Me sento una smania

Me sento una smania,
Me sento un brusor
Nel cuor, ne le viscere,
A darme dolor.

Procuro l'origine
Saver de sto mal,
Nè arivo a comprender
La causa fatal.

Che 'l fio mai de Venere
M'avesse ferio?
I dise che perfido
Xe in fati quel dio;

Che 'l solo so studio
Xe tesser ingani
Per veder i omeni
In pianti, in afani.

O' visto una femena
Un dì d' acidente
A un logo che pratico
Sentarmese arente;

Con tuta modestia
Discorso ò con ela,
E ò visto con genio
Che assae l'era bela.

M'à piasso l'amabile
Grazioso so far,
M'à piasso el melifluo
So dolce parlar.

Ah sì! senza dubin,
Cupido xe questo
El qual con insidia
Colpir m'à volesto.

Epur gera solito
Vantarme che Amor
No à mai possù iluder
El sciolto mio cuor.

Aimè! tropo incauto
Vantava sto ben;
E lu, tuto invidia,
M'à dà sto velen;

Velen che ne l'anima
Me dà gran tormento,
E sempre più a crescer,
Meschin, me lo sento.

Con ela trovandome
El sangue m'impizzo,
Patisso a no vederla,
Me irabio, me istizzo;

Oh Dio! se la barbara
No sente pietà,
De mi miserabile
Mai cossa sarà?

Se mai per disgrazia
Quel cuor xe ritroso
Finio go de viver;
Mi moro rabioso.