Poveri omeni!

Poveri omeni!
Se fido amor
Sperè da femene
Sè in gran eror.

Tuto el so studio
Xe d'inzucarve,
E torse el bagolo
Po de burlarve.

Le xe bisbetiche
Nel so pensier;
Con ele el merito
No serve aver.

Sol per capricio
Le ve carezza,
E senza causa
Le ve disprezza.

Mile le esagera
Promesse avanti
D'amor ecetera
Coi so galanti;

E po, stufandose
De la persona,
Senza demeriti
Le ve abandona.

No è tanto istabile
Fortuna e mar
Come la femena
Nel so variar.

I sacrifizi
No serve a gnente,
Nè mai d'un misero
Pietà le sente.

L'ardito, el stolido
Xe preferio,
E l'omo docile
Vien avilio.

E mi per pratica
Lo posso dir,
Nineta barbara,
Senza mentir.

Ma con ti inutili
Xe i mii lamenti;
Anzi ti giubili
Dei mii tormenti,

E ti vol vederme
Un zorno o l'altro
Morir da rabia,
Crudel, senz'altro.