Page:Tain Bo Cuailnge.djvu/43
31
TÁIN BÓ CÚAILNGE
dochom n-Órláim. Gontai ⁊ benaid a chend de ⁊ ros ecroth a chend frisin slúag. Dobeir in cend for muin ind arad íar sin ⁊ atbert: “Beir latt sin,” or Cú, “⁊ tési don dúnud amlaid. Manip samlaid téis, roticcba cloch úaim-se asin tailm.” A n-dochóid i n-occus don dúnud tísca a cend día muin ⁊ adfét a imtechta do Meidb ⁊ Ailill. “Ní fríthid bid eissíne ém,” olsi. “Ocus asrubairt mini thucaind for mo muin dochom in dúnaid, brisfed mo chend form-sa co cloich.” Slicht sain so sis co comruc tri mac Garach ⁊ blag bec de iarmmo ardaig dluthaigi in sceoil.
Ansait íar sin trí meic Gárach fora n-áth. It é a n-anmand-side .i. Lon ⁊ Úala ⁊ Díliu. Mes Lir ⁊ Mes Láech ⁊ Mes Lethan a trí n-araid. Ba foróil leu a n-dorigni Cú Chulaind .i. dá macdalta ind ríg do goin ⁊ a mac ⁊ crothad in chind frisin slóg. Co rubaitís Coin Culaind tara ési ⁊ co n-dergabtaís a n-óenur a n-imneth sin din t-slóg. Bentatar trí fidot día n-aradaib co róiltis glied fris a s- sessiur. Nos gegoin-seom uli íarom úair ro brisiset fír fer fair. Ro boí ara Órláim in tan sin iter Ailill ⁊ Meidb. Tanettat Cú cloich fair co mebaid a chend co tánic a inchind fora chlúasa .i. Fer Tedil a ainm. Ní fír trá amlaid sin ná marbad Cú aradu. Ní marbad cen chinaid.
Bágais Cú Chulaind h-i Méthiuport iar sin i n-acciged Ailill nó Medb, fochichred cloich asa thábaill forru. Dogní-som ón dano .i. doléci cloich assa thailm co n-ort in togmall boí for gúalaind Medba frisin n-áth andess. Is de atá Méithe Togmaill. Ocus ort in n-én boí for gúalaind Ailella fri áth antúaid. Is de atá Méthe
