Quando m'insonio
From Wikisource
| Quando m'insonio de Lodovico Pastò |
| Informassion su la proveniensa del testo |
Quando m'insonio
De quela bela,
De quel'amabile
Ortolanela
Che vende bocoli,
Latughe e brocoli,
La trovo docile,
La trovo amiga,
Par che la spasema,
Che la me diga:
Per ti soleto
Mi sento afeto;
E tuta fervida,
Tuta tremante,
Che la me cocola
In quel istante
Con certa grazie,
Che mai no sazie;
Ma quando Fosforo
Ne porta el zorno,
E che solecito
Ghe coro intorno,
L'Ortolanela
No xe piu quela.
