Raturn

From Wikisource
Jump to navigation Jump to search
Raturn
by Schamun Mani
Fontàna: Heimatbuch Schams = Cudasch da Schons

Raturn



Diasch lùngs onns ear'an Australia
sto igl Giari da Crap-òlt,
mo uss eara ferm a franc el
da turnar a tgea resolt.

5Egna dultscha matta veva'l
anavos scho là an Schons.
Veva angiro ad ella
da turnar an du tres onns.

Mo scogl e bagn greaf sen teara
10da taner tut andamaint
vev'igl legar mat mains d'uta
amblido igl saramaint.

A pér ussa la cunzianztga
sadasdava cun egn'ea,
15uss vev'el igl sul giavisch ple
da turnar bagn prest a tgea.

Da catar la matta dultscha
là segl bot davo gl'ual
da ruiear pardùn dad ella
20grànd pardùn par tut igl mal.

Sco la mar aschi profunda
suspirava mintgatànt,
sco las undas oz schamevan
d'egn cordoli greaf a grànd.

25Ear sieus cor benplagn d'anguscha
oz pareva da schlupar,
oz da spira malavetta
cugl sieus batter da calar.

Giari da Crap-òlt ariva
30là segl bot davo gl'ual
suaintar egn stantus vieadi
sur la mar, sur cualm a val.

El antscheartga sia matta
aint ad or a vei a nà,
35mo invan gl'e nunpusseval
d'la catar, ni qua ni là.

Vei segl Bot-santiari vezza'l
oransum da màn digl Ragn
egna fossa nova frestga,
40là, la matta dorma bagn.

Dorma bagn a nignas larmas
la pudessan ple dasdar,
nignas larmas a nign planscher
la pudessen far turnar.

45Ad igl Ragn dasperas tgànta
la canzùn da pasch, ruos:
Tei mieus giuvan, jou a tei ear
nus catagn egn'ea noss pos.


Public domain
This work is in the public domain in countries where the copyright term is the author's life plus 70 years or less. See Copyright.