Pangur Bán
Messe ocus Pangur Bán, cechtar nathar fria ṡaindan
bíth a menmasam fri seilgg, mu menma céin im ṡaincheirdd.
Caraimse fos, ferr cach clú, oc mu lebran leir ingnu
ni foirmtech frimm Pangur Bán – caraid cesin a maccdán.
O rubiam (scél cen scís) innar tegdais ar n-oendís
taithiunn (dichrichide clius) ni fristarddam ar n-áthius.
Gnáth huaraib ar gressaib gal glenaid luch inna línsam
os mé dufuit im lín chéin dliged ndoraid cu ndronchéill.
Fuachaidsem fri frega fál a rosc a nglése comlán
fuachimm chein fri fegi fis mu rosc reil cesu imdis.
Faelidsem cu ndene dul hi nglen luch inna gerchrub
hi tucu cheist ndoraid ndil os me chene am faelid.
Cia beimmi amin nach ré, ni derban cách a chele
maith la cechtar nár a dán, subaigthius a óenurán.
He fesin as choimsid dáu in muid dungní cach oenláu
du thabairt doraid du glé for mu mud cein am messe.
 |
|
