Seelter Trjoue
Jump to navigation
Jump to search
As dät Lesebouk foar Seelterlound apheerde, fängen Hermann Janssen un Pyt Kramer oun mäd Seelter Trjoue, Tidschrift foar alle Seelter. Disse eerste wuudelke seelter Tiedskrift ärskeen bloot schablonierd in jierelk fjauer Goawen fon 12 Sieden. Dät fäng oun in n Suumer 1966 un die soogende un lääste Jiergong koom 1972.
Soogen ferjeetene Riemsele[edit]
fon Pyt Kramer
Juu Klokke[edit]
- Juu Klokke juu tikket
- bie Noacht un bie Dai,
- Un foulget man immer
- de Tied ap hier'n Wai.
- Doo Reede mäd Takke
- doo hälpe eenuur,
- Drieuwen fon 'n Feeder
- soo stäärk as naan uur.
- Dät Blääd mäd doo Taale
- dät glimt in dät Lucht.
- Rund traale doo Wies're,
- uk as me 't nit sjucht.
- Man daach kumt juu Tied
- dät juu Klokke stoant stil.
- Dan hälpt nit moor Räid
- un naan Moanskene Will'.
- P.K.,
- Seelter Trjoue, Winter 1966/67.
Suumer[edit]
- Tjukke wiete Wulken
- doo drieuwe in de Luft;
- 'Ne Riege ronke Swoalken
- doo fljooge in 'ne Bucht.
- Hälle roode App'le
- doo hongje in Sunnenschien;
- Fulle gräine Takken
- doo wääsje in de Wiend.
- Drokke oolde Spräien
- doo snöäterje ap dät Dak;
- Luurjend slupt uur Ponnen
- di glääde swotte Kat.
- Swäite wiete Rousen
- doo ruuke in dän Tuun;
- Kitt'ge bruune Iemen
- doo swierje uum un uum.
- Juu ljoowe litje Puppe
- slummert in de Wääse;
- Dät is daach soo goud,
- deer kon juu rauelk lääse.
- P.K.
- Seelter Trjoue, Suumer 1967.
Soo jädden[edit]
- Plastik Diert' un Baale
- gefaale mie nit moor,
- Iek wol soo jädden kjoope
- ätter juu groote Door'.
- Woaine, Blook' un Boolken
- häd min groote Bruur,
- Doo wol iek soo jädden hääbe,
- man 't kjoopen is soo stuur.
- Swäite un flugge Ding're,
- Disk un Schap sunt ful deerfon,
- Man iek leeuw', ik kriege goarniks,
- deerum dät iek noch nit kjoope kon!
- P.K.,
- Seelter Trjoue, Winter 1968/69.
- (As uus Wucht soo littek waas).
Ädderen Mäiden[edit]
- Doo litje griese Wulken faawje rood
- un ätter 't Wääste lukt juu Noacht.
- Juu grälle Mäidenskeelde kumt un woakst
- bit me schuuderjen ätter Waarmte soacht.
- Dan flammet in dät Aaste hället Lucht
- un juun dän Heemel stroalt dät rood.
- In fiere Finst're lät dät grooten Bround
- as wan deer Hälle waas un Dood.
- Noch ieuwen kält juu Keelde fäl un häd
- un täift dät Lieuwend stil un knap.
- Dan woormt juu jeele Gloud al moor un moor...
- Di näie Dai schoart ap!
- P.K.,
- Seelter Trjoue, Foarjier 1970.
Ap Strukeljers[edit]
- In t Nudden bääfte de Putte
- deer balle doo Ljuudene 'n Bitje ours.
- Jüssene säitene wie mäd de Häid bie de Hid
- un haalden Eed uut de Hiddene.
- Daalich aarbaidje wie in Jüste un Heeuwer
- un sätte dät Koolif 'n Houd ap doo Huddene.
- Midden sniede wie dät Flask mäd 'n Saaks
- un leede Hoo ap 'n Wain mäd tweelif Fourken.
- P.K.,
- Seelter Trjoue, Foarjier 1970.
- (Dät riemet sik nuu juust nit!)
In de wiede Waareld[edit]
- In de wiede Waareld sunt soo moonich geen,
- Trachtjen ätter Näis un Jäild af Gluk alleen',
- Man dät wiekt aal fääre, Gluk un Ljoow' un Free,
- As me fäller joaget ätter aal un bee.
- Wan dan rieten fon dät Lieuwend wai un wier,
- Toankst duu moal an diene junge Jieren wier,
- Un duu wolt soo jädden, dät deer .weese koast,
- Man dan waast uk düütelk, dät duu dät nit doarst.
- Dan wäl insen moal dät oolde Beend ferbräkt,
- un sien Oolden Sproak' un Toachte deer ferrät,
- Die häd aal ferlädden, wät ins Gluk him broacht,
- Un hie wol nit fiende, wät hie fäller soacht.
- Wiese: "Wo die Nordseewellen..."
- P.K.,
- Seelter Trjoue, Suumer 1970.
Eepen Huus[edit]
- Bloot noch fon 'ne Bielde kon iek sjoo
- woo duu insen stuudst in Holnerfoan.
- Juu litje Klappe sleeten mäd 'n Peel
- un die Hoage bie de oolde Hom.
- Djoope Spuure geenen uum dät Huus
- un ap dän Sood die loange Boom.
- In juu Toak' dät swotte Oaiegat
- un bäät' doo Ponnen foar dät Hoo.
- Joo kweede dät Hoo geen immer tichte
- man bie dät Fjuur bieloangs,
- Daach Bround koom nit,
- sieläärge nit deerfon.
- Nuu stoanst in dät Museumstäärp,
- dien Woogen ljoacht un glääd.
- 'Ne näie Toake fluch un stäärk
- däkt die in dien lääste Steed'.
- P.K.,
- Seelter Trjoue, Foarjier 1972.