La vicinanza
From Wikisource
| La vicinanza de Jacopo Vincenzo Foscarini XIX secolo |
| Informassion su la proveniensa del testo |
Co son qualche volta
Vicin de culia,
Che mi chiamo mia,
Che el cuor m'à robà,
Me par d'esser fora
De tuti i mii guai,
Nè d'esser stà mai
Me par sfortunà.
La vardo, e me incanto,
Ghe parlo, e me godo,
Nè invidio sul sodo
L'onor de un sovran.
Ma po se ghe strenzo
La man in secreto,
Me par un dileto
De aver più che uman.
