La lontananza (Anton Maria Lamberti)

Come el vilan l'istà,
Ch'el calor ga arsirà
L'erba e le biave,

Brama l'acqua dal ciel,
Che più dolce del miei
Per lu sarave;

Come che un pelegrin
Brama vederse al fin
D' un longo viazo;

E che un interessà
El tesoro trovà
Lo brama al sazo;

E come chi xe in mar
Dopo un gran navegar
Sospira el porto:

E coma brama san
La mare el fio lontan,
Solo conforto:

Come el sol el Lapon,
La libertà el preson,
L'orbo la luse;

Con un istesso ardor
A bramar quel to cuor
Amor m'induse

Con un istesso? no
De più bramar lo so,
Più lo sospiro.

Quei altri a delirar
No i vedo e angonizzar
Senza respiro:

Mi sì, che sento in sen
E le fiame e 'l velen,
Nè go un conforto.

Quel che savaria in mar
No vorave trovar
La morte in porto;

Nè 'l pelegrin vorà,
Dopo aver ben strussià,
Patria e caena;

Nè veder l'orbo el ciel
Per no bever che fiel
Disnar e cena.

Mi, del to cuor paron,
Aceto la preson,
Morte disprezzo.

Credilo, cara, si,
Ogni ben l'è per mi
Ben senza prezzo.

Ma come che l'amar
Ne fa spesso cascar
In tel delirio!

Sospiro per amor,
Desidero el to cuor,
Perchè sospirio?

No me l'astu donà,
E no m'astu zurà
Mai torlo in drio?

E vero, si, mio ben,
Ma ti è lontana, e in sen
Ti 'l ca col mio.