La sòca de Nadàl
From Wikisource
| La sòca de Nadàl de Berto Barbarani 1900 |
| Informassion su la proveniensa del testo |
Nina, g'ò qua una sòca,
che no la buta più:
su i copi sventa e fioca,
dame 'na man che in du,
femo brusar sta sòca...
La sòca che se brusa,
la taca a ciacolar!
Mi te dimando scusa,
ma voi sentir parlar
sta sòca che se brusa:
Da ci son nata al monte
mi no l'ò mai savù:
'na note, sconte, sconte
le se contava su
le fragole del monte:
«Sta sòca quà piantada
'na volta l'era un fior,
el vento el l'à girada
par volta a far l'amor
e dopo el l'à piantada...»
E mi pensava: el vento,
l'è stà el me morosin,
e quando che lo sento
passarme da vissin,
me fao basar dal vento!
Ma un giorno in te 'na recia
me son sentì sigar:
«Ti te deventi vecia»
e vòlteme a guardar,
g'aveva el vento in recia !
E alora ò verto i oci
e i giorni i era longhi...
Pianseva..A i me zenoci
nasseva su dei fonghi,
con l'acqua de i me oci,
E me diseva i fonghi:
«Fate coraio, su !»
ma i giorni i era longhi,
ma mi pensava a lu
e no badava a i fonghi..
Quanti ani è vegnù dopo
mi no l'ò mai savù:
che za g'avea quel gropo,
che me tornava su
anca çent'ani dopo...
Pò, i m'à taiado in tochi,
come i fa a l'ospedal
con tuti quei pitochi
che more del so mal
e pò i le rompe in tochi;
ma l'anima s'à sconto
drento sta sòca quà;
e l'è come la conto;
El vento el m'à lassà,
e dopo pò, el s'à sconto!
  |
This work might not be in the public domain outside the United States and should not be transferred to a Wikisource language subdomain that excludes pre-1923 works copyrighted at home. According to the copyright law of Italy this text will be in the public domain by January 1st 2016.
Veneto: Sto laoro el xe nel publico dominio nei Stati Uniti de la Merica parché el xe stà publicà la prima olta fora dai USA prima del 1° zenaro 1923. In altri stati podarìa essarghe dele leggi difarenti. Donca sto laoro el podarìa no essar mia nel publico dominio in Italia o altre nasion che no sia i USA.
Secondo la leje italiana sui diriti d'autor, sto testo el sarà de publico dominio a scuminsiar dal 1° zenaro 2016.
Italiano: Il presente lavoro si trova nel pubblico dominio negli Stati Uniti d'America, perché è stato inizialmente pubblicato fuori dagli USA prima del 1° gennaio 1923. In altri stati le leggi potrebbero essere diverse. Di conseguenza il presente lavoro potrebbe non trovarsi nel pubblico dominio in Italia o in altre nazioni diverse dagli USA.
In base alla legge italiana sul diritto d'autore, questo testo sarà di pubblico dominio a partire dal 1° gennaio 2016.
|
