Mi lo go per un zogatolo

Canzonetta per musica


Mi lo go per un zogatolo,
Nina mia, sto sentimento.
Discoremola un momento...
El sentir no xelo amar?

Se l'è amar, l'è proprio un vovo
El bandir sto bel vocabolo
Per valersene d'un novo
Che dà tanto da pensar.

Co ti à dito: El sentimento
Me sublima dal creà,
E un amor divinizà
Me conduse, Toni, a ti!

Sto linguagio me confonde,
El me ga del malinconico;
Più sugoso, piu laconico,
Nina cara, lo vòi mi.

Di più schieto: Toni mio,
Per ti spasemo d'amor,
Per ti sento ch'el me bulega,
Ch'el me palpita sto cuor;

Se no presto me despero,
Che sto rosto metafisico,
Per chi tende un poco al fisico
Nol ga gnente de saor.