La mosca

In quei bei tempi d'oro,
Che parlava el molton, la manza, el toro,
Le mosche, i rospi, i sorzi, i aseneli
E che tuti parevimo fradeli,
Che nasceva i puteli
Senza che la comare o 'l comaron
Facesse dele brute operazion,
Che gera tuto bon;
Che dai roveri el miel,
Dai numi se gavea late e puina,
Che no gh'era cusina,
Nè leti, nè poltrone,
E che le done gera nine e none,
Val a dir brave e bone,
Servindo d'una gran comodità
A tuta quanta la comunità
Senza driti esclusivi;
Che sicuri dormivi,
Che no ghe gera lite e terza e nona,
Nè dei grandi la razza sfondradona,
(Tempi che se i xe stai,
No i tornarà più mai
Per i nostri pecai)
Giusto in sti tempi digo, gh'è sta un omo,
Che stufo de campar da galantomo
Una dona l'aveva inzinganà,
El s'avea messo in testa
De formar quel che i chiama società,
Co lu l'avea chiamà
Un bravo gato e un can,
Za persuasi de sto novo pian.
I è andai in t'una valeta
Da la madre natura predileta,
E in quela i à destinà
De piantar sta so nova società,
L'omo cussì à parlà:
«Animali fradeli,
Se ò da considerale come fioli
De quela che chiamemo la natura,
Che à stampà ogni creatura,
De mi inferiori assae,
Per altro co se vol considerar,
Che in do pie no podendo caminar,
No gavarè mai man,
Come el genere uman;
Quando se pensi a la mia gran malizia,
Che da qua avanti chiamarò giustizia,
Filosofia, rason,
E che un zorno a da farme parer bon;
Animali, diseva,
Vu vedarè che no savemo unito
Per scampar dala sè, o dal'apetito,
A bastanza ne dà
Quela che n'à creà,
Ma i gusti è pochi e scarsi,
E v'ò fato capir,
Che stando uniti insieme
Li podemo ingrandir,
Perfezionar, condir;
Insoma gh'è una gran diversità
Da l'animal salvadego,
A quel de società.
Sto principio impiantà,
Qualcossa s'à da far,
Vu za el vedè, un per l'altro
Per poder ben campar.
Mi a la bona stagion
Farò la provision
E de grani e de frati,
Perchè co vien l'inverno
No abiemo da zunar in sempiterno.
Sta dona che vedè,
Che da qua avanti chiamarò mugier,
Val a dir che nissun la pol più aver,
La pensarà a sugarli,
A netarli, a secarli,
E po co tuta l'arte
La ne farà la parte;
Invece de spelonca
Co de la pagia, co dei rami sechi,
Co del fango, dei stechi
Farò una certa fabrica,
Che chiamaremo casa,
Dove che 'l fredo, el vento
No possa vegnir drento;
Farò cent'altre cosse in conclusion
Perchè el viver sia bon.
Mi farò questo, e vu
Cossa fareu, da bravi,
Rispondè; disè su? —
Mi, dise 'l can, dai ladri,
Che ancuo s'à da chiamar
Quei che qua se volesse desfamar,
Ve savarò vardar.
Cigarò, sbragiarò,
E se ocoresse li morsegarò. —
— Ben bravo, dise l'omo,
L'è un far da galantomo,
E vu: voltà dal gato;
— Mi per tante bravure no son fato;
Ma savè che gh'è i sorzi,
Che da per tuto i va,
E i vegnarà anca qua,
E che per profession
Me piase el bon bocon;
Mi li mazzarò tuti, e co bravura
Ghe darò in tel mio corpo sepoltura.»
Intanto che i parlava
I vede là una mosca,
Che atenta li ascoltava
—«Sior animal chi seu?
Ghe dise alora l'omo,
E co nu: cossa feu? —
— Mi son la mosca, e come in vita mia
M'à sempre piasso star in compagnia,
Cussì, cari, sentindo
Tante cosse a contar
Del novo vostro star,
Voleva in sto mumento
Co vu unirme a campar. —
— La mosca donca sè,
E star co nu volè?
Ben siora, rispondeme,
Qual è el mistier che fè? —
Co un'aria da petegola
La sbalza su una fregola,
Po a la testa del can,
E alfin sul naso uman;
Lu intanto chiacolando,
Sempre la stuzzegava,
E l'omo stranuava.
Ela in bota scampava,
E dopo la tornava,
E l'omo s'inquietava:
«Via quieteve in malora
El dise, rispondè,
Qual è el mistier che fè? —
— Co volè che ve diga
No son tropo paziente;
Mi no ò fato mai gnente;
Stago coi animali
Uguali, disuguali;
Se gh'è qualche bocon
Che anca per mi sia bon,
Mi te ghe sbalzo in cima,
E voi esser la prima;
Volerme cazzar via,
S'à capio che l'è un pezzo,
Che la xe una pazzia;
E chi me vol mazzar
Ghe perde più in tel tempo
Che bisogna fruar.
No gh'è animal per questo
Che me fassa paura
Nè per le sgrinfe o el dente,
Nè per la so statura,
In soma mi no ò fato,
E no farò mai gnente:
— L'è un parlar da insolente,
Salta su el can, nè so chi che me tegna... —
— Sior can la se trategna,
L'omo interompe, co la furia mai
No ga da esser tratai
I afari tra nu altri, e qua sta el ponto,
Che s'à da far quel che più torna a conto.
Lassè che parla mi:
Siora mosca, sentì,
Ghe dise alora l'omo,
Mi de rason podaria farve un tomo,
Ma inutili al mumento,
Voi che ve persuada el sentimento.
Capisso che la massima
Per vu xe bela e bona,
Se vede che sè nata zentildona;
Ma se de star co nu ve degnarè,
Cara, son persuaso
Che qualcossa farè. —
— Gavè una bona grazia,
Dise la mosca alora,
Che molto me convince e m'inamora;
Quelo che posso far
Ze de lassarve star,
Co me dè da magnar.»
Da rabia el can sbragiava,
E anca el gato sgnaolava,
Ma l'omo più prudente,
Che se ramemorava
Quanto la mosca al naso lo inquietava,
El li tira in disparte,
E co tuta quel'arte,
Che xe fia de l'umana costruzion,
El fa che 'l can, e 'l gato
Intenda la rason.
Con un primo decreto,
Che xe sta el più perfeto,
S'à dovudo fissar
De darghe da magnar
A so celenza mosca
Perchè la i lassa star.
Qualcun dimandarà
Se in sta fiaba ghe xe moralità,
E mi rispondarò:
Co nol savà vu altri
Gnanca mi no lo so.