La riflession

Chi se ajuta a minchionarse
El piacer lo gusta più:
L'artifizio de inganarse
Xe a le volte una virtù.

Mai vedè sortir l'Aurora
Come in versi la lezè;
Mai cussì no la vien fora;
L'è un ingano, ma godè.

Se quel baso a Nina bela
No avè da proprio col cuor,
No xe arzento de copela
La carezze del so amor.

La se ingana, e pur la gode;
Vu godè, ve minchionè;
Monea falsa paga e scode
L'uno e l'altro; ma godè;

Credè quela un'Eloisa,
Deventè sentimental;
No se' tali po' in camisa,
Ve inganè, ma no stè mal.

Co gh'è un giozo de riflesso;
Schiao patroni sior piacer;
Trovè el vero tropo spesso
Che no è molto lusinghier.

Minchionarse, minchionarse;
Cari amici, se se pol;
Za se ariva a sminchionarse;
E xe alora che ne dol.