La riunion

Silvia, la bionda Silvia,
Che un tempo de sto cuor
Xe stada la delizia,
Che m'à imbriagà d'amor,

Lusendo in ciel chiarissima
La luna a mezzo istà
Sui fiori e l'erba tenera
S'avea co mi sentà.

Nè 'l tempo, nè altre Veneri,
Nè quel tremendo sì,
Avea la bela imagine
Mai scancelada in mi.

Fissi un co l'altro, imobili,
Se stevimo a vardar,
El cuor sentiva a baterme,
Ma no podea parlar.

Alfin co un'ose languida,
Che ben facea capir
La situazion de l'anima,
Cussì m'ò messo a dir:

Questa è quel'acqua limpida
Che semo andai ti e mi
A scaturar i gambari;
No è vero? e Silvia: — sì.

E là, da drio quei alberi
Che la se va a stagnar,
Xe dove che quel'anara
Ti m'à mandà a chiapar;

Che tropo cocolandola
Tanta gran rabia ò bù,
Che voleva mazzartela...
Te ricordistu più?

Che dopo benedivimo
Le colere d'amor,
Che in do nu no sentivimo
Che un'anima, che un cuor?

I gran mumenti, Silvia!
Ch'i n'abia più a tornar?
Ela un'ochiada tenera
Lassa su mi cascar.

Alora strucolandoghe
La man, digo: mio ben,
Come in quei dì, assicurite,
Arde per ti sto sen;

Ma ti?... quele to lagreme
Voriele forsi dir,
Che l'amor te rimprovera,
Che ti torni a sentir?

Ah! pensa, che 'l primissimo
Son che ti gh'à zurà
In quei zorni beatissimi
Eterna fedeltà;

Che quel dover teribile
Che t'à sbregà da mi
Per quatr'ani continui
Ga tossegà i mii dì;

Che da la mia memoria
Mai n'ò savù scazzar
Quele to tante grazie,
Quel soave parlar:

Mai quei cavei finissimi,
Nè quei lavri de miel,
Quel bel ochio ceruleo
Che me ricorda el ciel:

Pensa... ma interompendome,
Senza però parlar,
Da quela man bianchissima
Me sento a slontanar.

Oh Dio!... mortificandome,
Dopo de aver slanzà
De le ochiae languidissime,
Che diseva, pietà,

Ai pie de la mia Silvia
Za gera per morir...
Amor un tal spetacolo
No ga possù sofrir.

Quela tremenda fiacola
L'à fato sbampolar:
La luna in t'una nuvola
Se xe andada a sarar.

Un fogo vivacissimo
S'avemo sentio al cuor,
Son certo che se amevimo,
Se no, coss'è l'amor!

Come po che se amessimo,
Cossa de nu sia stà,
Mi no savaria dirvelo:
Domandeghe a quel pra.