Mettéme a rosto, a lesso, su la graella

Mettéme a rosto, a lesso, su la graella,
Lesséme in la pignata, in la stagnà,
Fè conto che sia un cièvolo, un'orà,
Trattéme da un marson, da una anguella.

Mandéme in ste gallìe per fallilella,
Tegnìme sempre a vostre spese in ca',
Mandéme in pellizon tutto l'instà,
E po, st'inverno, in un zipon de tella.

Disé sempre de no, sempre de pi,
Fè che ve daga del naso in tel cullo,
E se ve piase, dèmene vu a mi.

Fème far custion con ogni bullo,
Che ve ne vorrò ben dognora pi,
Perché son ustinà pi che no è un mulo.