हें समाजाक जायत्या कारणांनी उपेगी पडटा.आनी ह्या स्वातंत्र्याचेर वोगीच मर्यादा घाली जाल्यार समाजाचें नुकसानच जावपाची चड शक्यता आसता.असो युक्तिवाद तो मांडटा.दर एका मनशाचें विशिश्ट अशे व्यक्तिमत्व आसता आनी ताची कदर सगळ्यांनी करूंक जाय.दर एका मनशाक स्वताच्या व्यक्तिमत्वाची जोपसाना आनी विकास करपाक वाव मेळूंक जाय असी ताची धारणा आशिल्ली.
आपल्या'युटिलिटेरिअॅनिझम'(उपयुक्ततावाग,१८६३)ह्या ग्रंथावरवीं ताणे उपयुक्ततावादाचो सिध्दांन्त उक्तो केला समाजीक वेव्हारांत एकाद्रें तत्व वा धोरण,ताचो प्रत्यक्ष भौतिक जीणेंत कितलो उपेग आसा,तें आपल्याक सुखाचें जातलें काय कितें?ह्या निकशाचेर तपासुन पळोवन तें आपणावचें काय सोडून दिवचें हाची शिकवण म्हळ्यार उपयुक्ततावाद.ताणें हेविशीं आपलो बापूय आनी बेंथॅम हाचेपरस चड खोलायेन आनी बारीकसाणेन हो उपयुक्ततावादा मांडला. समाजजीणेच्या संदर्भांत खंयच्या एका मनशाच्या सुखाचो स्वतंत्रपणान, असो विचार करूंक मेळना. उपयुक्ततावादांतल्यान स्वाभाविकपणान येवपी सुखवाद जरी आपणायलो तरी राज्यसंस्थेक दर एका मनशाक ताका जाय तीं सगळीं मेळोवन दिवपाक केन्नाच शक्य जावचें नी. देखुन राजकीय तत्वगिन्यांत सूख म्हळयार कितें हो प्रस्न करून तो सुखाचे जाणविकायेच्या प्रकारांत उच्च प्रकारांची आनी तिगपी तशेंच कमी प्रतीची आनी तितल्या पुरतीच असो गुणात्मक फरक करता.
जॅान स्ट्युअर्ट हो आपल्या बापायच्या आनी बेंथॅमच्या विचारांकडे सहमत नाशिल्लो.तरीय स्वताच्या विचाराक तो उपयुक्ततावादीय म्हणटलो. तो स्वातंत्र्याचो कट्टर पुरस्कतो आशिल्लो तरी लोकशाही म्हळयार व्यक्तिस्वातंत्र्याची पुराय हमी अशें जे मानतात तें कांय प्रमाणांत भ्रमीक आशिल्ल्याचेंय ताणें दाखोवन दिलां.लोकशाही शासन पद्दती ही व्यक्तिस्वातंत्र्याक मारक जावंक शकता अशें सांगून ताणें लोकसताकाच्यो ज्यो मर्यादा सांगिल्ल्यो तांकां लागून वैचारीक मळार बरेच बोवाळ जालो. पूण तो लोकशाहींतल्या धोक्याकडे फाट करपाक तो तयार नाशिल्लो.लोकशाय जर सगळ्या लोकांखातीर आसा, जाल्यार त्या लोकांक न पटपी गजाली सांगपी कांय थोडया लोकांकय त्या लोकांची सुवात आसुंकच जाय असो ताचो आग्रो आशिल्लो.ताकाच लागून ताणें सर्रास प्रौढ मतदान पद्दतीपरस प्रमाणशीर मतदान पद्दतीक तेंको दिल्लो. तेचपरी कामगारगंच्या आनी शेतकाऱ्यांच्या दु:खाक वाचा फोडून सामान्यांक न्याय आनी फाटबळ दिवपी कायद्याक तेंको दिलो.उत्पादनाचे मर्यादेमेरेन भांडवलशाही आनी वाटपाचे अवस्थेक समाजावाद अशी ताणें वेवस्था सांगिल्ली. कशेयतरेन जायना पूण समाजवाद आपणावंक जाय आनी ते दिकेन वाटचाल करूंक जाय अशें स्पशटपणान सांगापी इंग्लंडांतलो तो पयलो तत्वज्ञानी.ताचो उल्लेख करपासारके बेर कांय ग्रंथ अशेः एसेज ऑन सम अन्सेटल्ड क्वेश्र्वन्स ऑफ पोलिटिकल इकॅानॅामी (१८४४),थॅाट्स ऑन पार्लमेंटरी रिफॅार्म (१८५९),कन्सिडरेशन ऑन रिप्रेझेंटेटिव्ह गव्हमेंट(१८६१) युटिलिटेरिअॅनिझम (१८६३),ऑग्यूस्त काँत अँड पॉझिटिव्हिझम(१८६५),अॅन एक्झामिनेशन ऑफ सर विल्यम हॅमिल्टन्स फिलॅासॅाफी(१८६५) ऑटोबायॅाग्राफी(१८७३),थ्री एसेज ऑन रिलिजन(१८७४),एसेज ऑन पॅालिटिक्स अॅंड कल्चर(१८६२).
मिलस्टाइन, सेझार:(जल्म ८ ऑक्टोबर१९२७, बाईआ , व्हलांका-अर्जेटिना).
अर्जेटिनीयन-ब्रिटीश जीवरसायनशास्ञज्ञ.ब्वेन्स एअरीझ विघापिठाची रसायनशास्त्राची पदवी (१९५२)आनी जीवरसायनशास्त्राची डॅाक्टरेट पदवी (१९५७)मेळयतकच १९५८ त तो इंग्लंडाक गेलो. १९६० त केंब्रिज विद्यापिठाची डॉक्टरेट ताणें मेळयली.एक वर्सा केंब्रिज विद्यापिठाच्या जीवरसायनशास्त्र विभागांत काम करतकच तो ब्वेनस एअरीझ हांगाच्या विभागाचो १९६१-६३त मुखेल आशिल्लो.१९६३ त तो इंगलंडाक परतलो आनी केंब्रिज विद्यापिठांतल्या वैजकी सशोधन मंडळाच्या रेणवीय जीवविज्ञान प्रयोगशाळेंत ताणें संशोधन करपाक सुरवात केली.१९६१-८० त ताणें हे प्रयोगशाळेंत विज्ञानीक आनी प्रथीन रसायनशास्ञ उपविभागाचो मुखेल म्हूण काम केलें.१९८० त तो थंयच रेणवीय प्रतीरक्षा जीववीज्ञान उपविभागाचो मुखेल आनी फुडें १९८३ त प्रथिन आनी न्यूक्लिइक आम्ल रसायनशास्त्र विभागाचो मुखेल जालो.
मिलस्टाइन हाणें प्रतिपिडांच्या रेणुंची रचणूक, क्रमावीकास(उत्क्रांती) आनी आनुवंशिकी हांचेविशीं सशोधन केलां. ताणें कोलर हाचे वांगडा एककृतकी प्रतिपिंड निर्माण करपाखातीर १९७५ च्या सुमाराक संकरार्बुद तंत्राच्या लायिल्लया सोदाखातीर तो चड नामनेक पावलो. तेखातीर ताणें प्रतिपिंडाचो स्त्राव करपी एकेच लसीका कोशिकेचें अस्थिमज्जाबुर्दाचे एकेच कोशिकेकडेन संयोग घडोवन हाडल्यार एक संकरज कोशिका तयार जाता आनी हे कोशिकेंत लसीका कोशिकेची प्रतिपिड तयार करपाची तांक तशेंच मारक अर्बुद कोशिकचें चिरस्थायित्व आसता अशें दाखयलें.
वेगवेगळ्या उगमांपसून मेळयल्ल्यो प्रतिपिंड उत्पादक कोशिका संकरीत करप शक्य आसा आनी खाशेलो प्रतिपिंड मेळोवपाखातीर अशा कोशिकांचें व्हड प्रमाणाचेर कृत्रिम रीतीन संवर्धन करप शक्य आसा,अशेंय मिलस्टाइन आनी कोलर हांणी सुचयलें.ह्या तंत्रान पूर्वनिर्धारित खाशेंलपण आशिल्लया एककृतकी प्रतिपिंडांचें उपाट उत्पादन करप शक्य जालां. ह्या प्रतिपिंडांक लागून सैध्दांतिक आनी अनुप्रयुक्त जीववैजकी संशोधनांत सामकीं नवीं क्षेत्रां अस्तित्वांत आयल्यांत.
