Per ricuperata salute della N.D. Benzon

Fra tanti mazzeti
Che ancuo da ogni banda
Famosi poeti
A gara te manda,

No far che 'l to naso,
Marina, se scanza
Se 'l mio del Parnaso
No ga la fragranza.

Apolo lunatico
Più volte m'à dito:
A un bogia mal pratico
No averso sto sito;

El mio zardineto
No xe per colori
Che in basso dialeto
Me tossega i fiori.

Ma in barba del mato
Che mola ste slape,
De i fiori me cato
Fra i granzi e le cape,

E tanto l'azardo
Curioso me par,
Che 'l mazzo bastardo
Go cuor de donar.

Via donca de nò
No dirme, se ancuo
Te fazzo un cadò
Che sa da paluo;

No cerco de un vaso,
Marina, l'onor,
Più assae che al to naso
Vòi zonzerte al cuor.

Vòi dirte, che 'l mio,
No so quanti dì,
Xe stà ingritolìo,
Mia cara, per ti;

Che un boto el me dava
De tenero afeto
Se mai me incontrava
Col to Vetoreto;

Che salti qua drento
Adesso el me fa,
Che vedo contento
El nembo sfantà.