Pleacâ-ţ fesea...

From Wikisource
Jump to navigation Jump to search


Pleacâ-ţ fesea...

Tulliu, Nuşi. Poezii. Ed. Predania, Bucureşti, 2012, p. 124


Pleacâ-ţ fesea pisti ḑeanâ,
Moi muşatâ câpidanâ,
S-nu-ńi ţâ vedu ḑeana scriatâ,
S-nu-ńi ţâ vedu frâmtea-ţ bâşatâ.

Pleacâ-ţ fesea pisti ocl’iu
Giońil’i tra s-nu-şi facâ-ntr-ocl’iu,
Câ muşatlu-ţ ocl’iu moari
Tiniri giońi di şapti hoari.

Pleacâ-ţ fesea ş-nu-ńi mi creapâ
Cându treţ cu Ruja-ntr-apâ;
Pleacâ-ńi-ţ-u, pri scumpa-ţ banâ,
Moi lâvdatâ Piruşanâ.

Pleacâ-ţ fesea cu flurie,
Câ nu potu s-ńi-aflu yitrie;
Pleacâ-ńi-ţ-u pri ḑeana lae,
Featâ-adratâ ti sivdae.

Pleacâ-ţ fesea ţ-ḑâcu, muşată,
Câmbăńi ş-toacâ tra s-nu batâ,
Câ-ńi mi giuru pi Stâ-Mârie:
Va s-vers sânḑi ti ciudie!...