Page:Tain Bo Cuailnge.djvu/40

This page has not been proofread.

28

TÁIN BÓ CÚAILNGE

int ara inna heónu. Conreraig Cú Chulaind íar sin inna heónu di thétaib ⁊ refedaib in charpait. Conid samlaid siu luid do Emain Macha: dam allaid i ndíaid a charpait ⁊ íall gésse oc folúamain úassa ⁊ trí cind inna charput.

“Recait iar sin co Emain. “Carptech dorét far ndochum,” ol in dercaid i nEmain Macha. “Ardáilfe fuil laiss cach dune fil isind lis mani foichlither ⁊ mani dichset mná ernochta friss.” Tossoísom íarom clár clé a charpait fri hEmain ⁊ ba gess di aní sin. Ocus asbert Cú Chulaind: “Tongu do dia toingte Ulaid mani étar fer do gleó frimsa, ardáilfe fuil lim cach áein fil isin dún.” “Mná ernochta ara chend!” ar Conchobar. Tothéit iarom bantrocht nEmna ara chend im Mugain mnaí Conchobair meic Nessa, ⁊ donnochtat a mbruinni friss. “It é óic inso condricfat frit indiu,” or Mugain. Foilgis seom a gnúis. La sodain atnethat láith gaile Emna ⁊ focherdat i ndabaig núarusci. Maitti immiseom in dabach hísin. in dabach aile dano in ro lád, fichis dornaib de. In tress dabach i ndeochaid iar sudiu, fosngertside combo chuimsi dó a tess ⁊ a fuacht. Dotháet ass íarom ⁊ dobeir ind rígan íar sudiu .i. Mugain, bratt ngorm nimbi ⁊ delg nargit nand ⁊ léne chulpatach. Ocus suidid fo glún Chonchobair íarom, ⁊ ba sí sin a lepaid do grés iar sudiu. Fer dorigni sin inna sechtmad blíadain,” ol Fíachna mac Fir febe, “nípo machdad cia chonbósadside for écomlond ⁊ cia nodragad for comlond in tan ata lána a sé blíadna déc.” It ē maccerdda Conculaind andso annūas for Tāin Bō Cūailṅge.

Slicht sain so co aidid nÓrláím.

“Tíagam ass trá hifechtsa,” or Ailill. Roecat íarom Mag Mucceda. Benaid Cú Chulaind omnae ara ciund i sudiu ⁊ scrī-