O Amor, perché no songio all'hora stao

O Amor, perché no songio all'hora stao
Un Giove in forma no de piozza d'oro,
Ma per mez'hora del mio cagaor
Che una profumaria xe deventao.

Gracie che a puochi el Ciel ghe svuoda in cao,
Altro che de cattar perle o tesoro,
Quando Vener vegnua zo del so coro
S'ha degnà in casa mia d'haver cagao.

Quelle carne de riose tenerine
Su st'asse, nue per nue, senza tapeo,
Qua xe sentae, qua ha fatto le cachine.

E mi che ho un cul fiappo, un cul d'asseo,
Prosontuoso, avanti che me inchine
Diebo cagar senza basarme el deo.