La primavera (Luigi Martignon)

Sto mazzo de fiori
De vari colori,
Ti no te l'immagini
Chi a mi me la dà?
L'afar xe inocente,
L'è un puro acidente,
Adesso a contartelo
Sincero son quà.

Modesta putela,
Che semplice e bela,
Passava sti grebani
Sul nascer del dì,
Per puro acidente,
Per caso inocente,
M'à dito vedendome...
M'à dito bondì.

Bondì xe un saludo
Da mi conossudo,
Fra l'anime semplici
Saludo cordial,
E se l'acidente,
Se 'l caso inocente,
M'à fato ripeterlo,
No xe gnente mal.

Quel dì al complimento
No zonto un acento:
No posso più vederla
Per tre quatro dì;
Ma el caso inocente,
El puro acidente,
La porta in sti grebani...
Ghe digo bondì.

La ga in t'un cestelo
Qualcossa de belo;
Che viole, che anemoli,
Che sorte de odor!
Per puro acidente,
Per caso inocente,
Ghe digo regalime,
Putela, d'un fior.

Tra quela avenenza
Mo quanta inocenza!
No tarda d'un atimo
A dirme de sì!
Cussì d'acidente,
Per genio inocente
Amor ricercandote
Diressistu ti?

De fiori un mazzeto,
La forma perfeto,
E mentre per tormelo
Slongava la man,
Sta puta inocente
Vegnindome arente
Me dise: quel zovene
Ve prego andè apian.

Sti fiori odorosi,
Che ancuo xe preziosi,
Credeu che racolti
Li gabia per vu?
Putela avenente,
Che a vu ve xe arente,
Sincera, credemelo,
Me preme de più.

Ve dago el mazzeto,
Ma a pato che in peto
De quela sti bocoli
I vaga a morir;
Ne caso inocente,
Nè puro acidente,
Sta cossa, che v'ordino,
Ve porti a tradir.

Volea ringraziarla,
Volea salutarla,
Ma pronta qual fulmine
L'è corsa da là.
Restando dolente
De no saver gnente
Chi gera la zovene
Che m'à regalà,

Nasando el mazzeto
M'è nato un sospeto,
Lo vardo, lo esamino,
Lo torno a vardar;
Sior sì l'acidente,
E1 caso morente,
Me fa squasi subito
De tuto acertar.

Gavea sta putela
Minià la cordela;
In modi assae semplici
Ghe gera notà:
« Che a ti Primavera,
Per stima sincera
Un baso mandandote,
Quei fiori te dà.»

Contento e beato
Sto caso m'à fato;
Ghe penso, e pensandoghe
Me tegno più in bon;
Sodisfo al preceto
Mandando el mazzeto;
Tesoro, ricevilo,
Te 'l dà la stagion.