Luna de zugno

  
Vu, che avè 'l cuor zentil,
Vu, dolci amanti,
Vu, che ve amè costanti
Sin dal più verde April.

Za che se mostra in ciel
Sora d'ogni altra stela
Piena d'un dolce miel
Gintia la bela;

Za che mai più cussì
Seren el viso,
Nè grato xe stà 'l riso
Come che l'è in sti dì:

Vegnì qua su sto pra
Da sti russei frescheti,
Da sti verdi boscheti
Intorno circondà;

Vegnila a venerar,
Vegnì a sentir in peto
Quel che la sa ispirar
Divin afeto!

Vardela su quel col,
L'è arzento puro:
Za à da invidiarla el Sol,
Mi son sicuro.

E vardè là, vardè
Fra quei lauri odorosi,
Fra quei mirti amorosi
Come a trati la xe!

Come vien a interzar
L'ombra l'arzento,
Come la va a scherzar
Fra i rami drento.

Oh d'ogni amante cuor
Serenatrice;
Oh ti consolatrice
D'ogni amoroso ardor!

Risplendi sempre in ciel,
Mai no robarte,
No portarghe sto fiel
A chi sa amarte.