Mi son tanto inamorao

Mi son tanto inamorao
In dona Nina mia vesina
Che me dà gran desciplina
Che me vedo desperao.

Gnao bao, bao gnao

Mi son tanto inamorao.

Mi me sento tanti afani.
(Tuti i porto per so amore!)
Che par proprio che sia cani
Ch'al mi cor fazza brusore;
Che da tute quante l'ore
Mi me sento passionao.

Gnao bao, bao gnao

Mi son tanto inamorao.

Quel so cor par propio pezza
De formagio marzolin.
Ela sempre me calezza
Come fussi fantolin.
Quando ho abù qualche quatrin
Ela sempre m'ha cavao.

Gnao bao, bao gnao

Mi son tanto inamorao

Maladeto chi g'ha vogia
Da intrar in amoranza,
Che mi sento tanta dogia,
Che par ch'abia un buso in panza
Che par propio che sia lanza
Che 'l mio cor ha trapassao.

Gnao bao, bao gnao

Mi so tanto inamorao

Maladeto el Dio d'amor
Che una frezza me g'ha trato.
E mi sento gran dolor
Propio come fussi mato!
Maladeto sì de fato
Quando amor mi g'ho portao.

Gnao bao, bao gnao

Mi so tanto inamorao

Se no fusse per paura
Sarìa forza me mazzesse
Per sta cagna traditura
Che me fa tante promesse.
Po' m'ha tolto mia braghesse
Che me vedo desperao!

Gnao bao, bao gnao

Mi son tanto inamorao.

No ghe posso pi cantar,
Che me redo tuto storno,
Che me sento consumar
Propio come legna in forno.
Maladeto sia quel zorno
Ch'i so ochi mi ho scontrao.

Gnao bao, bao gnao

Mi son tanto inamorao.

Ela sempre m'ha promesso
De volerme contentar;
Quando mi ghe vago apresso
Ela mai no vol parlar.
Maladeto sia so' par,
E putana che ha cagao.

Gnao bao, bao gnao

Mi son tanto inamorao.