This page has not been proofread.
la Ultu, a mmarb nach áe do breith dóib nó a mbeó?” “Is inganto a mbeó,” ol int ara, “dóib. Ní cach óen condric samlaid. A mmarb immorro ni fil úadibseom ónach ric. Ní chumcisiu ón a beó nach áe do breith,” ol int ara. “Cumcim écin,” ar Cú. Indaig brot forsna eochu isin mónai.” Dogni int ara ón aní sin. Glenait ind eich isin mónai íarom. Taurlaing Cú Chulaind ⁊ gabaid in noss ba nessom dó ⁊ bá caímem díb. Slaittius sethnón na móna ⁊ dammainti fo chéthóir. Cumrigis eter dá fert in charpait.
“Co naccatár ní, éill ngésse ara ciund atheroch. “Cia de bad ferr la Ultu,” or Cú Chulaind, “a mbeó nó a mmarb dóib?” “Is a mbeó beres a nas beódu ⁊ a nas ségundo,” ol int ara. Láthraid Cú íarom cloich mbic forna eónu co mbí ocht neónu díb. Inláa afrithisi cloich móir, co mbí dá én déc [22
b] díib. Tria tháithbémmend trá insin uli.” “Tecmall na heónu dún trá,” ol Cú fría araid. “Mád messe dig día tabairt,” or sé, “conclichfe in dam allaid fortso.” “Ní réid dam a thecht ém,” ol int ara. “ro dássed imna eochu conná dichtim seccu. Ní étaim dano techt sech nechtar in dá roth iarndae in charpait ara fáebraige, ⁊ ni dichtim dano sech in dam ar ro lín a chongna eter dí fert in charpait ule.” “Cingsiu amend día chongno,” or Cú. “Tongusa do dia toingte Ulaid, clóenad clóenfatsa mo chend fair nó int súil dogénsa fris, nocon focher cor día chind riut ⁊ noco lémaither a glúasacht.” Dogníth són íarom. Conrig Cú Chulaind inna ésse ⁊ tecmalla
