La necessità

No xe l'età freschissima,
No xe contento el cuor,
So che l'Amor xe un perfido,
Nè so scampar da Amor.

So che un'amante fervida
Spesso la dona xe;
Co no l'amè sul serio,
O pur se no l'amè;

Ma so che la xe insipida
Senza impizzarse el cuor;
E benchè Amor sia un perfido
No so scampar da Amor.

So che a so' mare Venere,
Sporzendoghe la man,
Sparagno afani e spasemi;
Scampo dal dio tiran;

Ma che le so' delizie
Sazie, nè ariva al cuor;
E benchè Amor sia un perfido
No so scampar da Amor.

So che la benda magica,
La benda d'ilusion,
Strazza dai ochi ai omeni
Filosofia e razon;

Ma co, che senza iluderse
La vita xe languor;
E benchè Amor sia un perfido
No so scampar da Amor.

So... ma el saver no medica
Chi è nato per sentir;
E so, che no scampandote
Tropo averò a sofrir;

So che in quei ochi, o Filide,
Xe sconto el traditor;
Nè so scampar da Filide;
Nè so scampar da Amor.