Nina, intendessimo

Nina, intendessimo
Senza far scene.
Per ti più viver
No vogio in pene.

Zozo dei bazari
Me va l'amor;
Me costa el perderte,
Ma ghe vol cuor.

Quel sempre in colera,
Sempre in barufa
Pol chiaro esprimer:
«De ti son stufa.»

Vedo benissimo
Che un altro ogeto
T'ocupa l'anima,
Lo vedo schieto.

Mi no go meriti
Per impegnarte,
No son melifluo
Per cocolarte;

San omo ingenuo
Nel mio tratar,
No go politica
Per adular.

Ti pol, volendolo,
Conoscer ben
Se un cuor sensibile
Mi gabia in sen,

Ma a certe smorfie
D'adulazion,
Per mia disgrazia,
No, no son bon.

Fazzo el passibile
Per darte prove
D'amor, ma e inutile,
Gnente te move.

Donca lassessimo
Senza sussuri,
Senza altre colere,
Nè musi duri.

Questo sia l'ultimo
Dei mii lamenti,
Sia questo 'l termine
Dei mii tormenti.

A quelo tachite
Che più te piase,
E Tita lassilo
Almanco in pase.

Ma senti, barbara,
Vegnarà un dì
Che ti à da pianzer
Forsi per mi;

Ti à da conoscer,
Crudel e presto
Cossa sia perder
Un omo onesto.