Page:Tain Bo Cuailnge.djvu/64

From Wikisource
Jump to navigation Jump to search
This page has been validated.
52
TÁIN BÓ CÚAILNGE

dá Roth, dá Lūan, dá banteolaid, .x. ndrūith, .x. ndeogbaire, .x. Fergusa, seser Fedelmthe, sé Fíac[h]raig. Robitha trá sin uli lesium ar galaib ōenfer. Ō roláiset iarom a pupli hi Crōnig, roimráidset cid dogén-[71a]tais fri Coinculaind. "Rofetursa," ol Medb, "a nas maith and. Tíagair[1] ūaind día saigid condaruib carti claidib úad frisin slóg, ⁊ rambía leth na mbó fil sunda." Berair iarom in fissin chuci. "Dogēnsa aní," or Cūchulaind, "acht nārmilter úaibsi a nārach."

"[2]Immarchuirther fris," or Ailill, "Findabair do t[h]abairt dó, ⁊ a dingbáil dona slōgaib." Téit Mani Aithramail a dochum. Tēitside co lLǽg hi tossiuch. "Cia díandat céliusiu[3]?" olse. Nínārlasair Lǽg dano. Asbert Mani fris fo thri in c[h]ruthsin. "Céli do Choinc[h]ulaind," forse, "⁊ nāchamforraig, nādnecma nādbenur do chend dít." "Is lond in ferso," ol Mani, las oud úad. Téit iarum do acallaim Conculaind. Is and robói Cūc[h]ulaind íar bēim dei a lēned, ⁊ in snechta immi ina sudiu corici a cris; ⁊ rolega in snechta immi ferc[h]umat fri mēit brotha in mīled. Asbert Mani dano ón mud chētna frisside fó t[h]rī, cia díambo chēli. "Cēli Conchobair ⁊ nāchamforraig. Díanamforgea immorro ní bas sīriu, bithus di chend dít amal tíscar di lun." "Nī réid," ol Mani, "acallaim na dēsiseo." Tēit Mani úadib iarom ⁊ adfēt do Ailill ⁊ do Medb a scéla.

"Tæt Lugaid chuci," or Ailill, "⁊ ara nairlathar dó in ningin." Tēit Lugaid iarsudiu ⁊ adfēt do Coinc[h]ulaind anísin. •"A poba Lugaid," ol Cuchulaind, "is brēc sin." "Is bríathar ríg assidrubairt," for Lugaid; "ni bía bréc de." "Dēntar amlaid," ol Cūchulaind. Luid Lugaid úad lasodain ⁊ adfēt do Ailill ⁊ do Medb a nat[h]escsin. "Tǽt in drúth im richtsa," or Ailill, "⁊ mind ríg fora c[h]ind, ⁊ fasisidar di chéin Coinculaind arnāchanaithgné, ⁊ tēiti ind ingen leis, ⁊ ara naiscea dó hī, ⁊ tecat ass ellom fon cruthsin. Ocus is dóig immērthai ceilg fon cruthsin, conná fostba sib céin co tí la hUltu don chath."

Téit iarom in drúth cuci ⁊ ind ingen lais, ⁊ ba di chēin ārlastar Coinculaind. Tēit Cú dia saigt[h]in. Ecmaic atgeōinsium for erlabrai ind fir combo drūth. Srethis liic telma bói ina láim fair, co nsescaind ina c[h]end, co tuc a inc[h]ind ass. Tic dochum na ingini; benaid a dí trilis dī, ⁊ sādid liic triana

  1. leg. Tíagar
  2. In marg.: comrac Conculaind fri Findabair inso
  3. leg. chélesiu