Page:Tain Bo Cuailnge.djvu/83

From Wikisource
Jump to navigation Jump to search
This page has been proofread.
71
TÁIN BÓ CÚAILNGE

ocht nairm nindflatha, co lúas faindle gáithe chlīabaíg dar rōe maige. Rosuidiged in carpatsn for dá nechaib díana dremna dāsachtacha cendbeca cruindbeca corrbeca biruich bascind bruinnedérg sesta suachinte sogabalta sodain fo grinnib áillib a ḟén, Indara hech dībside ocus sē lugaid lúathēmnech tresmār túagmār traigmār fótmār fochorsid. Int ech aile ocus sé casmongach caschǽl cos[s]eng seredchōel airgdech.

Is andso focheird torandchless cét ⁊ torondc[h]less dā cét ⁊ torandchless tri cēt ⁊ torandchless cethri cēt ⁊ tarrasair aice for torandchless cóic cét, úair nírbo furáil leiss ín comnsin do thotim leiss ina chétchumscli ⁊ ina chétchomling catha for cethri chóiced hĒrenn ⁊ dothǽt ass fón cummasin d'insaigid a námat ⁊ drobretha[1] a charpat mōrthimchull cethri nollcōiced nĒrenn ammaig anechtair, ⁊ dosbert [80b] fōbairt bidbad fó bidbadaib foraib. Ocus dobreth seól trom fora charpat, ⁊ dollotar rotha íarnaidi in c[h]arpait hi talmain, corbo leór do dún ⁊ do daingen feib dollotár rotha īarnaide in charpait hi talmain; uair is cumma. atrachtatár cluid ⁊ cairthe ⁊ carrce ⁊ táthleca ⁊ murgrían in talman aird i naird frisna rothaib īarndaidib súas sell sechtair. Is aire focheird in circul modba[2] mórthimchull cethri nollchóiced nĒrend ammaig anechtair, arná teichtis úad ⁊ ná scāiltís immi, corostairsed fri tendta fri tarrachtain na macraide forro. Ocus dothǽt isin cath innond ar medón ⁊ fāilgis fālbaigi móra do chollaib a bidbad mōrthimc[h]oll int ṡlóig ammaig anechtair fo thrī, ⁊ dobert fōbairt bidbad fo bidbadaib forro, co torchratár bond fri bond ⁊ méde fri méde, ba sí tiget ind áirbaig,] [3]Dosrimchell aridise[4] fa trī[5] in c[h]ruthsin co fārcaib cosair seisir impu fa mōrtimchill[6] .i. bond trīr fria[7] medi trīr fo c[h]ūairt timchell[8] imon dūnad. Conid Sesrech Breisligi[9] a hainm isin Tāin, ⁊ ised tres ndīrime na Tāna .i. Seisreach Breisligi[9] ⁊ Imsligi Gleandamnach[10] ⁊ in cath for Gāirig ⁊ Irgāirich.[11] Sed[12] ba cumma cū ⁊ ech ⁊ dune and.[13] Nīcon fes[14] a āirim[15] ⁊ nī cumuṅgar a rím cia līn dorochair and do dāiscorslōg, acht

  1. leg. dobretha
  2. = mbodba
  3. YBL resumed, 33a1
  4. aridisi LU.
  5. thrí LU.
  6. ll on an erasure; mórthimchull LU.
  7. a below in a later hand: fri LU.
  8. tīmchill LU.
  9. 9.0 9.1 breslige LU.
  10. imṡlige glennammach LU.
  11. after Irgairich follows , probably with reference to some words (issed, etc.?) which should have been added on the margin.
  12. over d a later mark of aspiration: s̄ LU.
  13. ISsed atberat araili rofich Lug mac Eithlend la Coinculaind sesrig mbreslige add. LU.
  14. immorro add. LU.
  15. The second i is added later below; árim LU.