La verità (Dea venerabile)

Dea venerabile
Ma desgraziada,
Con i Filosofi
Un dì cubiada
Gera teribile
La Verità.

Ma a l'uman genere
La disgustava,
E grandi e picoli
La maltratava,
E no voi dirvelo
Chi l'à atacà.

De quei Filosofi
Cubiai con ela
Chi è morto martire,
Chi à fato vela;
Xe stai pochissimi
Quei che à campà.

Povera diavola!
Da tuti odiada
Da Giove subito
La xe tornada,
E lagni e supliche
La gh'à portà.

Lu prevedendose
De aver in Cielo
Sta so Dea pitima
Sempre con elo,
Se un Dio pol esserlo,
El s'à inrabià:

Mo via, petegola,
Dise el Tonante,
Per cossa farmene
Tante e po tante,
E comprometerme
De qua e de là?

Su ne l'Empireo
Ti à bu a negarme,
E i mii condomini
A maltratarme;
Te mando ai omeni
Pezo ti fa?

Za da la rabia
Te mazzaria,
Ma ti è impassibile,
E ti è fia mia;
Pur pena debita
Ti porterà.

Va in tera subito
E co la boca
De tuti i stolidi
Parla e taroca.
E quel Proverbio
Che à dominà

Per tanti secoli,
Per ani anorum,
In ore abundat,
Risus stultorum,
Per sta catastrofe
Xe stà cambià