nyid ni
snang ba med pa thog ma'i dus
rang bzhin bcos pa med par gnas
dri med sems kyang de bzhin no
'bad pas mngon sum gnad gzir bas
ma bcos gzhi la gnas pa'o
rkyen gyis gnas pha 'byung ba yi
lus kyi bye brag dag pa dang
ma dag pa yi khyad par gyis
ye shes gnas pa'i byed pas ni
so so'i dus tshod mkhas pas bzung
rgyu yis gnas pa'i sems de ni
kun la khyab phyir chos nyid dang
bcos pa med na gnas pa yin
bar skabs gnas pa rlung gis drang
'gyu ba phra ba'i bar du shes
'di ni ye shes gnad 'dus pa'o
de las 'khrul pa rgyu dang rkyen
cha dang yan lag las nyid dang
ma smin rnam rtog 'khor ba'o
ma rig pa ni rnam pa gsum
bdag nyid gcig pas 'khrul rtsa byas
lhan cig skyes pas rtog pa gnyis
142
kun tu brtags pas yul du gyur
kyen ni rnam pa bzhi dag gis
'dus shing bzung bas 'khrul zhes bya
cha ni 'du byed la sogs pas
'khrul yul cha la bcu gnyis phri
smin pas lo dang byed las so
yan lag spros pa tha dad las
thams cad ming gi bye brag tu
'khrul ba'i yul la rnam gnyis 'gyur
las kyis 'dod dang gzugs kyi khams
gzugs med khams te rnam gsum byed
ma smin pa ni rigs drug gzugs
ming dang bye brag tha dad 'gyur
rnam rtog bag la nyal ba dang
kun nas ldang dang khyab tshul lo
'khor ba zhes pa mtshungs pa dang
tshogs pa'i las te sdud dang mched
rdzogs dang bye brag sna tshogs pa'o
de ltar 'khrul zhes ming tsam las
rtog 'dzin byed pa'i rtags dang ni
tshogs shing sdud pa'i byed pa can
ming gi bye brag gis brtags so
'khrul pa'i rgyu ni ma rig pa
gzhi dang shes pa spags pa dang
gzung dang dbang po 'khor tshul lo
rkyen ni yul dang gzung cha las
143
mtha' dang mtha' yi byed pa dang
gcig ma shes pa dmigs rtan no
gzhi ni gar yang 'byed med cing
nges pa med pa tsam las so
shes pa 'ju dang yal pa dang
mched par 'dzin pa rnams yin no
sbags pa dri mar 'dzin pa ste
shes byas rang rgyud bcing pa'o
gzung ba ma yin sa la yang
bden pas dam du bcing ba'o
dbang po yul dang shes pa'i chas
rtag 'dzin yul der snang ba'o
'khor tshul gcig par shes pas ni
rnam rtog gnyis gnyis zung 'jug go
mtha' yi byed pa las dang rgyu
'byung ba dbang po'i las su 'gyur
gcig ma shes dang ka dag las
chos nyid rang ngo ma shes pas
rgyu dang mtshungs pa'i nyer len no
dmigs pa'i rten ni kha dog las
gnyis cha phra ba'i 'gyur rten gyis
'khor ba las kyi dmigs gyur to
mtshan nyid rtogs pa'i bye brag ni
yod dang med dang snang ba dang
gsal dang stong par gsal 'dzin
rnam shes 'dzin pa'i gzugs can no
yod pa dngos po'i byed pa can
144
snang dang mtshan nyid 'jug pas khyab
las dang bye brag nye bar ston
med pas gzugs la sogs pa spang
yid dang shes pa'i 'jug pa can
mtshan nyid rtag tu ma rnyed pa'o
snang ba gzugs la sogs pa ste
'dzin cing mched pa sdud par byed
gnyis 'jug khyab pa'i rang bzhin can
gsal bas rang ngo ston pa dang
mi snang ba las log pa'o
stong pa skye ba ma yin las
gdangs deng mtha' dbus med par ston
ma byung bas na 'gag med do
rags pa rngul dang phra rags las
sna tshogs gzugs su rdzogs pa dang
reg yod 'jig par snang ba'o
'dzin pa dbang po'i yul dag la
so so'i bzung bas 'ching ba dang
bdag dang nyon mongs las kun byed
rnam par shes pa rtog pa'i cha
yul la 'jug cing spyod pa dang
rtog dang las kyi rnam par rtog
gzugs can rig bcas bem po ste
sems sdud pa dang bkod pa'o
sems can kun gyi tha dad rgyu
'byung ba'i rgyu dang byed las dang
dbang po nyid dang dbyibs dang tshad
145
sgra dang so so'i brjod pa dang
gnas pa'i snod kyi bye brag go
'byung ba'i rgyu ni bzhi dag las
brtags pas drug cu dag yin te
rnam par phye bas bzhi brgya bzhi'o
byed pa'i las ni bzhi dag las
brtags pas bcu gnyis dag tu 'gyur
de las rigs drug tha dad do
dbang po mig la sogs pa yi
dbyibs dang kha dog mi mthun pas
bzhi brgya dag dang bzhi yis kyang
sems can lus kyang tha dad do
dbyibs ni lus dang yan lag dang
so so'i gling dang dbang pos kyang
'gro ba'i gzugs kyang des phye'o
tshad ni rigs drug so so ste
thog ma bar dang tha ma dang
so so'i bsod nams las kyis dbye
sgra ni ring dang thung ba dang
drag dang zhan dang gzir dang dbyung
phra dang seng dang rtse mo'o
dngos po sa chu me rlung gis
shes pa nyid dang bsod nams dang
dbang thang lus kyi shas kyis brtags
brjod pa gnas dang 'byung ba dang
las dang rtog pa rang gnad do
gnas pa'i snod ni dag pa dang
146
ma dag pa yang bcud kyis dbye
des na 'byung ba'i rang gnad las
sems can lus kyang tha dad do
rang bzhin rdzogs pa'i gnas skabs ni
chos nyid dbyings dang rang ngo dang
'gyu ba stong dang rtog pa zad
gzhi rdzogs lam dang 'bras bu'o
chos nyid sus kyang bcos su med
rang bzhin dag pa spros pa bral
rnam rtog tha dad yul las 'das
tshig byung 'khrul pa rgyun chad pa'o
dbyings ni phyi dang nang gi ste
phyi ni sprin bral mkha' la 'dzin
bag rdul char gyis dengs dus su
mkhas pas mngon sum gnad gzir dang
nang gi sgron ma lam du bya'o
rang ngo rig pa lu gu rgyud
'gro 'ong phral te mkha' la'o
'gyu ba rlung gnyis byed pa bcad
dgu pa yi ni rlung gis dbye
gnas su 'jug pa thabs kyis dbye'o
dpe ni rlung dag stong pa yi
snang ba thams cad zad par 'gyur
de ltar rnam rtog zad pa dang
skye med ye shes dus mnyam ste
'di tshe 'khor 'das 'dres pa'o
de yang gzhi la rdzogs pa'i gnad
rang bzhin ma bcos mngon du snang
147
lam ni sgron mas mtshams sbyar nas
mngon sum nyid du snang ba'o
'bras bu gang du bzlog pa med
'dod dang re dogs yul las 'das
rang snang ka nas dag par rdzogs
shes 'dzin rtog pa kun zad pa'o
ming gi mtshan nyid byed pa ni
rgyu dang rkyen dang btags pa dang
mtha' dang dang po tha ma bsgyur
brtags pas ma rnyed tha snyad gzhi'o
ming gi rgyu ni tshig gi brda
mtshan nyid gang du ma grub pas
ltar snang gdags su med pa'o
rkyen ni dbang po thad ka'i yul
so so'i snang zhen bcas pa la
kun gzhi tshogs pa'i snang char shar
gtabs pas brda dang sgyur byed las
mtshan nyid nye bar ston pa dang
khyad par ming gis gang bsgyur gnad
so so'i skabs dang sbyar byas nas
bcom ldan 'das kyang 'jig par 'gyur
mtha' ni 'byung ba'i gnad kyis dbye
bsad dang gso dang 'jig pa'i las
ming dang rten cing 'brel bas bya'o
dang po btags pa'i ming yi ge
dang po dag la brten pa yis
148
bsad dang gso dang gnas pa nyid
so so'i tshad kyis shes par gyis
tha ma bsgyur ba'i ming gi mtha'
bzlog cing bzhag pa 'byung lus sbyar
yang dag chos nyid rtag bral la
ming gi mtshan nyid rab phye nas
phyi dang nang la rab brtags pas
ming gis mtshan nyid ma rnyed pas
rang gi cho ga rdzogs par 'dod
tha snyad rnams ni tshig gi mtha'
gang du'ang yod med mtha' yis dbye
lus sems gnyis la brtags gzhig pas
tha snyad gzhi yang stong pa'o
gzhi ni gcig dang gnyis su min
gtabs stong yod med mtha' 'gags te
byas dang byung ba sus mi rnyed
de bzhin gnas dang 'gro 'ong med
de phyir chos nyid stong pa'o
sems can las dang dbang po ni
rlung dang shes pa phyi snod dang
'byung ba spyi dang khyab byed tshul
gsum dang dgu dang nyer gcig go
sems can las ni rlung gi yang
'byung ba'i 'phen pa dag tu phul
de las las kyi bye brag gis
'jug cing thabs kyis rab tu 'byed
de yi byed pa'i shes pa ni
149
mkha' la sprin gyi rang bzhin nyid
rlung gis gtor ba ci bzhin du
dum bu dum bus las snang ston
de las lus dag yid gsum la
smin pas las kyi rnam par ston
'byung ba sa chu me rlung gis
lus su rdzogs pa rlung gi las
khyab byed sems can thams cad la
'byung bzhi'i lus las ma 'das pas
so so'i las kyi sdebs su'o
tshul ni gzugs su grub pa dang
de yi las kyi snga phyi las
so sor blangs te myong bar 'gyur
dbang po gsum ni rab 'bring tha
des ni theg gsum 'du shes bral
de las gsum gsum rab phye bas
dgu ste theg dgu dbang po'i gnad
de las gnyis su rab phyes te
dgu phrag gnyis te snang ba'i cha
gzhi la gsum bzhag nyer gcig gis
snang ba nyer gcig rdzogs pa'o
tshig gi 'jug pa 'di lta ste
tshangs pa khyab 'jug brgya byin dang
mkha' lding dbang phyug drag po dang
so so'i sgra dang lha yi skad
gnas gzhan brtsis pas chig la 'jug
tshangs pas tshigs bcad dang po dang
150
phyed rdzogs gnas gzhan brgyad du 'gyur
dbang phyug gis ni tshigs bcad dgu
de yi gnas kyi phyed gnyis 'gyur
khyab 'jug gis ni stong gnyis la
gnas la dbang bas gcig rdzogs pa'o
brgya byin gyis ni tshigs bcad lnga
sgra yi bzlog pas gsum gnyis rdzogs
mkha' lding tshigs bcad drug gis kyang
rtags phye bas ni bdun gnyis pa'o
drag pos 'jug pa gsum gnyis la
rtags bkod las kyi bdun bzhi'o
so so'i sgra ni gnas pa dang
'jug dang 'byung ba ldog pa las
dus la brten pas lnga ldan rdzogs
lha yi skad ni stong phrag drug
yan lag spras pas de nyis 'gyur
gnas gzhan rtsa ba gzhi dag las
tshig la rtog pas gnas brgya gnyis
de las spros pas bzhi brgya bzhi
khyad par nges pa'i rtsis bcur 'gyur
de dag rab tu sbyor shes pas
tshigs las dbang ste smra ba'i rgyal
des ni sbyor mchog nges 'grub pa'o
blo dang shes pa zhes bya ba
151
sems dang yid dang 'gyu ba dang
'phro dang rgod dang rengs pa dang
yul dang 'dzin dang zhen pa'o
sems ni dag dang ma dag pa'i
khams gsum po yang sangs rgyas 'jug
yid ni ngo bo nges tshig dang
dbye ba dag gis shes pa 'gyur
'gyu ba dran dang snang ba'i cha
brtags pa las ni blo 'gyur ro
'phro ba yul gyi las mtha' las
blo dang shes pa'i rtsal du snang
rgod pa rlung gi byed pa'i las
'du byed blo dang shes pa'i brda'o
rengs pa nyon mongs gsum dag las
blo zhes 'gyur dang shes pas gcod
gnyis 'dus pa las shes gsum 'byung
yul ni sgo lnga'i snang cha las
blo dang shes pa'i 'jug cha byung
'dzin pa mig la sogs pa yis
de dang de la blo shes dngos
zhen pa blo yi rtogs tshad bzhi
shes pa'i tshad las brgyad du 'gyur
de las 'byung bas 'dzin chags so
de ltar snang cha'i byed pa las
gzung dang 'dzin pa gnyis su shar
gzung ba yul la 'dzin pa sems
yul sems 'dus pas dug gsum mo
152
yul gnad dbang la dbang gnad sems
sems gnad mig la mig gnad rtsa
des na lus kyi 'dug stangs la
bag chags lus kyi 'brel chod dang
sangs rgyas dgongs pa rdzogs pa'o
rtsa ni rten 'brel 'khor lo yis
btsal zhing gzung dang spel ba'i gnas
rnal 'byor pa yi yan lag go
ngo bo ka dag ye shes las
ma rig pa zhes srid ming med
gcig dang gnyis kyi grangs med pa'o
brtags pas yod med grub pa med
gang du ma phye chos nyid las
ye shes tsam du'ang grub pa med
tshig med brjod pas grub pa med
mtha' la mi gnas rang rig dag
gzung 'dzin ming gi mtha' zad pa'o
rgyu med rkyen gyi grangs med la
gnyis snang yul dang yul can med
mtshan nyid gang du'ang phye ba med
yul rkyen rags pa rang zad pa'o
ye nas med pas dag pas dag
'khrul rtog 'gags pas cir mi mdzad
ma skyes pas na 'gag stong ngo
rang bzhin lhun grub ye shes zhes
mi skye mi 'gag cir mi dgongs
yul dag nges pa med phyir ro
153
rtsal dang yon tan 'gags med pas
rol pa tsam du snang ba las
sna tshogs rdzogs pa'i gzhi ma'o
med phyir snang la snang phyir stong
snang stong 'jug pa'i yan lag can
sangs rgyas sems can dag yul lo
'di ltar gzhi zhes mngon par gnas
rang bzhin tsam du gnas pa las
ngo bo'i cha nas brtags pas stong
yan lag spros phyir mkhyen pa rdzogs
rang gnas lhun gyis grub pa'i phyir
'di la spang blang gnyis med pa'o
thugs rje kun khyab ye shes las
mi mdzad sna tshogs 'char ba'i sgo
mdzad pa ltar snang ngo bor rdzogs
chos sku stong pa'i rang bzhin las
ye shes mkhyen pa rdzogs pa'i cha
shugs kyis sems can rnams la 'char
de med 'khor 'das lte chad pas
mkhyen pas rig cing gsal ba'o
rang rig gsal ba'i bdag nyid las
rang bzhin shugs kyis thugs rje nyid
ma 'gags 'gag pa med pa'o
'byung ba dag pa'i cha nas ni
las su med pa gcig rdzogs pa'o
nyi ma las ni 'od bzhin du
154
rang chas sgrib pa med pa'o
de las mtshan nyid 'dzin pa yi
longs sku'i ye shes bshad par bya'o
me long ye shes gzugs can gsal
dbyibs dang kha dog snang cha rdzogs
dkar po dri ma dag phyir ro
rang chas snang ste 'khor 'das sbyor
chos rnams kun gyi gzugs mthong bas
rang gis ye shes zhes bya'o
gsal zhing stong la stong par grol
grol 'dzin mtha' yi rtog pa zad
gzhan med grol gzhi rdzogs pa'o
mnyam pa nyid ces bya ba ni
mnyam rgyu gnyis la mnyam rkyen gsum
mnyam pa'i dus dang tshad kyis so
'di la gnyis med rig dang bral
mi phyed mi 'byed rang gnas nyid
mnyam pa zhes bya chos nyid la
zug rngu spros pa bral ba'o
nyid ces bcos zhing rtsol bsgrub med
rang bzhin gnas pa ngo bo stong
sems nyid rtog pa kun zad pa'o
ye shes zhes bya gnas pa la
de yi mtshan nyid rtogs pa yis
'khor 'das gnyis la mi gnas pa'o
so sor rtogs pa dbang po'i rigs
155
gang la snang ba de yi chos
rim pa so sor gsal ba'o
brtag pa rang snang dag nas ni
rig pa yul du gyur pa nyid
so so zhes bya bye brag las
gnyen po'i tshul du byung ba ste
rtogs pa zhes ni mtshan nyid mthong
rang snang 'phel dang bcas pa'o
ye shes thog mar byung ba las
shes pas nyon mongs skyon dag go
bya ba grub pa zhes bya ba
'bad cing rtsol ba rang 'gags nas
chos kun rang bzhag rang grol lo
rang grol rdzogs pa'i gzhi snang las
cha phra rdul bral dri med thob
rtog dpyod yul las 'das pa ste
gang gis ma phye chos nyid do
rang bzhin rdzogs pas snang mtha' zad
cig char rtog pa bya ba'o
grub pas 'dod pa bral ba la
bskyar dang ldog pa med pa'o
ye nas gnas pa'i don nyid la
shes pas mngon du gyur nas ni
chos rnams zad pa'i sar phyin pa'o
chos kyi dbyings ni yangs pa la
mtha' dang dbus su mi dmigs pas
grol gzhi chos nyid dag pa la
chos ni spyod par byed pa las
156
'das dang 'jig rten bya ba byed
rang bzhin gsal zhing dwangs pa'o
dbyings ni go skabs 'byed pa las
rang byung chen po'i gnas pa'o
ye ni gnas pa'i bdag nyid la
thog ma nas ni bcos pa med
shes pas 'khor 'das gnyis las 'grol
rang snang rdzogs pa'i dgongs pa'o
shes pas bsdus pa'i ye shes ni
sangs rgyas sems can thams cad la
dbyer med rang bzhin med par khyab
de yang sangs rgyas rnam dag rdzogs
dri med rngul dang bral bar gnas
sems can rigs drug snang cha la
so so'i rgyud la gnas pa de
lha rnams rang gsal rdzogs pa ste
lha min rnams la phra zhing 'khyug
mi rnams rang gsal zlum po nyid
byol song rnams la nang du gsal
yi dwags rnams la phra pa la
dmyal bar rang snang rdzogs pa'o
shes pas rig cing rang sa gsal
bsdus pas ngo bo rang rig pa
ye ni gsal zhing mkhyen rig cha
shes pa rang grol dkyil 'khor gcig
shes byas bsdus pa'i ye shes ni
157
rnam pa gnyis su shes par bya'o
de la shes bya ji snyed bshad
'dis ni gdul bya'i bsam pa mkhyen
gzhan don khong du chud pa yis
chos rnams rang bzhin shes pa'o
ji zhes bya ba gnas lugs la
snyed pas ma lus rdzogs par byas
ye ni sems can kun don la
shes pas khams gsum don nas 'byin
sprul pa'i sku yi mkhyen pa'i cha
rang snang ngo la rdzogs pa'o
ji lta mkhyen pa'i ye shes bshad
snang chas brjod gzhi bral ba la
rang snang dag pa'i gzugs brnyan gsal
dngos po'i gnas lugs mkhyen pa las
rang don rtogs pas 'khrul rgyun zad
ji zhes bya ba gnas lugs las
lta ba yengs pa med par spyod
mkhyen pa 'gag pa med phyir rdzogs
ye ni lam du gyur pa la
shes pa tshad du phyin pa'o
ma bcos rang grol chen po yi
gzhi la g.yo ba med pa'o
ye shes rnams kyi bsdom pa ni
mtshan nyid khyab cing gsal ba la
rang bzhin gsal stong dbyer mi phyed
158
ngo bo gang du'ang phye ba med
dbye ba bzhi yis bsdus pa las
rtog 'jug thabs kyi bye brag ston
gzhi dang snying po me tog gis
mdzes shing yang dag rdzogs pa nyid
khyab dang khyab byed tshul gyi yang
rang snang gzhi la ston pa dang
rnam rtog zad par byed pa'o
khyad par 'dus pa rnams phye ba
rtog bral chos nyid rang gdangs las
dmigs med ye shes snang ba 'byung
de la rnal 'byor sems rdzogs so
yang dag 'dus pa'i yan lag tu
ye shes gnad ni mig las 'byung
mig gi gzigs stangs shes pa yis
chos kyi dbyings dang lhan cig spyod
khams gsum po ni zad bya'i phyir
mig gi phugs na 'phar ba'i rtsa
gyen la bzlog pas ye shes 'bebs
gnad las byung ba'i ye shes gang
rig ldan chos nyid ci bzhin du
rtog pa kun las rnam grol bas
dbyings las byung ba'i ye shes so
mig gi gnad ni steng dang 'og
mkhas pas rtsol ba'i sna gang 'gyur
kun 'dus ye shes snang ba'o
yang na mig gi ye shes la
kha dog lnga yi rab phye bas
159
dkyil 'khor rdzogs pa'i gzugs 'dra ba
'di las 'byung ba'i nyams myong ni
gang gis brjod par mi nus pa'i
e ma ngo mtshar che ba nyid
yon tan rdzogs pa'i snang ba'o
khyab cing cha phra ye shes las
mngon sum pas dang lam du'o
gzhan yang rab tu bshad bya ba
rnam rtog 'dus pa'i dran bsam las
chos kyi sku yang gzugs su 'gyur
gal te khams gsum 'das 'dod pas
dam pa'i ye shes gnad che bas
so so'i rlung gi dbugs su brtags
chos kun dri ma rang dag las
sku gsum lus kyi dpus su rdzogs
'di la rtog pa ci yi phyir
dran bsam 'dus pa'i rang bzhin las
chos kyi sku yang 'khor bar 'gyur
gang tshe 'khor ba'i mtha' zad pas
byas pa med par rang sar grol
grol ba 'di la ci yang med
med phyir chos nyid dngos po min
ye shes rdzogs pas 'khrul rgyun chad
chad pas 'gro dang 'ong ba zad
zad phyir stong pa'i ye shes so
sku gsum ye shes ma 'gags pas
khams gsum po yang yod pa stong
160
'gro zhing 'byung ba rnyed pa yis
dngos po dag pas gzugs zad pa'o
gzhan yang snang ba'i ye shes bshad
sa chu me rlung nam mkha' las
ye shes snang ba ngo mtshar bas
bcom ldan mgon po rig med pa'i
brtags pas ma rnyed ye shes ni
khams gsum gdar sha chod pa las
sgo lnga'i zhen rgyun gcod pa'o
zla dang nor bu mar gad 'od
gang gis 'dzin par 'dod pa yi
'dzin byung sku yi snang ba bzung
yang ni rdzogs pa chen po yi
gnad shes pa las ye shes ni
bya bral nam mkha' ji bzhin du
kun tu rtogs pas sngo dang bral
ngo mtshar rmad byung ye shes ni
sngon med phyis med gdod nas med
da lta rnam rtog yul las 'das
mtha' bral stong pa'i rang bzhin no
tshig 'das blo bral ngo bos stong
rang bzhin gang du ma phye bas
thugs rje mdzad pa mi snang ngo
ye shes snang ba gsum pa las
yid 'byung shes rab 'khrul char bzung
'di la rnam par dmigs mtha' med
med pa rmad byung rol pa las
sangs rgyas rnams kyi 'bras bu rnyed
161
phyi dang nang kun chos kyi dbyings
'di la gang yang mi snang ngo
gzhan yang yul gyi ye shes bshad
gzugs dang sgra yi bye brag las
bslab bya'i nyams kyang lngar 'gyur ro
shes pa'i nyams zad snang ba ste
'phel ston zla ba yar ngo bzhin
snang ba re la nyams re 'ong
drong dang tshad dang rtags las ni
bden gnyis zung 'jug rtog mtha' zad
bya ba med pas mtshan nyid stong
brjod gzhi 'gags pas mtha' mi gnas
zad pa zad phyir rdos bcas min
dran pa'i khong 'gag ngo bo gsal
gsal rig yul gyi mtha' mi rtog
sgra bral yang dag tshig med phyir
ltos gzhi thams cad zad pa'o
gzhan yang 'dod yon mngon par spyod
gzugs kyis bslab pa gnyis dag ni
dmigs pa'i rten dang dmigs med do
yid mthun las kyi khyad par gyis
sngon du bla ma mchod byas la
dbyibs la goms te kha dog la
goms par byas pas 'khrul snang 'gags
sgra ni dmigs pa'i rten dag pas
pi wam rdza rnga bum ldir dang
dra ba rgyud mang mdo gsum pa
162
har dang gling bu cha lang dang
pheg rdo bcang te'u dril bu sogs
so so'i sgra la rlung yang sbyar
dri ni yid mthun dmigs rkyen gyis
dad dang dad pa chen po dang
mchog dang khyad par chen po yis
rnal 'byor pa yi bde chen sbyor
ro ni bur ma drug ldan dang
rgun chang 'bras chang mkhas pas sbyar
sdom ldan rim pa lnga shes pas
myang ba tsam gyis ye shes 'bar
reg ni yid mthun dmigs rten la
so so'i rig pa nyams myong sbyar
shing lo g.yas 'khyil bskum dus la
bslad ste reg pas sangs rgyas rtogs
chos ni bla ma'i lung dang bstun
gal te bsgom pa bzang po rtogs
'di ltar brtsams pas lam du slong
khams gsum 'khrul 'khor rgyun chad do
gzhan yang ye shes snang ba ni
dri med dag pas dkar po las
yon tan rdzogs phyir snang ba'i gzugs
mi 'byed rdzogs pa'i gzugs skur 'gyur
yon tan bskyed pa'i ser po las
gzhi dang 'byed pa dus mnyam pa'i
las su chos nyid ston par byed
rang rtsal rdzogs pa'i dmar po las
163
rang bzhin dag pa'i dkyil dang 'khor
mu khyud rab rdzogs par ston
bya rtsol bral ba'i ljang gu las
phrin las dag pa'i sprul pa 'byung
mi 'gyur rdzogs pa'i mthing ga las
mtha' dbus mi gnas khyab par stong
rang bzhin dag pas sku gsum bzhi'o
zhes sgra thal 'gyur chen po chos rnams kun gyi rtsa ba las
ye shes bkod pa snang ba'i rtsa ba nges par 'byung ba'i le'u ste
gsum pa'o
@4
de nas lha dbang dga' byed kyis
ston pa khyab bdag chen po la
chos nyid bkod pa'i rang bzhin zhus
kye kye yang dag rdzogs sangs rgyas
bdag ni ye shes bkod pa las
'khor ba'i las las dbugs phyung ste
myang 'das lam la gzengs kyang bstod
rang bzhin snang ba'i yul yang mthong
sangs rgyas dgongs pa'i gding rnyed kyang
ma 'ongs 'jug pa'i sems can rnams
rtog bral ye shes rdzogs don du
chos nyid bkod pa mnyam par 'tshal
gnas pa'i chos nyid gang la bgyi
'gyu mtshams nyid kyi gnad de gang
164
dus kyi chos nyid ci ltar dbye
sangs rgyas chos nyid ci lta bu
sems can dus na ci ltar gnas
lus kyi gnad ni gang dang gang
sgo nas ci ltar byung ba lags
yul la snang ba'i mtshan nyid glang
de la ci yi snang bar 'gyur
mthong nas gtan la ci yis dbab
phebs nas rdzogs pa'i tshad gang lags
tshad phebs lus ni ci ltar 'gyur
sems ni gang dang gang lta bu
'brel ba chod pa'i chos nyid gang
rgyu 'bras chos nyid ci yis bsgrub
rang sar dengs pa'i chos nyid gang
chos nyid nges pa'i tshig gang lags
gnad kyi chos nyid gang dang gang
'byung dus gnad 'di ci yis bzung
bar do'i chos nyid ci lta bu
de yi mtshan nyid snang tshul ci
'di dag sems can don du gsung
de nas ston pa rdo rje 'chang
rang bzhin dag pa'i nam mkha' las
sgra tshig spros pa 'di lta bu
brjod pa med pa'i gzhi la shar
e ma ngo mtshar rmad du byung
zhing khams gzhan du ma grags pa'i
ngo mtshar brjod pa bstan par bya'o
gnas pa'i chos nyid 'di lta ste
165
gshis kyi gnas pas dge sdig bral
rgyu 'bras gnas pas ltos pa bral
rkyen gyi gnas pas 'byung ba dag
'pho zhing 'gyur ba ma yin no
'gyu mtshams chos nyid 'di lta bu
ngo mtshar che bas rab tu bshad
rlung ni zhag gi rim pa yis
nyi khri dang ni gcig stong dang
drug brgya ru ni brtsis pa yis
zhag gcig la ni rlung rdzogs so
ci ltar so so'i bye brag gis
chung ba rnams la drug cu lhag
rgas pa dag la chad pa yin
'byung ba snod kyi las kyis so
'gyu ba'i rlung ni drug cu la
phra 'gyur chos nyid rtsis kyis bzung
de phrag gnyis las rags pa ste
de bsdoms gsum la spom po nyid
de las gsum dbri mnyam pa'o
mdor na 'gyu ba nyi shu'i bar
chos nyid mnyam pa re re'o
dus kyi chos nyid 'di lta ste
phyi dang nang dang gsang ba dang
kho na nyid dang bzhi yin no
phyi ni ston gyi gnyis pa las
dus kyi chos nyid gnas pa ston
nang ni skya rengs shar dus so
gsang ba gnyid dang rmi lam mo
166
kho na nyid ni rlung gis bzung
dus la phebs na rdzogs pa'o
sangs rgyas rnams kyi chos nyid ni
ma phyes mi 'byed mnyam pa las
sgra tshig ming du ga la srid
ltos gzhi rang dag 'khrul pa dag
'khor 'das ming du ma grags so
ma byung ma skyes 'gag pa med
kun 'byung ye shes gang ma yin
len pa med cing grol ba med
rgyu rkyen bral ba'i skad cig las
sangs rgyas sems can gzhi mar snang
du ma cha shas kun bral ba'o
gal te 'khrul pa'i sems can la
sku dang ye shes rang lugs te
rnal ma so ma lhug pa ste
gyi nar gnas pa kho na dang
dbang po yul la rang bzhin no
'dir ni rang yul bstan pa las
'khor rkyen 'jug pa ma yin par
zad ma nyid dang thal byung du
yul dang shes pa'i snang cha las
thad ka so so'i gzhi las grol
'dod yon rnams ni rang rdzogs te
sna tshogs 'gyu ba so so'i gnad
gcig shes pa yis grol bar gnas
des na chos nyid rtogs pa ste
cha shas nyid dang bral ba'o
lus kyi gnad ni 'di lta ste
167
spyi dang tsit ta rtsa yi gnad
ma bcos dag pa'i chos nyid gnas
sems can kun gyi lus spyi la
chos nyid rlung gi tshul du khyab
phra dang yang dang 'gyu dang 'byed
byed las bzhi yi tshul gyis ni
dus bzhi'i rnal 'byor shes par bya
tsit ta'i nang na skur gnas te
gdangs kyi sku ni rnam pa lnga
so so'i rigs kyi mtshan nyid 'dzin
zer gyi sku ni drug gis kyang
rang bzhin snang ba'i chos rnams sdud
dag pa'i sku ni rnam gsum gyis
mya ngan 'das pa'i mtshan nyid 'dzin
rnam pa'i sku ni brgyad kyis kyang
sa lam rdzogs pa'i bya ba byed
rtsa yi nang na thig le ste
'jug pa'i thig le rnam gsum gyis
'khor 'das 'brel ba'i sa bon 'debs
skye ba'i thig le lnga yis kyang
rnal 'byor nyams kyis dkyil 'khor 'jog
bkod pa'i thig le drug gis ni
chos nyid du ma gcig tu sdud
de dang de la brten pa yis
chos kun mnyam pa'i bdag nyid do
sgo nas ci ltar 'byung ba ni
'jug pa'i rlung gis bskul ba yis
168
sgron ma bzhi las las bzhir 'gyur
khyab pa'i rlung gis bskyod pa yis
rig pa nyid las lu gu rgyud
smin pa'i rlung gis bsdus pa yis
lnga lnga zung la skur snang ba'o
mig las rlung gnyis gzung dang 'dzin
g.yas pas bzung bas snang ba spel
g.yon pas 'dzin pas kha dog dzogs
rna ba khyab dang 'jug rlung las
g.yas pas khyab pas sgra rnams ston
g.yon pas 'jug pa lung gi las
gang dang gang rnams 'dzin par byed
spyi gtsug khyab par rdzogs pa'i lung
phra zhing bskyed pa med pa las
rig pa'i sku yang 'dzin pa'o
yul la snang ba'i mtshan nyid ni
nam mkha' sngo sangs rdzi med las
'od dang kha dog dbyibs nyid dang
ye shes lnga yi rang snang ston
dag pa dbyings kyi sgron ma las
thig le sku dang 'khrul snang dag
rang bzhin nyid dang ngo bo nyid
gnyis med 'du 'bral med par snang
'di dus zad pa'i mtshan nyid ni
bya bral nam mkha' ci bzhin no
de la ci yis mthong ba ni
goms dang gnad kyis mthong ba ste
169
goms pa sngon du 'gro ba nas
brtsams te lus dga gnad gzir bas
rang snang dag pa'i gzugs mthong nas
'khrul pa thams cad nub pa'o
gnad kyi lus kyis mthong bar byed
chos sku'i bzhugs stangs seng ge yis
'khrul pa'i 'jigs pa kun bral nas
rdo rje'i mig gis mthong bar 'gyur
longs spyod rdzogs sku'i bzhugs stangs kyis
glang chen nyal ba la brten nas
chos nyid rnam par longs spyod nas
pad ma'i spyan gyis mthong bar 'gyur
sprul pa sku yi bzhugs stangs kyis
drang srong tsog pu la brten nas
chos nyid rnam par rang sprul pas
chos kyi mig gis mthong bar 'gyur
gzhan yang rtsa dang 'khrul 'khor gyis
rang bzhin snang ba'i ye shes lnga
chu bur mig gis mthong bar 'gyur
mthong nas gnad la dbab pa ste
snang ba 'khrid pa'i thabs kyi kyang
'byung bzhi'i snang ba gnad la phebs
rlung brgyad las kyi 'brel brtsis pas
rnam rtog du ma gnad la phebs
lus ni gcud dang rtsal sprug dang
170
yan lag brdab 'phen sdud pa'i gnad
phra zhing drang lam nye ba yis
sha dang khrag ste rus pa la'o
de ltar phebs nas rdzogs pa'i tshad
thad ka'i ngos snang 'gegs pa dang
sa rdor snang ba gzhug pa dang
rang shes ci la'ang tshud pa dang
de btsud bem po 'gul ba dang
rlung gi 'gyu ba'i tshad zin dang
lus kyi rdul phran mthong ba 'byung
cir snang gzugs skur rdzogs pa dang
de la yab yum 'khrul ba dang
lnga lnga yab dang yum sbyor dang
kun kyang mu khyud zlum po la
rnal 'byor lus kyang 'od gsal zhing
'gro dang 'ong dang 'dug pa dang
thams cad rig pa tshad phebs so
tshad phebs lugs kyang 'di ltar 'gyur
so so'i lus kyi rdul bral nas
bar snang 'od kyi skar khung snang
de las 'od zer lcags kyu'i dbyibs
phra zhing 'khril bas snang ba 'dzin
lus kyi rdos ba rang 'gags nas
zang thal dri med 'od kyi lus
dbus na a yi mtshan ma dang
mdzod spu'i 'od zer 'dom gang tshad
171
thor tshugs rlung gis 'geg par snang
zhi sku lag pa'i sor mo las
'od kyi phreng bar rnam par 'khrigs
sgra med sems kyi spyod pa ste
mgo bo thod pa'i gzhal yas las
he ru ka rnams mngon par 'byung
'di dus rang las tshad la phebs
zang thal sku gsum gcig tu dril ba'o
'di dus sems ni gsal ba dang
mngon pa shes pa drug rnams dang
rang dang dpag tu gyur pa yi
chos rnams skad cig gis shes 'gyur
tshad med sangs rgyas zhing khams dang
de bzhin sku yang sems la snang
stong pa'i sems la dri ma zad
rang bzhin mi g.yo stong gsal mnyam
ma 'dres mnyam rdzogs dbyings la khyab
snang srid gsal ba du ma bral
cha shas med pas spros med do
de ltar snang ba'i dus rnams su
lus sems 'brel pa chod pa ni
zag bcas zad pa'i lus la yang
phyir 'byung mtshan nyid gsal ba'i sems
skar mda' 'pho ba'i tshul gyis kyang
nam mkha'i khams su gsal bar mthong
172
de nyid thog ma'i dus rnams su
rlung dang bral ba dag la yang
'bad cing dag pa rlung gi las
lus las phyi rol 'phang las 'byung
mthong byed gnyis kyi cha las kyang
lus ni 'od gsal dag pa la
sems ni me stag 'phro ba bzhin
gcig tu mi gnas rang gsal gzhi
snang cha gnyis kyi tshul du 'byung
'dis ni lus sems 'brel chad nas
khams gsum ldog pa ma yin no
rgyu dang 'bras bu'i chos nyid ni
rtog pa rags pa'i khungs 'gags nas
dran pa rang dag rgyud la yang
rten 'brel rlung nyid rnam dag pa
rlung las byung ba'i chos nyid do
ka nas dag pa'i rang bzhin la
gcig dang du ma'i gangs zad de
sku dang ye shes med pa dang
chos rnams zad pa'i mthar phyin pa
'bras bu chos nyid yin par 'dod
rang sar dengs pa'i chos nyid ni
'byung ba dengs pas rdos pa dag
rdul dang phra rags mthar 'gags nas
cha shas tsam yang gnas pa min
nyon mongs dengs pas 'khrul pa dwangs
173
rtog bral zhen pa mi gnas pas
bag la nyal dang kun nas ldang
rdul cha tsam yang mi gnas so
de ltar phra rags dengs pa yis
phung po lnga yang mthar gyis phra
'byung ba bzhi yi lus brang nas
thams cad ye shes rdzogs sku'o
rtog med ting 'dzin rang gnas te
bcos ma'i chos las 'das pas na
chos zhes tshig tu mi gnas so
de ltar chos nyid nges pa'i tshig
chos zhes tshogs shing 'dus pa las
bya ba byed dang mtshan nyid 'dzin
rang snang ston par byed pa la
so so'i rigs rnams 'dzin pa'o
nyid ni bcos pa med pa la
lhug par gnas pas rnal mar khyab
so ma gnyug ma dkyus ma la
sgra tshig ming gi grangs zad pa'o
gnad kyi chos nyid 'di lta ste
'byung ba'i gnas dang rang lus dang
yul dang sgo dang shes pa rlung
rtsa dang thig le yan lag gis
so so'i 'jug pa khyab par gnas
de dag so so'i sngon 'gro dang
dngos gzhi gnas la sbyar ba yis
rtog pa bral ba'i chos nyid la
174
rang bzhin gnas pas 'gyu ba zad
zad snang gnyis med yul las ni
rang bzhin gnas dang bcos ma las
chos kyi dbyings kyang dag pas snang
'dis ni gnad kyi 'tshang rgya'o
'byung dus gnad ni 'di lta bu
e ma ngo mtshar che ba bshad
chos nyid 'di la 'byung dus brgyad
gnas pa'i dus kyang de tsam las
khyad par dus ni bzhi la yang
rnal 'byor ldan pas sems gnas pas
mnyam nyid 'du 'bral med pa'o
rang bzhin dag pa'i gnad shes nas
byas pa med par chos rnams shes
dus ni 'pho ba'i grangs kyis bzung
bzung bas 'khrul med dag pa'o
bar do'i chos nyid 'di lta bu
rab tu gsang ba'i chos nyid bshad
dbye na rnam pa bzhi dag las
'dir ni chos nyid bar do bshad
'chi ka las ni thar pa'i tshe
rnam shes nam mkha' dag la thim
nam mkha' 'od gsal la thim dus
phra rags snang ba kun 'gags te
dbang po kun ldan 'od kyi lus
lus las grib ma bzhin du 'gyur
175
de tshe 'od snang dum bu'i tshe
mkhas pas snang ba mched pa bzung
g.yo ba rlung dag mched pa yis
kha dog lnga yi 'od dang zer
ma nges 'ja' tshon ris su snang
'jug cing smin pa'i rlung las kyang
phyogs bzhi mtshams dang bla 'og grub
de la phyogs kyi 'od 'dus pas
rigs lnga'i sku yang mngon par snang
mthing ga dkar ser dmar ljang ni
so so'i yul dang bcas par snang
'di la mched dang 'dzin shes na
sangs rgyas rnams kyi yon tan rdzogs
khams gsum 'jug pa ma yin no
de yi mtshan nyid 'di lta bu
rags pa'i 'byung bar ltos bral bas
'od la thig le zer du 'bar
thig le lnga 'brel sku rkyang ste
phyed sku las ni gzugs rdzogs pa'o
gzugs phyed sku las lnga lnga'i zung
so so'i tshom bu rdzogs pa las
lnga ldan bcu ldan brgya dang ldan
tshom bu stong dang 'bum phrag ni
bsam ngo rang bzhin dag par snang
brjod kyis mi langs grangs med pa
'di yi rang bzhin rang shes na
sku gsum gcig tu dril ba thob
176
thob pa 'di las slar log med
gsal gdab pa las byung ba'o
gzhan yang chos nyid ngo bo ni
rang bzhin nyid las ngo bor grub
snang tshul gcig tu ma nges pas
'jug pa'i lam yang tha dad do
ngo dang shes dang grol mthong gis
'jug dang mthong dang goms pa las
ngo shes pa las rang ngo ste
yid ches pa yis thug pa'o
thag chod pas ni gding du tshud
de ltar gsum gyi nges pa las
ngo bo rdzogs pas rgyud 'gags so
gzhan yang chos nyid rang bzhin bshad
'di 'dra gcig tu ma nges pas
gang ltar btags pa de ltar snang
sna tshogs ming gi gdags gzhi las
sgra tshig du ma'i spros par snang
nges med ming ni sna tshogs las
don yang btags pa tsam gyis stong
stong nyid gang yang ma grub pas
rang bzhin dag pa ltar snang ngo
gzhan yang chos nyid thugs rje bshad
gdul bya'i yul ni sna tshogs pas
'dul byed sku yang de bzhin no
rigs dang dbang po'i rnam 'phrul las
'khor 'das rtog pa tha dad de
de nyid so so'i yul bzhag na
177
ma bcos don gyi dgongs pa'o
gzhan yang chos nyid snang ba bshad
ma dag pa yi 'khrul pa la
dbang po'i sgo rnams ma bcos pas
cog ge bzhag pa gnad yin la
de las ma bsgyur man ngag go
gzung ba med pa'i snang ba la
'dzin pa'i med pa'i sems shar ba
spyod pa med pa'i mig gis mthong
chos nyid med pa'i lam nas drangs
lta sgom med pa'i gzhi la bskyal
byar med rtsol bral 'bras bur dril
'di la snang mtha' mi gnas so
gzhan yang rig pa'i chos nyid bshad
lu gu rgyud du cer mthong bas
rnam rtog 'gyu ba'i dran pa 'gags
bya lam nam mkha' 'gro ba bzhin
chos
chos kyi dbyings las 'gro sa med
gzhan med rig snang rnam dag pas
'khrul pa snang ba'i rgyu rkyen thad
dbyings dang rig pa 'bral med pas
lu gu rgyud kyi 'brel snang ston
rig pa'i ro bo lu gu rgyud
'das dang ma 'ongs da ltar la
sus kyang byas pa ma yin la
des na 'dus ma byas pa nyid
lu gu rgyud kyi rang bzhin no
rnam par rtog pa kun dag pas
178
ma 'khrul pa yi sangs rgyas so
gzhan yang rgyud kyi chos nyid bshad
yang dag chos nyid sgra las thal
rang gi ngo bo yi ge med
rang rig ye shes sgron 'od 'bar
chos nyid dag pas bkra shis mdzes
lta ba 'jigs bral seng rtsal rdzogs
rang rig smin pas rdzogs rang byung
lu gu rgyud 'brel mu tig phreng
nyams kyi snang ba nor phra bkod
rang gnas stong pa'i snying me long
gol sa rang gcod thugs me long
gzhan las ma byung rang shar nyid
rang byung yin pas rang grol la
dbyings su gcig pas klong yang drug
yon tan rdzogs pa rin chen spungs
rang rig bstan pas ngo sprod spras
snang ba dag pas nyi zla sbyor
rig pa smin phyir sku gdung 'bar
'di dag rnams kyang gzhi las shar
'di ltar chos nyid brjod med pas
tha snyad tshig gi gzhi mar shar
tshig brjod rim pas rnam dag pas
de ltar brjod med pa la gnas
de phyir tshig rim mtha' zad pa'o
gzhan yang grol ba'i chos nyid bshad
gnad kyis grol bas 'bad rtsol zad
179
ye nas grol bas bskyar mi dgos
rang grol yin pas gnyen po med
cer grol yin pas mthong sar yal
yongs su grol bas rang bzhin dag
dus kyi grol bas goms mi dgos
rang bzhin grol bas ma bcos pa'o
grol zhes tha snyad tsam nyid de
rtogs dang ma rtogs su yi chos
de la grol zhes su la dmigs
khams gsum 'jug pa su la srid
srid mtha' grol ba'i chos nyid do
gzhan yang bya bral chos nyid ni
bya ba med pas grol ba la
byung ba med pas gnas med pa'o
'gro ba med pas 'ong 'khor zad
byas byung gcig dang gnyis med pa'o
tha snyad 'khrul pa tsam yang med
yod med las kyi 'jug pas stong
ye nas 'bras bu blo bral nyid
smra bsam brjod pa kun 'das pa'o
zhes sgra thal 'gyur chen po chos rnams kun gyi rtsa ba las
chos nyid bkod pa sems snang gi rtsa ba bstan pa'i le'u ste bzhi
pa'o
@5
de nas rang bzhin rnam dag pas
chos sku brjod pa med pa las
chos nyid spros bral nam mkha' las
brjod du med pa'i gzhi ma las
180
rang byung bkod pa don gyi tshig
ston pa'i ljags las 'od 'phros tshul
sus kyang byas pa med par shar
de la lha dbang gis gsol pa
kye ma bcom ldan 'khrul med bdag
lta dang bsgom pa'i bkod pa nyid
gang gis 'dzin par 'gyur ba lags
bab las grub pa'i gnas lugs gang
de la blta ba ci ltar bgyi
tshig don lta ba'i mtshams kyis bzung
lta ba'i ngo bo rang bzhin gang
brjod tshig ming gi rnam grangs ci
sgom pa zhes bya ji lta bu
de yi las dang go ba gang
mgo la gnas pa'i bsgom pa gang
bsgom pa'i mtshan nyid snang tshul ci
ma bsgoms pa yi skyon gang lags
'di dag bdag gis mnyan par 'tshal
rdo rje 'dzin pas bdag la gsung
de nas bcos med nam mkha' las
sum cu rtsa gnyis mtshan 'chang bas
lta sgom bkod pa 'di skad gsungs
lha yi dbang po legs nyon cig
'di la the tshom sus za ba
sangs rgyas rnams kyi sku la bsgrib
blta ba bsgom pa 'dzin pa ni
dad pa rab dang brtson 'grus ldan
181
gtong bar nus shing bla mar gus
brtul zhugs can la sdig la 'dzem
'gyur med rab tu brtan pas 'dzin
yang na rang nyid shugs dal ba
lhug pa glen pa'i lhod yod pas
rtogs pa chung zhing rang bzhin dal
lus dag bya ba bral ba dang
shes rab ldan pas 'dzin par 'gyur
bab las grub pa'i gnas lugs ni
gnas pa bdun gyi tshul la yang
sna tshogs ngos nas lhun grub pa
'gyur tshad cha nas nges med pa
mi 'gyur ba las nges pa can
snang ba'i rtsal ni cir yang bsgyur
thams cad 'byung zhing khas len bcas
'khrul pa dag phyir ka dag la
snang tshul tha dad khra bor 'dod
'di ltar 'dod pa'i bye brag las
rdzogs pa chen po cir snang phyir
tha dad 'dod pa grangs mang yang
gnas pa bab kyi lta ba la
gcig med gnyis med gang dang bral
srog gcod ma byin len pa yang
nga las byung zhing nga yi chos
lta dang sgom dang spyod pa yang
yod med stong pa'i mtha' las 'das
mdor na mtshan nyid kyis phye'o
182
de la blta ba rnam pa gnyis
tshig gi blta dang don blta'o
tshig gi blta ba bdun rim las
so so'i 'dod pa blos byas te
bya bral 'bad pa med pa dang
rim 'jug rang gzhan khyad 'don dang
srog gcod dge sdig bral ba dang
byas med byung ba med pa dang
ma bsgyur snang ba rang dag dang
nyon mongs rang bzhin grol bar 'dod
don ni chos nyid mngon sum la
shes rab kyis ni ma yin par
dbang po'i spyod yul nyid du blta
tshig gis gtan la mi phebs te
gnad gsum mthong ba'i ngo gang la
tshig gsum gnad du 'grol ba'i phyir
dbang po rno brtul med pa dang
chos nyid mthong bas dag pas na
las la bzang dang ngan pa med
chos nyid stong pa'i ris med pas
dge sdig gnyis ka rnam par sel
rang rig mngon sum mthong med pas
rim dgu'i 'dod pas grol ba min
chos nyid zad cing mthar phyin pas
sku gsum lam gyi snang ba'o
tshig don blta ba'i sa mtshams ni
tshig ni brjod pa'i rgyu yin te
gang gis brjod dang sprul byed pa
183
de la bsam pa'i yid dpyod do
don ni rang la rang gis blta
mngon sum tshad ni gsum dag gis
lu gu rgyud lam mngon du spyod
cer mthong ba dang cer grol du
gang gis mthong ba don yin no
blta ba'i ngo bo mthong ba la
yid dpyod tshig gis 'gyur ba med
lung dang bla ma'i man ngag las
gang gis bstan pa med pa'o
lta ba'i rang bzhin snod bcud la
ma khyab med pas gang yang grol
grol ba'i chos la rnam 'dzin bral
cir snang rang gi chos nyid las
bcos ma'i chos nyid logs na med
ci ltar spyod kyang mi rtog skye
spang dang blang med rang snang ngo
brjod tshig ming gi rnam grangs ni
phyi dang nang dang gsang ba dang
bla na med pa'i blta ba bzhi'o
phyi ni chos can la blta ba
rim brgyad so so'i 'dod pa la
yid dpyod 'dzin pa nyid du 'dod
nang ni chos nyid la bltas pas
ngo bo rang bzhin sgyu mar mthong
gsang ba rang rig la bltas pas
lu gu rgyud dang 'brel chags mthong
184
kho na nyid ni dbyings rig go
bsgom pa zhes ni sems gnas la
'gyu ba phyi nang gcod pa ste
gzung dang 'dzin pa 'gag pa'o
rang bzhin bab las byung ba ni
bsam gtan dag tu brjod par bya
rlung dang rtsa dang thig le dang
lus gnad mig dang stong pa ni
bsgom pa zhes ni 'dod pa yin
yi ge'i 'od dang kha dog dang
rnam par 'phrul pa'i spro bsdu ni
ting nge 'dzin zhes bshad pa la
ma bcos rang bzhag gnas lugs te
ci ltar de las 'gyur med pas
sangs rgyas rnams kyi dgongs pa'o
de yi las dang go ba ni
las kyis yul zhen gcod pa dang
nyon mongs la sogs spang ba dang
'khor ba'i rtsa ba 'byin pa'o
go bas sems nyid 'dzin pa dang
gnas par byed dang rlung zad dang
chos nyid stong pa'i lam rnyed dang
rang bzhin dag pa'i gzhi snang ngo
ma gol gnas pa'i bsgom pa ni
dbang po'i sgo rnams gsal ba la
yid kyi rtog pa ma 'gyus pas
shes pa nyid la dpyod pa'i yid
phyir la shor ba med pa nyid
185
ris can gsal ba ma yin dang
gud bcad stong par ma song dang
bde ba rgyun chags ma yin dang
btang snyoms lteng por ma song dang
dran rig gsal ba ngal gso dang
sbyangs pa log cha lam song dang
'dzin cha nang du rgyun bde dang
cha lugs gsal ba'i 'dzin cha dang
kha dog yig 'bru sgyur byed rnams
de rnams phyogs su ma lhung na
mgo la gnas pa'i bsgom pa'o
bsgom pa'i mtshan nyid snang tshul ni
mtshan nyid stong gsal rig pa la
rang bzhin gang dang ma 'dres pa
gzung dang 'dzin pa'i mtha' zad dang
chos nyid rang ngo dag pa'o
snang tshul 'khrul pa ma yin la
rgyu rkyen dag pa'i rang bzhin la
dngos dang dngos med rang dag nas
sgo lnga'i yul zhen dag pa dang
'byung ba'i rigs pa dag pa dang
ye shes dag pa'i 'phel snang ston
de la zad pa'i chos nyid do
ma bsgoms pa yi skyon nyid ni
'khor ba'i mtshan nyid mngon snang ba
bdag dang gzhan te yul shes dang
tshig dang bcas pa'i blta ba dang
186
dmigs dang bcas pa'i yul dag dang
nyon mongs bdag tu 'ching bar 'gyur
sangs rgyas lam yang stor ba dang
'bras bu'i rang bzhin ma shes dang
chos kun mnyam pa'i gzhi med dang
rang rig khams gsum 'ching ba dang
rtog dang bcas pa'i ltung bar 'gyur
gzhan yang chos nyid 'khor lo bshad
gnas pa'i ltabs chos kun rtogs
rang bzhin dag pas 'khor 'das phyed
byas pa med pas byung ba'o
yang dag lam du btang bas khyab
rdzogs 'byung chos nyid stong pa'o
bya ba med pas byung med rdzogs
'khor ba dag pas 'das pa'o
gzhan yang mthong dag blta ba ni
dngos med rang dag rdzogs pa che
lha la mchod pa mi dgos te
sngags kyi bzlas dang dka' thub med
bdug pa mar me lha bshos med
tshogs dang bla ma mchod pa med
bstod dang sbyin bsreg mchod pa med
pha rol phyin drug las mtha' med
de ltar gzhi rtsa gang med pas
srog gcod ma byin mi tshangs spyod
lta ba med dang bsgom med spyod pa med
187
bltar med spyad du med pas bsgom pa'i 'dod pa gang
stong dang gsal ba sems kyi 'dod pa 'gag
de bzhin chos dang sangs rgyas chos med pa'o
gzhan yang rang bzhin blta ba ni
dngos med rang bzhin rdzogs pa chen
sa chu me rlung 'byung ba mngon sangs rgyas
bcos pa med par rang grol chen po nyid
'dod chags zhe sdang gti mug byang chub bzhi
rnam rtog las kyi spyod pa rtogs pa'i gding
'khor ba ma spangs sangs rgyas dgongs pa'o
lus dang ngag yid dangs bas sku gsum rdzogs
sems dang ma rig 'khrul pa chos nyid gzhi
las dang bag chags zhen pa blta gnad do
gzhan yang bcos pa'i lta ba ni
chos las ma byung sangs rgyas la
rgyu yis ma bskyed 'bras bu rdzogs
rkyen gyis mi 'jig lus blang ste
lung las ma byung grub pa'i mtha'
rgyud lam brten man ngag gis
mya ngan 'das pa'i rtsa ba bcad
'khor ba'i 'bras bu smin par byas
yang dag ma yin ma dag gzhi
nyon mongs drug gi gzhi ma la
byang chub sa bon stongs par byas
188
ngan song gsum gyi gzugs smin te
sku gsum po yang lag bcangs so
gzhan yang brjod bya'i lta ba bshad
srog ma bcad na sangs mi rgya
skar khung dag ni ma bkag na
mun pa nyid ni sangs pa min
sangs rgyas rnams kyi slob dpon ni
dmyal ba chos kyi rgyal po la
chos kyis ngan song gsum du khrid
sdig spyad pas ni dge thob bo
bltas pas khams gsum 'khor ba la
bsgoms pas nyon mongs tshogs kun sogs
spyod pa spyad pas go la sgrib la
'bras bu 'khor ba'i rgyu nyid do
gzhan yang brda don tshig 'brel bshad
bskal pa'i me dpung klong dkyil na
mi gcig tshig pa med par yang
kha nas sde snod chos bshad cing
las su gzhan gyi srog bcad pas
dge sbyor 'phel ba ya re cha
lcags kyi khang yangs sgo med nang
snang med mun pa'i klong dkyil na
nyi ma zla ba 'od gsal yang
sus kyang mthong ba med pa ni
so so'i dbang po'i yul gsal bas
mthong ba med pa ya re cha
gzhan yang yul 'dzin blta ba bshad
khams gsum 'khor ba'i gzhi stongs pas
189
mya ngan 'das pa phyags mas btab
ma rig 'khor ba'i rtsad bcad pas
sku gsum 'bras bu drungs nas phyung
mun pa'i go gyon nyi ma bsnubs
gsal ba'i mthong byed mun pas gtibs
rno ba'i ngar gdags gcig ma chod
rgya che dkyil stong gcig ma shongs
sna tshogs 'dus pas gcig ma rnyed
yod med mtha' rtog bsal ba'o
gzhan yang 'dod sems blta ba bshad
kun brgyab gcig kyang ma chod pas
gcig brgyab thams cad gsad par bya
mi brgya lcags srog gcig ma thar
gcig bzung bas ni thams cad thar
thar bas gong du grol lam zad
'jug pa las kyi rgyu 'gags so
gzhan yang spyod pa'i 'khor lo bshad
ma byung bas na bdag med cing
mi len mi 'dor sku yi rgya
'byung ba mi btsal yod mi spang
'dod pa bskyed cing chags mi bya
chags par byas te gtang bar bya'o
gzhan lus mi smad mtho mi btsam
sngags dang phyag rgya rgyun mi bcad
grub mtha' mi spang chos mi spang
grogs dang bla ma mi smod do
gzhan yang dam tshig sdom pa bshad
190
bla ma sangs rgyas mchod pa'i rten
chos dang dge 'dun yi dam lha
rdo rje mkha' 'gro ma rnams la
tshogs dang mchod pa rgyun mi gcad
bla ma mtshan nyid ldan mthong na
bstod dang mchod pa rdzogs par bya'o
bud med mi smad khro mi bya
phung po mi smad yi dam brten
dkyil 'khor dang ni sngags dang lha
phyag rgya bsten pa yang dag nyid
dad can tshogs nyid mi bcag la
dge ldan sems ni mi dkrugs te
sdom ldan dam tshig gnas par bya'o
gzhan yang bslab pa'i rim pa nyid
lus kyi spyod pa rdzogs bya ste
ngag ni rab tu bcad par bya'o
sems ni gnas dang brtags shing dpyad
rim 'jug las kyi rim par ni
tshad dang mtshan nyid shes par bya'o
rtag tu byugs dang ril bu yis
rtsa rnams thig le'i dra bar gzhug
phring ba do shal phyed pa yang
mdzes shing 'khor bas sbrel bar bya
las kyi bya ba dngos med gsal
dngos grub mchog gi gtso bo blang
gnas drug rgyan gyi 'khor lo bya'o
gzhan yang bsten cing 'jug pa nyid
bla ma bsten pas 'khor rgyun 'gags
191
dbang bskur bsten pas lus ngag smin
dam tshig bsten pas dngos grub 'byung
blta ba bsten pas khams gsum chad
bsgom pa bsten pas 'khrul rgyun 'gags
spyod pa brten pas lus spyod 'gyur
bsten bya 'di las gang byung ba
'di nyid dam tshig sdom pa'o
'jug pa'i las ni rnam pa brgyad
lus kyi 'jug pa lnga yin no
ngag ni rnam pa brgyad du 'gyur
sems kyi 'jug pa sum cu gnyis
lus sems khyad par byed pa nyid
las dang ye shes khyad nyid do
gzhan yang bsgom pa'i gnas 'khor nyid
lus ni 'khrul 'khor sna tshogs kyis
spyangs pas sems kyi gnas par 'gyur
gsum gyi sbyor bas rtsa rnams mnyes
sems ni bags kyis dgug par bya'o
mtshan ma thabs bzo'i sbyor ba yi
lus sems thabs kyi khyad par gyis
rnal 'byor sems ni gnas par bya'o
gzhan yang 'khrul pa'i zhen rgyun bcad
nyi zla'i 'od bsdus rgya mtsho drangs
stong gsum ri rab srang la gzhal
192
ma rig gzhi bzlog rang rig go
'khor ba dpyis phyung 'das lam bkag
chos dang gang zag phyags mas btab
'bras bu rang rdzogs chos nyid gzhi
bya dang byed pa rang 'gags so
gzhan 'dod sred pa drungs nas 'don
chos kyi 'khrul pas yas gzhi byas
de nyid rang sar grol ba'i yul
khams gsum lam byas sangs rgyas med
ston pa'i bstan pa su la srid med pa'o
chos kun gzhi med rtsa ba su la srid
srid bral 'dod pa med pa'i sems
rang bzhin ma bcos brjod las 'das
bya byed 'khrul pa'i rtog pa zad
chos med sangs rgyas med cing sems can med
nga med bdag med gzung dang 'dzin pa med pa'o
gzhan yang chos sku ro gcig bshad
tshig tu brjod pa ma yin te
sems zhes gnas pa tsam du'ang med
med phyir stong pa'i snang ba la
dran shes rnams kyi khungs zad pa'o
byas pa med pa'i chos nyid la
byung ba med pa ya mtshan che
byung ba med pa'i chos sku la
'gro ba med pa ya mtshan che
'khor sa med pa'i rig pa la
'byung ba med pa'i chos nyid do
193
gzhan yang 'dus shing mnyam par bshad
du ma spangs pas tha snyad bral
gcig ma grub pas rang bzhin dag
rang bzhin gsal bas don grub pa'o
rang dag pa dang gzhi ma dang
'khor dang 'dres pa'i gzhi ma dag
gsog dang snying po med pa dang
ya ma rla zhes mtshon bral lo
gzhan yang rang bzhin 'khrul pa bshad
dus dang dbang po nyid dang yang
bye brag 'jug pa so so'i las
phung po khams dang skye mched rnams
rgyu rkyen mtshungs pa skad cig las
nor bu sprin phung lta bu las
lus dang grib ma bzhin du 'khor
'khrul gzhi ltos pa tha dad las
sems can las ni sna tshogs so
gzhan yang dad pa'i snang ba bshad
chos nyid mngon sum snang ba ni
dbang po'i sgo las nges thon te
sprin med pa yi mkha' la gsal
nyams gyi snang ba gong 'phel ni
ye shes kha dog phyir phyung nas
gyen 'grengs pa dang rtsib shar dang
thig le sna tshogs sku nyid du
rags pa'i snang ba'i yul la gsal
rig pa tshad phebs snang ba ni
longs sku'i mtshan dpe gsal bar ni
194
ma nges kha dog 'ja' tshon las
rigs lnga yab dang yum du snang
chos nyid zad pa'i snang ba ni
nyams kyi snang ba stongs nas ni
lus zad dbang po'i yul kyang zad
rtogs tshogs 'khrul pa rang grol nas
brjod pa'i tshig dang bral ba'o
gzhan yang 'byung ba'i sgra rtags bshad
me yi sgra ni 'tsheg pa dang
stag dang lhab dang 'phro ba na
rnal 'byor pa yis don mi 'grub
gseng zhing 'bar ba bar med dang
dal ring rtse mo rno ba na
rnal 'byor pas ni don chen 'grub
kha dog nyid kyang rnam par bshad
dmar dang rtse mo gnag pa la
du ma bu rang gi ngos su chad
bar chad nyid ni 'byung ba'o
dkar gsal pad ma lta bu dang
rno zhin kha don sna tshogs la
'khor lo gdugs dang mtshon rtse dang
dmar gsal dangs pa'i zer 'phrol
rdo rje rgyal mtshan dril bu dang
mig mang ris dang gur khyim dang
mchod rten brtsegs la sogs pa ni
rnal 'byor pas ni rdzogs pa che
don la mngon sum byas nas ni
khams gsum dag las 'das pa'o
195
gzhan yang 'byung ba'i yan lag ni
chu ni gshang dang sna tshogs sgra
dkar po'i ri mo du ma ston
rnal 'byor pas ni don rab 'grub
sa ni ldeg dang sid pa dang
zur la 'bar zhing 'dril bas 'grub
rlung ni sdir zhing gzir ba dang
sngo zhing 'phyur ba dag gis so
de ltar rtags la ma sbyor na
cho ga bskyar la mkhas pas brtsam
lan gsum lnga dang bdun gyis kyang
'grub 'gyur 'di la the tshom med
so so'i rtags dang nges sbyor ba'o
zhes sgra thal 'gyur chen po chos rnams kun gyi rtsa ba las
lta sgom bkod pa gnas pa'i rtsa ba bstan pa'i le'u ste lnga pa'o
@6
de nas chos kun brjod med kyang
sems can 'phrul rtog du ma las
sgra tshig tha snyad gzhi mar yang
bcos pa med pa'i nam mkha' las
tshig 'byung ston pa'i khyad par bzhugs
pad ma las byung sangs rgyas la
dga' byed kyis ni 'di skad gsol
kye kye pad ma'i dbus na bzhugs pa nyid
'di ltar nam mkha' dkyil 'khor la
'od kyi thigs pa 'bum phrag ni
drug cu rtsa bzhi snang ba dang
196
yang zhun bcu bdun ci yi rgyu
chos kyi sku ni ji lta bu
longs sku zhes pa gang la bgyi
sprul pa'i sku ni gad tsam zhig
sku yi mtshan nyid ci lta bu
bzhugs pa'i tshul ni ci ltar lags
rang bzhin chos nyid sku rnams ci
bcom ldan 'das kyis bdag la gsungs
de nas bcom ldan rdo rje 'chang
pad ma'i dbus nas bzhengs nas ni
nam mkha' lding gi phyag rgya mdzad
de nyid mdzad pa tsam gyis ni
chos nyid rang snang nam mkha' las
brjod du med pa'i rang bzhin las
brjod pa'i tshig tu 'di skad du
rang byung byas pa med par byung
kye kye lha yi dbang phyug nyon
'od dkar 'bum phrag drug cu ni
rtsa bzhi yang dag bshad bya'o
rang bzhin rdzogs pa chen po las
tshig gi bye brag rnam 'phros pas
sde gsum las ni klong dgur 'gyur
tshig bsdus pa las sho la ka
'bum phrag drug cu rtsa bzhi las
le'u sdong phrag sum cu lnga
bam po nyi khri stong phrag gcig
brjod bya nam mkha'i mtha' dang mnyam
gdul bya'i sems can rtog pa gcod
'di la brjod bya nyer bsdus pas
197
gzer bu brgya dang brgyad cu la
'gag ni stong phrag phyed dang gnyis
gnad chen 'dus pa stong phrag gsum
gol sgrib khri phrag bzhi bcu la
ming thog rgyud ni khri phrag gnyis
tshig brjod rim pa gsal bkod do
'od kyi yang zhun bcu bdun bshad
rang shar ba rang rang grol dang
rang byung nyid dang rtsal rdzogs dang
mdzes ldan dag dang phra bkod dang
mu tig 'phreng dang yi ge med
snying dang thugs kyi me long dang
nyi zla kha sbyor ngo sprod spras
sku gdung 'bar ba rin chen spungs
sgron ma 'bar dang klong chen drug
de ltar bcu drug rim pa rnams
thal 'gyur las ni nges 'phros nas
gdul yul sems can rnams la snang
bcud 'dus bstan pa 'dzin pas na
bskal pa yod pa 'khor las sgrol
rdzogs pa'i sangs rgyas mngon snang ba'o
chos kyi sku ni gsung dang thugs
yon tan dang ni phrin las so
sku ni stong dang gsal ba dang
mtshan ma med pa'i rang bzhin no
gsung ni sgra tshig ming bral nas
brjod cing gleng pa nyid bral lo
198
thugs ni bsam dang 'gyu med pas
'phro zhing spyod pa rnams las 'das
yon tan phyir mi 'ong dang ldog pa med
dbyings dang ye shes khyab pa dang
rang bzhin bcos pa med pa'o
phrin las ma byung ma skyes byas pa med
shugs 'byung ba dang 'gag pa med
ma byas byas pa med pa'o
longs spyod sku yang sku gsung thugs
yon tan phrin las lnga yin no
sku ni snang la rang bzhin med
gsal dang gsal byed rig pas khyab
gsung ni rang byung ba dang rang snang ba
spro bsdu rnam pa'i 'khor lo yi
thugs ni rgyun med gzigs pa dang
mkhyen pa'i rtsal dang dgongs pa'o
yon tan mtshan dpe rdzogs la las
dgongs gsal mngon shes rdzogs pa'o
phrin las chos kyi 'khor lo las
phyi nang gsang ba rnams spros te
so so'i rigs kyi sangs rgyas dang
byang chub sems dpa' rnams la yang
rang byung ljags las rnam spros te
'khor la rang gi ngo bos ston
sprul pa'i sku yang sku gsung thugs
yon tan phrin las lnga lnga'o
sku ni mtshan dang dpe byad la
199
gdul bya gang byung lus sprul pa
gsung ni tshig sbyor legs pa la
tshangs pa'i dbyangs ni yan lag drug
thugs ni shes bya'i ye shes kyis
rang gzhan don gnyis dgongs par gnas
yon tan mkhyen pa rdzogs pa dang
phrin las phyi nang gsang ba yi
mdzad pa ma lus rdzogs pa dang
phun sum tshogs pa lngar gnas pa'o
sku yi mtshan nyid ngo bo dang
nges tshig dbye ba rnams dang ni
so so'i zhing khams gdul bya dang
phyed pa'i las dang ldang tshad do
mtshan nyid go ba'i khyad kyis kyang
mtshan nyid chos las grub pa dang
'dod yon rnams las grub pa dang
sna tshogs thabs las grub pa'o
go ba rang bzhin dag pa dang
so so'i snang yul ston pa dang
gzugs ldan dbang po rdzogs pa'o
sku yi bzhugs tshul rnam pa gsum
mtshan ma'i chos las grol ba'i phyir
ris can gzugs su ma yin dang
gsal ba'i rang bzhin rdzogs pa'i phyir
snang la rang bzhin med pa dang
gdul bya'i rgyud rnams sbyang ba'i phyir
200
mi g.yo mnyam gzhag chen por bzhugs
mi g.yo ba dang gsal ba dang
rig cing mkhyen pa'i char snang dang
mnyam dang phyogs med mi 'byed pa'o
sku yi rang bzhin chos nyid ni
rang bzhin stong dang gsal ba dang
mkhyen rig ma 'gags mngon snang ba'o
sku yi chos nyid rdzogs pa dang
phyir mi ldog dang 'gro 'ang med
smra bsam brjod pa med pa'o
gzhan yang sku rnams bsgrub pa ni
gong du bstan pa'i khyad par las
chos sku'i sa bon rang sems la
mngon sum pa yi gnad gzir nas
rtag tu goms par byas pa ni
chos kyi sku yi bsgrub pa'o
longs sku'i sa bon 'dod yon la
bslabs te goms par byas pa yis
longs spyod rdzogs pa'i bsgrub pa dang
sprul sku'i sa bon 'byung bzhi yi
sgra don rnams la bslabs nas ni
goms pas sprul sku bsgrub pa'o
gzhan yang me yi las mtha' bshad
kha dog gis ni rnam phye ba
dkar gsal 'jam na zhi ba 'grub
ser phra ring ba rgyas pa 'grub
dmar dangs 'phro ba dbang gi las
sngo zhing gnag thub drag po 'grub
201
sna tshogs chad cing 'khyil pa na
sna tshogs las kyi bye brag 'grub
shin tu phra na lhung bar 'gyur
chad cing drag na bar chad 'byung
mched ka me lce du bar ldan
dam tshig nyams par 'gyur ba'o
sgra yi rnam par phye ba ni
lhab lhab gsum btud sbar sbar mang
sna tshogs pa ni 'grub pa'o
drag dang 'tsheg na drag po nyid
'ur zhing thug na zhi rgyas gnyis
gshang zhing bsing na mchog 'grub pa'o
gzhan yang chu yi las mtha' bshad
kha dog nges pa'i rtags nyid ni
dkar ba la sogs bzhi yis ni
zhi ba la sogs 'grub par nges
kham nag rtsub cing 'khyil pa na
rnal 'byor pa yis don mi 'grub
dkar gsal 'phyar dang 'phyur ba na
mchog gi dngos grub nges 'thob bo
sgra ni gshang dang bsing ba dang
shwa dang 'ur zhing thug pa yis
zas dang gos dang 'bras bu 'grub
sir dang sil dang lhab pa yis
sku gsum so so'i bde thob pa'o
gzhan yang sa yi las mtha' bshad
kha dog dkar dmar gong gis shes
ma nges 'gyur bas don mi 'grub
202
gsal zhing 'tsher bas mchog 'grub pa'o
sgra ni shag dang sdid pa dang
tog dang sing bas sna tshogs las
'ur zhing sing bas mchog thob pa'o
gzhan yang rlung gi las mtha' bshad
kha dog dkar dmar gong bzhin no
gnag cing 'tshub pas don mi 'grub
sna tshogs 'bar mchog 'grub pa yin
sgra ni 'ur 'thib sna tshogs las
sing dang sna tshogs mchog 'thob po
gzhan yang rtags dang rang bzhin bshad
de ltar gong gi rtags byung nas
zla sum dang ni zla drug nas
gnyis kyis bem dang rig sgra shes
zla bcu dang ni bco brgyad nas
so so'i sgra dang rigs drug skad
ci ltar gsungs pa bzhin shes so
gzhan yang 'bras bu'i rim pa ni
chos sku sems kyi las kyis dang
longs sku ngag gis rnam par thob
sprul pa'i sku ni lus kyis so
ngo bo nyid ni cha mnyam pas
lus ni 'byung ba dag pa dang
ngag ni a li ka lir sbyor
sems ni dngos med zang thal lo
gsum 'dus pas ni bde chen no
gzhan yang rab tu bshad bya ba
203
sku yi mtshan nyid rab shes pas
'khrul pa thams cad dus gcig 'gags
sku yi rang bzhin yongs shes pas
gsal dang stong pa'i so mtshams zin
ngo bo shes pas stong par dag
dang shes pas ni mi rtog skye
bdag nyid chen po shes pa yi
khams gsum 'khor ba'i rtsa ba gcod
de dag gis ni rang grol gding
byas pa med pa thob par nges
e ma ngo mtshar rmad du byung
byas pa med pa'i nam mkha' la
bcos pa med pa'i tshig shar ba
ma bsams rang byung blo la go
de ltar go nas shes rtogs pas
sde snod kun gyi rtsa bar yang
rgyud kyi rgyal po thal 'gyur nyid
yang gsang bla med bstan pa 'di
'di nyid yin par yid ches te
rang bzhin snang ba'i 'khor rnams kun
rab tu mgu ba'i sems bskyed nas
rgyud 'di bklag dang bcang ba dang
bri zhing 'dzin pa nyid du ste
mgul dang spyi bor bzung bcangs pas
sangs rgyas thams cad bkur bar spyad
de ltar khas blangs dam bcas nas
ston pa sangs rgyas bcom ldan 'das
204
yon tan rdzogs pa'i sku la bstod
de nas rab tu 'dus pa rnams
dga' mgu rang ba'i sems skyes nas
nam mkha' rang dag gsal ba dang
brjod med tshig rnams rang shar la
rjes su yi rang bde rnyed nas
rang bzhin rdzogs pa chen po yi
spros pa med dang mnyam par gyur
chos rnams thig le nyag gcig gi
dgongs pa ro mnyam thob nas ni
pad ma las skyes bcom ldan 'das
legs so legs so legs par gsungs
bdag cag sku gsum smin mdzad pa
gsol 'debs rjes su yi rang ngo
sku rnam par bkod pa zhes bya ste
le'u drug pa'o
rin po che 'byung bar byed pa
sgra thal 'gyur chen po chos rnams kun gyi rtsa bar bstan pa'i rgyud ces bya ba
rang bzhin rdzogs pa chen po sho lo ka 'bum phrag drug cu rtsa bzhi las khyad par du bkod pa rdzogs so
rgya rgya rgya
rgya rgya rgya
rgya rgya rgya
rgyud kyi rgyal po 'di ni
'gro ba khyad par can la ma gtogs pa su dga' dga' la yod pa ma yin no
205
dpal sngags srung gi rgyal mo smug nag khros ma'i rgyal mo rag gdong mas srungs shig
sa ma ya
so phag
a ga tha ma
dpal ldan mgon po nag po khyod la gtad
snod med pa la byin na dam tshig gi chad pa chod cig
sa ma ya
rgya rgya rgya
thal 'gyur rgyud la ma bu bdun
dge'o
dge'o
dge'o