Page:Tain Bo Cuailnge.djvu/134

From Wikisource
Jump to navigation Jump to search
This page has been proofread.
122
TÁIN BÓ CÚAILNGE

lochta ⁊ fulachta sund indiu, a Fergais," arsī. "Is bēsad" ol Fergus, "do cach graig remitēt lāir rotgata rodbrata rodfeither immoin hi tōin mnā misrairleastair."

Fochesath t in tarb isin maitin sin in chatha co comarnic fri Findbeannach hi Tarbga hi Maig Āii [53 a] .i. tarbguba tarbgleō. Rói Dedond a chētainm in cnuic sin. Nach ǣn t adroindi isin chath nī feith nī acht dēicsin in dā tarb occ omruc. Bāi Bricriu Nemt[h]enga thīar ina thor[1] iar mbrisiud a chind do Ḟergus cusna feraib fithchilli. Doluid la cāch da ndēicsin in c[h]omraic na tarb. Lodar in dā tharb tar Bricrind ocon imḟorrain combo marb de. Is ī aigid Bricrinn sin. Focairt chos in Duind Chūailngi ar adairc a chēle. Laa co naidchi na tuc a cois fris comidgres Fergusconimbert slait arna sednaig. "Nip sēn," ar Fergus, "in sengamain troitechsa tucad sunn do fagbāil ǣnach claindi ⁊ ceiniūil ⁊ imofārgaibthea mairbi lib."[2] Lasodain dosrenga a chois fris co mebaid a fergaire ⁊ co scescain aidarc dia chēle combai asain tslēib[3] ina ḟarrad. Slēb nAdarca sōn iarum dono.

Bertius riam iarum uide lā co naidche con docorostor asin[4] loch fil i tǣb Crūachan cotulaid dō ass co lūan ⁊ leithiu ⁊ tromchridiu a chēliu for dib nadarcaib. Dolodar iarsin ina slōig dia guin. Nī lēig Fergus acht a techt leth bud mellach lais. Is iarsin doascain dochum a thīri. Ibid dig i Findleithiu ic tuidecht. Is and fācaib leithi a chēliu. Findleithiu didiu iarum ainm in tīri. Ibis dig naile inn Āth Lūain. Fācaib lūan a chēliu and. Is de itā Āth Lūáin. Atnaig a gēm nass for Iraird Chuillind, roclos fon cōiced nuile. Ibis dig i Tromuib; is and docher tromchride a chēliu dia dib nadarcaib. Is de itā Troma. Dolluid do Ētan Tairb; dobert a ētan frisin tealaig oc Āth Dā Ḟerta. Is de itā Ētan Tairb i Muig Muirrthemni. Luid iarum for slighidh[5] Midhlūachra[6] i Cuib; is and nobīth la sescach Dairi ⁊ dognī būrach ann. Is de atā Gort mBūraig. Luid iarum combo marb itir Ulto ⁊ hUu Echach ic Druim Thairb. Druim Tairb dano ainm in puirt sin.

Dogēni Ailiil ⁊ Medb cōræ fri Ultu ⁊ fri Coinculaind. Secht mblīadna iarsin nī roibi guin duine eturru inn Ērind. Anaid Findabair la Coinculaind ⁊ tīagaid Con[n]achta dia tīr ⁊ tīagaid Ulaid do Emain Macha cona mōrc[h]oscar. Finit, amen.

  1. .i. toirsi added above
  2. mairb ilib ms.
  3. The s is added below
  4. The in is later on erasure
  5. The marks of aspiration are later
  6. The mark of aspiration is later