La marina

Za se abozzava el zorno;
Le stele in ciel spariva;
L'aurora compariva
El mondo a ralegrar.

Un bel matin de zugno,
Che a Lio su la marina
Gera co la Biondina
El fresco a respirar,

Con un fioreto in testa
La gera, e coi caveli
Che sparsi in biondi aneli
Ghe zogolava in sen;

No la gaveva busto,
Nè veli, nè cerchieto;
Ma solo un corsiereto
E un bianco bocassin.

Messa cussì, in quel'ora,
Puzada sul mio brazzo,
Penséve che strapazzo,
La fava de sto cuor!

La se ne gera acorta
Sta furba, sta strigheta,
E a darme la stangheta
La s'à volsù provar:

Varda quel Sol, la dise,
Co belo ch'el vien fora;
E come che l'indora
L'acqua col so splendor!

Come ch'el venteselo
Va l'aria rinfrescando
Come se va ingrespando,
Placidamente el mar!

Ma mi, che come brase
Tuto de drento ardeva;
Penséve se gaveva
Più vogia de vardar.

Ti, ti xe el Sol, rispondo,
Per mi, nè gh'è altri Soli;
O che ti me consoli,
O vedime a morir.

Pietosa quei ochieti
Verso de mi la move,
E sento che me piove
Mile dolcezze in sen.

La man ghe strenzo alora,
La bela me risponde,
Le idee me se confonde,
Più no me trovo in mì.

De st'estasi beata
Chi poderìa parlarve?
Coss'ogio da contarve
Se in mi no gera più?

So che svegià m'ò visto
Sentà co la mia Bela;
E Amor sentà con ela,
Ma mezo indormenzà.