mbethaid ass do glēri na mmac oc Liic Tuill. Is desin atá Lia Fíachrach maic Fir Febi, ar is andsin rothuit.
"Dénaid comarli," for Ailill; "gudid Coinculaind imó for lēcud asind inudsa, ar ní ragaid ar ēcin tairis, ūair rodleblaing a lon lāith." Ar ba bēs dosom intan nolinged a lon lāith ind, imrēditis a t[h]raigthi iarma ⁊ a escata remi, ⁊ muil a orcan fora lurgnib, ⁊ indala súil ina chend ⁊ araili fria chend anechtair. Docōised ferchend fora beōlu. Nach findǽ bíd fair ba háthithir delc sciach, ⁊ banna fola for cach finnu. Nī aithgnead cóemu nā cairdiu. Cumma noslaided riam ⁊ iarma. Is desin doratsat fir nÓlnécmacht in rīastartha do anmm do C[h]oinc[h]ulaind.
[1]Fóidis Cūc[h]ulaind a araid co Rochad mac Fát[h]emain di Ultaib, co tísad día chobair, Ecmaic dano rocarastar Findabair Rochad, ar iss ēside óclǽch as āildem robói la Ultu ind inbaidsin. Tēit in gilla na dochum Rochad ⁊ asbert fris techt do fórit[h]in Conchulaind, ma dodeochaid asa nōennin. Co tartaitis ceilc immon slóg fri tarrachtain drēchta díb día nairlech. Dothǽt Rochtad atúaid, cét lǽch dó. "Décaid dún a mmag indiu," for Ailill. "Atchíu dírim tarsa mag," ol in dercaid, "⁊ mǽthóclǽch etarro; ní thacmainget dó ind óic acht corici a gūalni." "Cia sút, a Fergus?" for Ailill. "Rochad mac Fātheman," forse, "⁊ is do c[h]obair Conculaind dothǽt." "Rofetursa a nas maith dúib fris," ol Fergus. "Tǽt cēt lǽch úaib lasin [72b] ningin út co ria medon in maigi, ⁊ tēit in[2] ind ingen remán remib, ⁊ téiti marcach dia acallaim co tí a óenur do acallaim na ingini, ⁊ tabraiter láma tairis, ⁊ immacurfi sin fogail a muntiri dīnd." Dognīther iarom amlaid sin. Téit Rochad ar c[h]end in marcaig. "Dodeochadsa ō Findabair ar do chendso, co ndechais dia hacallaim." Téit iarom dia hacaillaim a óenur. Mutti[3] dont slóg immi di cach leith. Nosgabar ⁊ fochertar lāma tairis. Maidid dano día muntirseom for teched. Lēcairsium iarom ass ⁊ fonascar fair can tudecht forsin slōg co tīsad ar ōen fri Ultu uli. Dorairngired dó dano Findabair do t[h]abairt dō, ⁊ immásōi úadib iarsudiu. Conid bānchath Rochada insin.
[4]"Guitter dano cairdi chlaidib dún for Coinculaind," for Ailill ⁊ Medb. Tēit Lugaid frissin, ⁊ dober Cūc[h]ulaind in cartini. "Tabar fer for āth damsa imbārach," for Cūc[h]ulaind. Bātar sesiur rígamus la Meidb .i. sē rigdomnai do Chlannaib
