La verità (Vien dito ch'el Dio Celo)

Vien dito che 'l dio Celo,
O un altro che ghe gera,
Che à fabricà la tera,
I pianeti, e le stele,
E tute st'altre cosse o brute o bele,
(Fra le quali gh'è l'omo,
Che per parlar sincero xe un gran tomo)
L'avesse anca creà
Certe divinità,
E fra le altre una tal,
Che 'l gavea messo nome Verità.
Questa doveva el mondo iluminar,
L'ordine conservar,
Assister i mortali,
E far ch'ogni creatura
Facesse in sto teatro,
Per quanto che se pol, bona figura.
Le xe vegnue qua in tera,
E eseguindo de Celo l'intenzion,
Per quanto le à podesto
Le ga fato fazion.
Mi no ve parlarò
De quel che le abia fato,
Tante cosse no so,
Ma de la Verità,
Za ch'i me l'à contà,
Ve dirò su un caseto,
Che quantunque strambeto,
Se de ascoltarlo, amici, ve degnè,
Son certo che 'l so dreto ghe catè.
Sta Verità è una dea
Soto umana figura,
Ma d'un altra natura;
D'una bela statura,
Maestosa, ben piantada,
Magra, ma no scarnada;
Se pol in t'una ochiada
I so vasi, e i so muscoli osservar,
E no ghe xe putelo
Che no la sapia a vista disegnar.
Co una so sola ochiada
La busia vien copada,
L'arte perde el color, a ogni mistero
Ghe casca el velo, e 'l resta un blitri, un zero.
Co st'altre dee, che gera le virtù,
Nei primi dì del mondo
Anch'ela xe vegnuda a star co nu;
(Cioè co quei d'alora,
Dai quai, stante le croniche,
Nu semo vegnui fora)
E con piacer dei omeni
E soa sodisfazion,
L'à fato per un pezzo ogni funzion.
In fati no ghe gera
Chi facesse per forza bona ciera,
No ghe gera un strupià
Che se credesse dreto e ben piantà,
Un vechio zovenoto,
Un che scondesse soto
D'una bela croata
Un gosso grando come una pignata,
Una vechia gabrina
Che se credesse Nina,
No culeti postizzi,
No impiastri, no pastizzi
Da far slissa la pele,
Nè sbeleti e sandrache,
Che ne crea tante bele,
Nè polpetine tirae su per forza,
Nè quela certa scorza
Che missiada col grasso
A molte done fa rigenerar
Quel fior che apena nato
Le s'à fato robar;
Co ai poltroni, ai scroconi,
Ai mami, ai marzoconi,
Ai dureti de cuor,
Ai nemici d'amor,
Ai ingrati, ai superbi,
Ai maligni, ai acerbi,
Ai arditi, ai birbanti
La se ghe fava avanti,
Tuti se conosseva,
E squasi tuti la li coregeva.
Sta dea donca nel mondo
Soto Saturno dio, ch'e stà el secondo,
L'à fato gran facende;
Ma dopo le vicende
Che xe nate fra i dei,
E che dai tre fradei
Messer Pluton, Netuno, e 'l somo Giove,
Xe stà diviso el mondo,
E che co legi nove
I à scomenza a regnar,
E volesto provar
Coi contraposti la virtù de l'omo
Per farlo a tute prove
Restar un galantomo;
Che i vizi i a descaenai,
Che xe vegnù i pecai,
Che l'à cambià natura,
La Verità no à fato più figura.
Anzi in qualunque logo
Che l'à avudo d'andar
La sa visto ad odiar;
E ben vedendo de no far più fruto
In sto mondo ribel,
L'aveva stabilio
De tornar suso in ciel;
Ma Giove ga ordinà
Che la stasse pur qua,
E xe sta apunto alora
Che sta dea s'à pensà
De trovar la maniera
De poder esser utile
Ai fioli de la tera;
Ma perchè in viso i omeni
No la volea vardar,
La se xe andada imbota a imascarar.
Ora in forma d'apologo,
Ora vestia da strolego,
Da proverbio, da emblema,
Da fiaba, da poema,
E in mile forme la s'à visto alfin;
Mi no ve digo altro,
Gh'è chi l'à vista messa d'arlechin.
A dir vero in sto modo
La ga podesto far
Quel ben ch'ela medesima
No la savea sperar.
Per altro mai cavar
Ga volesto la mascara, sicura
De no far fruto, e de portar paura.
Intanto el tempo à corso,
O sia con sucession
Le cosse de sto mondo
Ga fato mutazion.
Le montagne nel mar
A poco a poco le xe andade a star.
Quel moto, che le viscere
De sto globo fermenta,
Ga butà su del'isole
Fin da la fondamenta,
E l'à fato ingiotir
Senza tanti pensieri
Dei continenti intieri,
E dove gera mar
S'à visto a semenar;
E permutando i popoli
Tute le forme insolite
Tanti imperi à crolà,
E i s'à rigenarà,
E xe nate republiche,
E i omeni xe stai
Ora al lusso portai,
Al trafego, ai piaceri,
Ale fiabe, ai misteri,
Ala pase, ala guera,
Senza che mai d'un atomo
Se fruasse la tera.
Cussì corendo el tempo
Xe anca arivà quei zorni
Che de la nostra Europa nei contorni
Atene ga fiorio,
E tante altre cità ghe xe andae drio;
Xe vegnù in moda la filosofia
E gh'è sta chi l'à amada
Sin a la frenesia.
S'à formà molte sete,
Che per quelo che i dise
Xe stae tute imperfete;
E ognun de sti filosofi à cercà
De trovar senza mascara
La santa Verità.
Fra questi è sta un filosofo
Che s'à ficà in la testa de trovarla,
E de desmascararla.
Costu filosofando
L'andava, espassizzando
Per una certa strada,
El s'à da un'intopada.
Cossa gera l'intopo?
La Verità coverta
Co le forme d'Esopo.
Sul fato el s'à irabià;
Ma Esopo ga parlà,
E in elo l'à trovà
Senza tropa fadiga
Sconta la Verità.
Alora entusiasta,
Da vero temerario, el l'à pregada
De mostrarse un mumento smascarada.
La grazia vien negada.
El dà, in quel che se dise, un'asenada,
Sforzandose a provar
Che la s'aveva da desmascarar;
Disendo, che i filosofi,
Che gera de virtù tuti impenii,
Podeva contemplarla
Senz'esser avilii;
Che no s'à da confonderli
Col resto de la razza;
Ma la dea, soridendo,
La dise: «Tiò, vardime pur in fazza,»
Come quel che bevendo in certa tazza
Per incanto el vedeva
I corni che 'l gaveva,
E che co abilità
La so cara mugier gavea impiantà;
Cussì a l'aspeto insolito
De Verità teribile,
Se acorze sto filosofo
De le fangose sacole
Che ghe infranzava l'anima;
E de lu disgustandose,
E in tel cuor biastemandola,
Co le lagrime ai ochi el l'à pregada
De farse anca ai filosofi
Veder sempre coverta o imascarada.
Omeni, done, amici, che ascoltè,
E che sempre disè:
«Parlème schieto; voi sincerità:»
Ricordeve de quel che v'ò contà.